ໃນການປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ບັນດາສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປາສັກ ໄດ້ສະເໜີຕໍ່ລັດຖະບານໃຫ້ເລັ່ງລັດການແກ້ໄຂບັນດາບັນຫາຄົງຄ້າງ ພ້ອມທັງເລັ່ງຊຸກຍູ້ການດຳເນີນໂຄງການຂອງລັດທີ່ຍັງຊັກຊ້າ ໃຫ້ສາມາດບັນລຸຕາມເປົ້າໝາຍ.
ການປະຊຸມດັ່ງກ່າວຈັດຂຶ້ນໃນວັນທີ 6 ຕຸລາ 2026 ໂດຍມີທ່ານ ສອນໄຊ ສີພັນດອນ ກຳມະການການເມືອງສູນກາງພັກ ປະທານສະພາແຫ່ງຊາດ ເປັນປະທານ. ເຂົ້າຮ່ວມມີທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ບັນດາການນຳຂັ້ນສູງ ແລະ ອະດີດການນຳຂັ້ນສູງຂອງພັກ-ລັດ, ນາຍົກລັດຖະມົນຕີ, ບັນດາສະມາຊິກລັດຖະບານ, ສະມາຊິກສະພາແຫ່ງຊາດຈາກ 18 ເຂດເລືອກຕັ້ງທົ່ວປະເທດ ຕະຫຼອດຮອດຜູ້ຕາງໜ້າອົງການຈັດຕັ້ງຕ່າງໆ, ຄະນະທູດ, ອົງການສາກົນ, ນັກວິຊາການ, ພາກທຸລະກິດ ແລະ ແຂກຖືກເຊີນ.
ພາຍຫຼັງຮັບຟັງບົດລາຍງານຂອງລັດຖະບານ ແລະ ຄຳເຫັນຈາກຕາງໜ້າຄະນະປະຈຳສະພາແຫ່ງຊາດ, ສະມາຊິກສະພາແຫ່ງຊາດຈາກ 18 ເຂດເລືອກຕັ້ງ ໄດ້ພ້ອມກັນປະກອບຄຳເຫັນ ແລະ ສະເໜີຫຼາຍບັນຫາຕໍ່ລັດຖະບານ ເພື່ອພິຈາລະນາແກ້ໄຂ.
ໃນນັ້ນ, ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປາສັກ ໄດ້ສະແດງຄວາມເຫັນດ້ວຍຕໍ່ບົດລາຍງານຂອງລັດຖະບານ ພ້ອມທັງແລກປ່ຽນຄຳເຫັນກ່ຽວກັບບັນດາບັນຫາທີ່ຍັງຄົງຄ້າງ ແລະ ຕ້ອງການການແກ້ໄຂຢ່າງເລັ່ງດ່ວນ.
ພ້ອມນີ້, ໄດ້ສະເໜີໃຫ້ລັດຖະບານເລັ່ງຊຸກຍູ້ບັນດາກະຊວງ, ຂະແໜງການ ແລະ ອົງການປົກຄອງທ້ອງຖິ່ນ ໃຫ້ເອົາໃຈໃສ່ແກ້ໄຂອຸປະສັກ ແລະ ເລັ່ງການຈັດຕັ້ງໂຄງການຂອງລັດທີ່ຍັງດຳເນີນໄປຢ່າງຊັກຊ້າ ໃຫ້ສາມາດດຳເນີນການໄດ້ຕາມແຜນການ ແລະ ບັນລຸຜົນຕາມຄາດໝາຍ.
ສຳຄັນກວ່ານັ້ນ, ສສຊ ເຂດ 15 ໄດ້ສະເໜີໃຫ້ການຊຸກຍູ້ ແລະ ແກ້ໄຂບັນຫາຕ່າງໆ ຍຶດຖືລະບຽບ ແລະ ກົດໝາຍເປັນຫຼັກ ເພື່ອໃຫ້ການແກ້ໄຂບັນຫາມີທິດທາງຈະແຈ້ງ, ໂປ່ງໃສ ແລະ ສາມາດກວດສອບໄດ້ ພ້ອມທັງສ້າງຜົນປະໂຫຍດໃຫ້ປະຊາຊົນ ແລະ ປະເທດຊາດ.
ການສະເໜີຂອງ ສສຊ ເຂດ 15 ໃນຄັ້ງນີ້ ສະທ້ອນເຖິງບົດບາດຂອງຕົນໃນການນຳສະເໜີບັນຫາຈາກທ້ອງຖິ່ນເຂົ້າສູ່ເວທີສະພາແຫ່ງຊາດ ແລະ ຊຸກຍູ້ໃຫ້ບັນດາບັນຫາຄົງຄ້າງໄດ້ຮັບການແກ້ໄຂຢ່າງເປັນຮູບປະທຳ.
ພາບ-ຂ່າວ: ຄັດຈາກເພຈຜູ້ແທນປະຊາຊົນ