ໃນຕອນເຊົ້າ ຂອງວັນທີ 25 ກໍລະກົດ 2024 ສະຫາຍ ປອ ຄຳພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ໄດ້ເຄື່ອນໄຫວຊີ້ນຳວຽກງານຢູ່ແຂວງຈຳປາສັກ ກ່ຽວກັບການກະກຽມກອງປະຊຸມໃຫຍ່ຄັ້ງທີ XII ຂອງພັກ, ການກະກຽມກອງປະຊຸມໃຫຍ່ 3 ຂັ້ນຂອງແຂວງ ແລະ ການກະກຽມສະເຫຼີມສະຫຼອງ 3 ວັນປະຫວັດສາດ; ພິທີໄດ້ຈັດຂຶ້ນທີ່ຫ້ອງວ່າການແຂວງ ເຊິ່ງມີ ສະຫາຍ ສະນັ່ນ ສີພາພົມມະຈັນ ຮອງເລຂາພັກແຂງ ຫົວໜ້າຄະນະຈັດຕັ້ງແຂວງ, ມີ ຄະນະປະຈຳພັກແຂວງ , ບັນຄະນະພັກແຂວງ ແລະ ຂະແໜງການຕ່າງໆທີ່ກ່ຽວຂ້ອງເຂົ້າຮ່ວມ.
ໃນໂອກາດນີ້ ສະຫາຍ ປອ ສຸປານີ ສິລິປຸນໂຍ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ກ່າວຕ້ອນຮັບ ແລະ ລາຍງານໂດຍຫໍ້ຍ ກ່ຽວກັບ ຜົນສໍາເລັດທີ່ຍາດມາໄດ້ ໃນໄລຍະຜ່ານມາຂອງການຈັດຕັັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ມະຕິກອງປະຊຸມໃຫ່ຍ ຄັ້ງທີ XI ຂອງພັກ ເປັນການຢັ້ງຢືນໃຫ້ເຫັນເຖິງຄວາເປັນເຈົ້າການ ແລະ ຄວາມຮັບຜິດຊອບຕໍ່ໜ້າທີ່ການເມືອງ ໃນໄລຍະໄໝ່ ຂອງຄະນະພັກ-ອົງການປົກຄອງ ໃນແຕ່ລະຂັ້ນ, ສະມາຊິກພັກ, ພະນັກງານ-ລັດຖະກອນ, ກຳລັງປະກອບອາວຸດ ແລະ ປະຊາຊົນບັນດາເຜົ່າໃນທົ່ວແຂວງຈຳປາສັກ.
ໃນກອງປະຊຸມ ສະຫາຍ ຄໍາພັນ ເຜີຍຍະວົງ ຍັງໄດ້ກ່າວວ່າ: ການລົງມາເຮັດວຽກໃນຄັ້ງນີ້ ແມ່ນ ເພື່ອການຮັບປະກັນການກະກຽມກອງປະຊຸມໃຫ່ຍຂອງພັກ ດຳເນີນໄປຢ່າງຮອບດ້ານ, ມີເນື້ອໃນຢ່າງເລິກເຊິ່ງ ທີ່ຕິດພັນກັບການຍູ້ແຮງຂະບວນການຈັດຕັ້ງປະຕິບັດ ມະຕິກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ 5ປີ ໃນໄລຍະທ້າຍສະໄໝ ໃຫ້ ບັນລຸຕາມຄາດໝາຍທີ່ວາງໄວ້ ແລະ ຕິດພັນກັບການຂະຫຍາຍມະຕິກອງປະຊຸມໃຫ່ຍຂອງອົງຄະນະພັກ, ແຜນພັດທະນາຂອງແຕ່ລະທ້ອງຖິ່ນຕົນ ແລະ ຕິດພັນກັບສອງວາລະແຫ່ງຊາດ. ພ້ອມນັ້ນຍັງໄດ້ເຜີຍແຜ່ບັນດານິຕິກໍາຕ່າງໆ ໃຫ້ບັນດາທ່ານການນໍາຂອງແຂວງ ໄດ້ກໍາໄດ້, ເພື່ອນໍາໄປຈັດຕັ້ງປະຕິບັດ, ເຜີຍແຜ່ ແນະນໍາກ່ຽວກັບການກະກຽມຊຸກຍູ້, ແນະນໍາບົດປະກອບຄໍາເຫັນ ຂອງບັນດາຕົວແທນຈາກແຂວງ ຕໍ່ກອງປະຊຸມໃຫຍ່ ໃນຄັ້ງທີ XII ຂອງພັກ; ເວົ້າສະເພາະ ແມ່ນການກະກຽມກອງປະຊຸມໃຫຍ່ 3 ຂັ້ນ ຂອງແຂວງຈຳປາສັກ.
