ວັນທີຕອນເຊົ້າ ຂອງວັນທີ 12 ມີນາ 2024, ຂົງເຂດການເມືອງແຂວງຈໍາປາສັກ ໄດ້ຈັດພິທີປາຖະກະຖາເອກະສານ 2 ວັນປະຫວັດສາດ ຄື: ເອກະສານວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (22/3/1955 – 22/3/2024) ແລະ ເອກະສານວັນຄຽດແຄ້ນຂອງປະຊາຊົນລາວ ຄົບຮອບ 78 ປີ(21/3/1946 – 21/3/2024). ພິທີຈັດຂຶ້ນຢູ່ສະໂມສອນແຂວງ ໂດຍການເຂົ້າຮ່ວມ ແລະ ບັນລະຍາຍເອກະສານຂອງ ທ່ານ ປອ.ສຸປານີ ສີລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ. ມີທ່ານ ນາງ ວາດສະໜາ ສີລິມາ ຄະນະປະຈໍາພັກແຂວງ ປະທານແນວລາວສ້າງຊາດແຂວງ ຜູ້ຊີ້ນໍາອົງການຈັດຕັ້ງມະຫາຊົນ ແລະ ສະຫະພັນນັກຮົບເກົ່າ ພ້ອມດ້ວຍການນໍາ, ສະມາຊິກພັກ ແລະ ພະນັກງານ - ລັດຖະກອນໃນຂົງເຂດການເມືອງຂອງແຂວງ ເຂົ້າຮ່ວມທັງໝົດ 140 ທ່ານ, ຍິງ 60 ທ່ານ.
ເນື້ອໃນເອກະສານວັນສ້າງຕັ້ງພັກປະຊາຊົນ ປະຕິວັດລາວ ໄດ້ຍົກໃຫ້ເຫັນການກໍາເນີດ ແລະ ຄວາມໝາຍສໍາຄັນຂອງການສ້າງຕັ້ງພັກ, ໂຄງການ ການເມືອງທໍາອິດຂອງພັກ. ຍົກໃຫ້ເຫັນໄຊຊະນະ, ໝາກຜົນ ຜົນງານ ໃນ 68 ປີ ແຫ່ງການນໍນພາ - ຊີ້ນໍາ ຂອງພັກ ໃນແຕ່ລະໄລຍະ ຄື: ໄລຍະຕໍ່ສູ້ປົດປ່ອຍຊາດ - ປະຊາທິປະໄຕເຕີບໃຫຍ່ ແລະ ມີໄຊ ແຕ່ປີ 1955 - 1975; ໄລຍະນໍາພາປົກປັກຮັກສາລະບອບໃໝ່ ແລະ ສ້າງພື້ນຖານເສດຖະກິດ - ສັງຄົມ ແຕ່ປີ 1975 - 1985; ໄລຍະນໍາພາປົກປັກຮັກສາ ແລະ ພັດທະນາປະເທດຊາດ ຕາມແນວທາງປ່ຽນແປງໃໝ່ ແຕ່ປີ 1986 - 2023. ນອກນີ້ ຍັງຍົກໃຫ້ເຫັນຜົນງານ 1 ປີ ໃນການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ຂອງແຂວງຈໍາປາສັກ ຕະຫຼອດໄລຍະແຫ່ງການປົກປັກຮັກສາ ແລະ ສ້າງສາພັດທະນາລະບອບໃໝ່ ຂອງ ສປປ ລາວ; ຍົກໃຫ້ເຫັນມູນເຊື້ອການນຳພາອັນປີຊາສາມາດ, ສະຫຼາດສ່ອງໃສ ຂອງພັກປະຊາຊົນ ປະຕິວັດລາວ ທີ່ໄດ້ນຳພາກອງທັບ ແລະ ປະຊາຊົນບັນດາເຜົ່າ ດຳເນີນການປະຕິວັດຊາດປະຊາທິປະໄຕ ແລະ ນຳພາປົກປັກຮັກສາສ້າງສາ ລະບອບໃໝ່ ແລະ ປະເທດຊາດໄດ້ຮັບການພັດທະນາຢ່າງຖືກທິດ, ມີຄວາມໝັ້ນທ່ຽງຕໍ່ເນື່ອງ - ໜັກແໜ້ນ. ພ້ອມນີ້ ຍັງຍົກໃຫ້ເຫັນວິວັດທະນາການແຫຼ່ງການກໍ່ຕັ້ງ, ປັບປຸງກໍ່ສ້າງ, ການເຕີບໃຫຍ່ຂະຫຍາຍຕົວ, ຜົນງານວິລະກຳ, ທາດແທ້ມູນເຊື້ອອັນສະຫງ່າງາມຂອງພັກ. ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂື້ນ ໃນວັນທີ 22 ມີນາ 1955 ໂດຍແມ່ນປະທານ ໄກສອນ ພົມວິຫານ ເປັນ ເລຂາທິການໃຫຍ່ຄະນະບໍລິຫານງານສູນກາງພັກ ໃນເວລານັ້ນ ພາຍຫຼັງພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂຶ້ນແລ້ວ ກໍໄດ້ແບກຫາບພາລະກິດປະຕິວັດ ອັນແສນຫຍຸ້ງຍາກລຳບາກ ເຊິ່ງເຕັມໄປດ້ວຍການທົດສອບທີ່ລະອິດລະອ້ຽວ ແລະ ການເສຍສະຫຼະອັນໃຫຍ່ຫຼວງ ແຕ່ມີກຽດອັນສູງສົ່ງ ນຳພາປວງຊົນລາວທັງຊາດ ຕໍ່ສູ້ປົດປ່ອຍປະ ເທດຊາດອອກຈາກແອກປົກຄອງຂອງຕ່າງຊາດ, ນຳເອົາຄວາມເປັນເອກະລາດ, ອິດສະຫຼະພາບ, ສິດເປັນເຈົ້າຂອງປະເທດຊາດອັນແທ້ຈິງ ມາສູ່ປະເທດຊາດ ແລະ ປະຊາຊົນບັນດາເຜົ່າ. ພັກ ແມ່ນອົງການຈັດຕັ້ງເສນາທິການທາງການເມືອງ, ເປັນກອງນໍາໜ້າ ແລະ ເປັນຕົວແທນແຫ່ງສິດຜົນປະໂຫຍດ ຂອງຊົນຊັ້ນກໍາມະກອນ, ຊາວຜູ້ອອກແຮງງານລາວບັນດາເຜົ່າ; ພັກປະຊາຊົນ ປະຕິວັດລາວ ໄດ້ນໍາພາປະຊາຊົນລາວບັນດາເຜົ່າ ເຮັດສໍາເລັດພາລະກິດປະຕິວັດປົດປ່ອຍຊາດ, ລົບລ້າງລະບອບລ່າເມືອງຂຶ້ນ, ສ້າງສັງກາດໃໝ່ໃຫ້ແກ່ປະເທດຊາດ.
ເນື້ອໃນເອກະສານວັນຄຽດແຄ້ນຂອງປະຊາຊົນລາວ ຄົບຮອບ 78 ປີ ຍົກໃຫ້ເຫັນສະພາບການ ກະກຽມການຕໍ່ສູ້ ກັບ ພວກລ່າເມືອງຂຶ້ນຝຣັ່ງ ຂອງໜ່ວຍພັກເມືອງທ່າແຂກ; ເຫດການ ແລະ ການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ ແລະ ຄວາມໝາຍຄວາມສໍາຄັນຂອງບັ້ນຮົບປ້ອງກັນຕົວເມືອງທ່າແຂກ. ທັງນີ້, ກໍເພື່ອເຮັດໃຫ້ການນໍາຫຼັກແຫຼ່ງ, ສະມາຊິກພັກ ແລະ ພະນັກງານພາຍໃນຂົງເຂດການເມືອງແຂວງ ໄດ້ຮັບຮູ້ - ເຊື່ອມຊຶມ ແລະ ເຂົ້າໃຈເຖິງບັນດາເຫດການ, ການເຄື່ອນໄຫວ ໃນແຕ່ລະໄລຍະຂອງພັກປະຊາຊົນ ປະຕິວັດລາວ ບົນເສັ້ນທາງ ປະຕິວັດອັນລະອິດລະອ້ຽວ, ເສຍ ສະຫຼະເລືອດເນື້ອ ເພື່ອການປະຕິວັດ ພ້ອມກັນສືບຕໍ່ຮັກສາທາດແທ້ມູນເຊື້ອອັນດີງາມ ແລະ ສະຫງ່າງາມຂອງພັກ ເຂົ້າໃນການຈັດຕັ້ງປະຕິບັດໜ້າທີ່ຂອງຕົນໃຫ້ມີຜົນສຳເລັດໃຫຍ່ຫຼວງກວ່າເກົ່າ.
