ໃນຕອນເຊົ້າ ຂອງວັນທີ 15 ພຶດສະພາ 2024 ຄະນະໂຄສະນາອົບຮົມແຂວງ ໂດຍເປັນເຈົ້າການຂອງຂະແຫນງໂຄສະນາປາຖະກະຖາ ໄດ້ສົມທົບກັບບັນດາອົງການໃນຂົງເຂດການເມືອງຈັດຕັ້ງພິທີ ປາຖະກະຖາເອກະສານວັນສໍາຄັນຕ່າງໆຂອງພັກ, ຂອງຊາດ ແລະ ຂອງທ່ານຜູ້ນໍາ ໃຫ້ແກ່ພະນັກງານ, ສະມາຊິກພັກໃນທົ່ວ ຂົງເຂດການເມືອງ; ພາຍໃຕ້ການໃຫ້ກຽດເປັນປະທານ ຂອງທ່ານ ປອ ສຸປານີ ສິລິປຸນໂຍ ຄະນະປະຈໍາພັກແຂວງ ຫົວຫນ້າຄະນະໂຄສະນາອົບຮົມແຂວງ.
ໂດຍມີບັນດາທ່ານຄະນະພັກ, ຄະນະພະແນກ, ຫົວຫນ້າ, ຮອງຫ້ອງການ, ຫົວຫນ້າ, ຮອງຂະແຫນງການ, ພະນັກງານ, ສະມາຊິກພັກ 12 ອົງການໃນຂົງເຂດການເມືອງ ເຊິ່ງປະກອບມີ: ຄະນະໂຄສະນາອົບຮົມແຂວງ, ຫ້ອງວ່າການແຂວງ, ຄະນະຈັດຕັ້ງແຂວງ, ຄະນະກວດກາແຂວງ, ພະແນກພາຍໃນແຂວງ, ສະຫະພັນກຳມະບານແຂວງ, ຊາວໜຸ່ມແຂວງ, ສະຫະພັນແມ່ຍິງແຂວງ, ໂຮງຮຽນການເມືອງການປົກຄອງ, ພະແນກການຕ່າງປະເທດ, ນັກຮົບເກົ່າ ແລະ ແນວລາວສ້າງຊາດແຂວງ ເຂົ້າຮ່ວມຢ່າງພ້ອມພຽງ.
ເອກະສານທີ່ນໍາມາປາຖະກະຖາ ໃນຄັ້ງນີ້ ປະກອບມີ 6 ເອກະສານຄື: ວັນເກີດທ່ານ ກາກມາກ ຄົບຮອບ 204 ປີ, ວັນໄຊຊະນະດຽນບຽນຟູ ຄົບຮອບ 68 ປີ, ວັນໄຊຊະນະໂຊຫວຽດເຫນືອຟາດຊິດເຢຍລະມັນ ໃນສົງຄາມໂລກຄັ້ງທີ II ຄົບຮອບ 77 ປີ, ຜ່າວົງປິດລ້ອມ ຂອງ ກອງພັນທີ 2 ວິລະຊົນທີ່ທົ່ງໄຫຫີນແຂວງຊຽງຂວາງ ຄົບ ຮອບ 65 ປີ, ວັນເກີດທ່ານ ໂຮ່ຈີມິນ ຄົບຮອບ 132 ປີ, ວັນວິລະກຳໂຕນຄຸກຢ່າງມະຫັດສະຈັນຂອງ ບັນດາຜູ້ນໍາຂອງພັກ ແລະ ແນວລາວຮັກຊາດ ຄົບຮອບ 64 ປີ.
ຈຸດປະສົງໃນການຈັດປາຖະກະຖາໃນຄັ້ງນີ້ ກໍ່ເພື່ອໃຫ້ຄະນະພັກ-ຄະນະນຳ ແລະ ພະນັກງານລັດຖະກອນທັງ 12 ຂົງເຂດການເມືອງ ໄດ້ຮັບຮູ້ ແລະ ເຂົ້າໃຈ ເຖິງເນື້ອໃນວັນສຳຄັນດັ່ງກ່າວເພື່ອນຳໄປໝູນໃຊ້ເຂົ້າການປະຕິບັດໜ້າທີ່ວຽກງານທີ່ຕົນຮັບຜິດຊອບ ໃຫ້ມີຜົນສຳເລັດຕາມຄາດໝາຍທີ່ວາງໄວ້.
