ໃນຕອນເຊົ້າ ຂອງວັນທີ 11 ມີນາ 2024, ພະແນກກະສິກໍາ ແລະ ປ່າໄມ້ແຂວງຈໍາປາສັກ ໄດ້ຈັດພິທີປາຖະກະຖາເອກະສານວັນສໍາຄັນຕ່າງໆຂອງຊາດ ແລະ ຂອງພັກ ຄື: ເອກະສານວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ(20/1/1949 - 20/1/2024), ເອກະສານວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ (8/2/1924 - 8/2/2024), ເອກະສານວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (22/3/1955 – 22/3/2024) ແລະ ເອກະສານວັນຄຽດແຄ້ນຂອງປະຊາຊົນລາວ ຄົບຮອບ 78 ປີ(21/3/1946 – 21/3/2024). ພິທີຈັດຂຶ້ນຢູ່ສູນຄົ້ນຄວ້າກະສິກໍາພາກໃຕ້ ບ້ານໂພນງາມ ນະຄອນປາກເຊ ໂດຍການເຂົ້າຮ່ວມ ແລະ ບັນລະຍາຍເອກະສານຂອງ ທ່ານ ປອ.ສຸປານີ ສີລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ. ມີທ່ານ ຄໍາ ນິລະວົງ ຄະນະພັກຮາກຖານ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ພ້ອມດ້ວຍການນໍາຂະແໜງການ,ການນໍາກອງ, ສູນ, ສະຖານີ, ການນຳຫຼັກແຫຼ່ງ, ສະມາຊິກພັກ ແລະ ພະນັກງານ - ລັດຖະກອນພາຍໃນພະແນກດັ່ງກ່າວ ເຂົ້າຮ່ວມ.
ເນື້ອໃນເອກະສານວັນສ້າງຕັ້ງກອງທັບປະຊາຊົນລາວ ໄດ້ຍົກໃຫ້ເຫັນສະພາບແວດລ້ອມກ່ອນການສ້າງຕັ້ງກອງທັບ, ການກໍາເນີດ, ຄວາມຈໍາເປັນພາວະວິໄສ ແລະ ຄວາມໝາຍຂອງການສ້າງຕັ້ງກອງທັບປະຊາຊົນລາວ; ຍົກໃຫ້ເຫັນຜົນງານໄຊຊະນະ, ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ໃນແຕ່ລະໄລຍະ ຄື: ໄລຍະດໍາເນີນການປະຕິວັດ ຕ້ານການຮຸກຮານຂອງພວກລ່າເມືອງຂຶ້ນຝຣັ່ງ ແຕ່ປີ 1949 - 1954; ໄລຍະການຕໍ່ສູ້ກູ້ຊາດ ຕ້ານການຮຸກຮານຂອງຈັກກະພັດອາເມລິກາ ແຕ່ປີ 1954 - 1975; ຍົກໃຫ້ເຫັນຜົນງານໄຊຊະນະ, ການເຕີບໃຫຍ່ຂະຫຍາຍຕົວຂອງກໍາລັງທ້ອງຖິ່ນ ແຂວງຈໍາປາສັກ ໄລຍະດໍາເນີນການຕໍ່ສູ້ ຕ້ານການຮຸກຮານຂອງຈັກກະພັດອາເມລິກາ ແຕ່ປີ 1962 - 1975 ເຊິ່ງມີ 3 ໄລຍະ, ໄລຍະທີ 1 ແຕ່ປີ 1962 - 1964, ໄລຍະທີ 2 ແຕ່ປີ 1964 - 1968, ໄລຍະທີ 3 ແຕ່ປີ 1969 - 1975. ນອກນີ້ ທ່ານຍັງຍົກໃຫ້ເຫັນຜົນງານໄຊຊະນະ ແລະ ການປະກອບສ່ວນຂອງກໍາລັງທ້ອງຖິ່ນແຂວງຈໍາປາສັກ ໃນໄລຍະຕໍ່ສູ້ກູ້ຊາດ, ໄລຍະແຫ່ງການປະຕິບັດ 2 ໜ້າທີ່ຍຸດທະສາດຂອງພັກ ແຕ່ປີ 1975 - 1985, ໄລຍະສືບຕໍ່ປະຕິບັດ 2 ໜ້າທີ່ຍຸດທະສາດ ແລະ ປະຕິບັດແນວທາງປ່ຽນແປງໃໝ່ຂອງພັກ ແຕ່ປີ 1986 - 2000, ໄລຍະປົກປັກຮັກສາ ແລະ ສ້າງສາພັດທະນາ ປະເທດຊາດ ແຕ່ປີ 2001 ມາເຖິງ ປັດຈຸບັນ.
ເນື້ອໃນເອກະສານວັນເກີດ ປະທານ ຄຳໄຕ ສີພັນດອນ ຄົບຮອບ 100 ປີ ຍົກໃຫ້ເຫັນເຖິງບຸນຄຸນ - ຄຸນງາມຄວາມດີຂອງປະທານ ຄຳໄຕ ສີພັນດອນ ທີ່ມີຕໍ່ປະເທດຊາດ ແນໃສ່ຮຽນຮູ້ ແລະ ນຳເອົາແບບຢ່າງທີ່ດີຂອງເພິ່ນ ມາໝູນໃຊ້ເຂົ້າໃນການຈັດຕັ້ງເຄື່ອນໄຫວ ແລະ ການດຳລົງຊີວິດຂອງພະນັກງານ, ສະມາຊິກພັກ, ປະຊາຊົນ ແລະ ຊັ້ນຄົນຕ່າງໆ ເພື່ອສືບຕໍ່ພັດທະນາປະເທດກ້າວຂຶ້ນຕາມອຸດົມການຂອງພັກຢ່າງມີໄຊ. ຈາກນັ້ນ, ທ່ານຍັງໄດ້ຍົກໃຫ້ເຫັນເຖິງຊີວິດເຍົາໄວ ແລະ ຈຸດເລີ່ມຕົ້ນເຄື່ອນໄຫວປະຕິວັດ ຂອງປະທານ ຄຳໄຕ ສີພັນດອນ ໃນແຕ່ລະໄລຍະ ນັບຕັ້ງແຕ່ປີ 1931 – 2006 ຈົນເຖິງປັດຈຸບັນ. ປະທານ ຄຳໄຕ ສີພັນດອນ ແມ່ນໜຶ່ງໃນບັນດາຜູ້ນຳຮຸ່ນກໍ່ຕັ້ງຂະບວນການ ແລະ ບຸກເບີກເສັ້ນທາງປະຕິວັດ ຢູ່ປະເທດເຮົາ ເຊິ່ງເວລາໃດກໍໜັກແໜ້ນທາງດ້ານການເມືອງ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງຕໍ່ໜ້າທີ່ໆໄດ້ຮັບມອບໝາຍ ເລີ່ມຈາກພະນັກງານທຳມະດາ ກາຍເປັນຜູ້ນໍາພາ - ຊີ້ນຳ – ບັນຊາຂະບວນການຕໍ່ສູ້ປົດປ່ອຍຊາດ ຄຽງບ່າຄຽງໄຫຼ່ກັບ ປະທານ ໄກສອນ ພົມວິຫານ, ປະທານ ສຸພານຸວົງ ແລະ ຜູ້ນໍາຄົນອື່ນໆ ຂອງແນວລາວຮັກຊາດ ຈົນສາມາດໄດ້ຮັບໄຊຊະນະ ແລະ ສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975; ພ້ອມນັ້ນ ປະທານ ຄໍາໄຕ ສີພັນດອນ ຍັງໄດ້ປະກອບສ່ວນຄົ້ນຄວ້າ ແລະ ກໍານົດທິດທາງຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງວາງແນວທາງປ່ຽນແປງໃໝ່ອອກຢ່າງຖືກຕ້ອງ, ສອດຄ່ອງ ທັງໄດ້ນຳພາ – ຊີ້ນຳ ການຈັດຕັ້ງປະຕິບັດໄດ້ຮັບຜົນສຳເລັດໃນຫຼາຍດ້ານ.
ເອກະສານວັນສ້າງຕັ້ງພັກປະຊາຊົນ ປະຕິວັດລາວ ໄດ້ຍົກໃຫ້ເຫັນມູນເຊື້ອການນຳພາອັນປີຊາສາມາດ, ສະຫຼາດສ່ອງໃສ ຂອງພັກປະຊາຊົນ ປະຕິວັດລາວ ທີ່ໄດ້ນຳພາກອງທັບ ແລະ ປະຊາຊົນບັນດາເຜົ່າ ດຳເນີນການປະຕິວັດຊາດປະຊາທິປະໄຕ ແລະ ນຳພາປົກປັກຮັກສາສ້າງສາ ລະບອບໃໝ່ ແລະ ປະເທດຊາດໄດ້ຮັບການພັດທະນາຢ່າງຖືກທິດ, ມີຄວາມໝັ້ນທ່ຽງຕໍ່ເນື່ອງ - ໜັກແໜ້ນ, ພ້ອມນີ້ ຍັງຍົກໃຫ້ເຫັນວິວັດທະນາການແຫຼ່ງການກໍ່ຕັ້ງ, ປັບປຸງກໍ່ສ້າງ, ການເຕີບໃຫຍ່ຂະຫຍາຍຕົວ, ຜົນງານວິລະກຳ, ທາດແທ້ມູນເຊື້ອອັນສະຫງ່າງາມຂອງພັກ ຕະຫຼອດໄລຍະ 69 ປີ. ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂື້ນ ໃນວັນທີ 22 ມີນາ 1955 ໂດຍແມ່ນປະທານ ໄກສອນ ພົມວິຫານ ເປັນ ເລຂາທິການໃຫຍ່ຄະນະບໍລິຫານງານສູນກາງພັກ ໃນເວລານັ້ນ ພາຍຫຼັງພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນແລ້ວ ກໍໄດ້ແບກຫາບພາລະກິດປະຕິວັດ ອັນແສນຫຍຸ້ງຍາກລຳບາກ ເຊິ່ງເຕັມໄປດ້ວຍການທົດສອບທີ່ລະອິດລະອ້ຽວ ແລະ ການເສຍສະຫຼະອັນໃຫຍ່ຫຼວງ ແຕ່ມີກຽດອັນສູງສົ່ງ ນຳພາປວງຊົນລາວທັງຊາດ ຕໍ່ສູ້ປົດປ່ອຍປະ ເທດຊາດອອກຈາກແອກປົກຄອງຂອງຕ່າງຊາດ, ນຳເອົາຄວາມເປັນເອກະລາດ, ອິດສະຫຼະພາບ, ສິດເປັນເຈົ້າຂອງປະເທດຊາດອັນແທ້ຈິງ ມາສູ່ປະເທດຊາດ ແລະ ປະຊາຊົນບັນດາເຜົ່າ.
ພັກ ແມ່ນອົງການຈັດຕັ້ງເສນາທິການທາງການເມືອງ, ເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດ ຂອງຊົນຊັ້ນກໍາມະກອນ, ຊາວຜູ້ອອກແຮງງານລາວບັນດາເຜົ່າ; ພັກປະຊາຊົນ ປະຕິວັດລາວ ໄດ້ນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດປົດປ່ອຍຊາດ, ລົບລ້າງລະບອບລ່າເມືອງຂຶ້ນ, ສ້າງສັງກາດໃໝ່ໃຫ້ແກ່ປະເທດຊາດ.
ເນື້ອໃນເອກະສານວັນຄຽດແຄ້ນຂອງປະຊາຊົນລາວ ຄົບຮອບ 78 ປີ ຍົກໃຫ້ເຫັນສະພາບການ ກະກຽມການຕໍ່ສູ້ຂອງພວກລ່າເມືອງຂຶ້ນຝຣັ່ງຂອງໜ່ວຍພັກເມືອງທ່າແຂກ; ເຫດການ ແລະ ການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ ແລະ ຄວາມໝາຍຄວາມສໍາຄັນຂອງບັ້ນຮົບປ້ອງກັນຕົວເມືອງທ່າແຂກ. ທັງນີ້, ກໍເພື່ອເຮັດໃຫ້ການນໍາຫຼັກແຫຼ່ງ, ສະມາຊິກພັກ ແລະ ພະນັກງານພາຍໃນພະແນກກະສິກໍາ ແລະ ປ່າໄມ້ແຂວງ ໄດ້ຮັບຮູ້ - ເຊື່ອມຊຶມ ແລະ ເຂົ້າໃຈເຖິງບັນດາເຫດການ, ການເຄື່ອນໄຫວ ໃນແຕ່ລະໄລຍະບົນເສັ້ນທາງ ປະຕິວັດອັນລະອິດລະອ້ຽວ, ເສຍ ສະຫຼະເລືອດເນື້ອ ເພື່ອການປະຕິວັດ ພ້ອມກັນສືບຕໍ່ຮັກສາທາດແທ້ມູນເຊື້ອອັນສະຫງ່າງາມຂອງກອງທັບ, ຂອງພັກ ແລະ ມູນເຊື້ອອັນດີງາມຂອງປະທານ ຄໍາໄຕ ສີພັນດອນ ເຂົ້າໃນການຈັດຕັ້ງປະຕິບັດໜ້າທີ່ຂອງຕົນໃຫ້ມີຜົນສຳເລັດໃຫຍ່ຫຼວງກວ່າເກົ່າ.
