ໃນວັນທີ 9 ເມສາ 2025, ໜ່ວຍພັກຮາກຖານຄະນະໂຄສະນາອົບຮົມແຂວງຈໍາປາສັກ ໄດ້ຈັດກອງປະຊຸມໃຫຍ່ ຄັ້ງທີ X ຂຶ້ນຢູ່ຫ້ອງປະຊຸມຫ້ອງການຄະນະໂຄສະນາອົບຮົມແຂວງ ໂດຍການເປັນປະທານຮ່ວມຂອງ ສະຫາຍ ປອ.ສຸປານີ ສີລິປຸນໂຍ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ສະຫາຍ ບົວສອນ ວົງຫາຈັກ ເລຂາໜ່ວຍພັກຮາກຖານຄະນະໂຄສະນາອົບຮົມແຂວງ ຄັ້ງທີ IX, ສະຫາຍ ບຸນມີ ດວງມີສີ ຮອງຫົວໜ້າຄະນະຈັດຕັ້ງແຂວງ. ມີຄະນະບຸກຄະລາກອນຂັ້ນແຂວງ, ຄະນະໜ່ວຍພັກຮາກຖານອ້ອມຂ້າງແຂວງ ແລະ ຜູ້ແທນສົມບູນພາຍໃນໜ່ວຍພັກຮາກຖານດັ່ງກ່າວເຂົ້າຮ່ວມ.
ໃນກອງປະຊຸມ, ສະຫາຍ ບົວສອນ ວົງຫາຈັກ ເລຂາໜ່ວຍພັກຮາກຖານຄະນະໂຄສະນາອົບຮົມແຂວງ ຄັ້ງທີ IX ໄດ້ກ່າວເປີດກອງປະຊຸມ ພ້ອມທັງຜ່ານບົດລາຍງານການເມືອງທັງ 2 ພາກ ໂດຍຕີລາຄາສະພາບການຈັດຕັ້ງປະຕິບັດການນໍາພາ – ຊີ້ນໍາວຽກງານຮອບດ້ານຂອງໜ່ວຍພັກຮາກຖານ ໃນໄລຍະ 5 ປີ ຜ່ານມາ (2020 – 2025) ເຊິ່ງຍົກໃຫ້ເຫັນສະພາບລວມ, ທີ່ຕັ້ງ, ພາລະບົດບາດ ແລະ ໂຄງປະກອບຂອງໜ່ວຍພັກຮາກຖານ, ສະພາບການນໍາພາຈັດຕັ້ງປະຕິບັດວຽກງານແຕ່ລະດ້ານ. ໜ່ວຍພັກຮາກຖານຄະນະໂຄສະນາອົບຮົມແຂວງ ເປັນໜ່ວຍພັກເອກະລາດໜຶ່ງ ທີ່ຢູ່ພາຍໃຕ້ການນໍາພາ – ຊີ້ນໍາໂດຍກົງຂອງອົງຄະນະພັກແຂວງ, ມີພາລະບົດບາດ, ສິດ, ໜ້າທີ່ ເປັນເສນາທິການໃຫ້ແກ່ຄະນະປະຈຳພັກແຂວງ ທາງດ້ານການເມືອງ – ແນວຄິດ, ຈັດຕັ້ງຜັນຂະຫຍາຍ, ເຊື່ອມຊຶມບັນດາມະຕິຂອງຄະນະບໍລິຫານງານສູນກາພັກ, ມະຕິຂອງຄະນະບໍລິຫານງານພັກແຂວງ, ການຕິດຕາມ, ການຊຸກຍູ້, ສັງລວມການຈັດຕັ້ງປະຕິບັດເຜີຍແຜ່, ເຊື່ອມຊຶມ ມະຕິຕ່າງໆຂອງພັກເວົ້າລວມ, ເວົ້າສະເພາະ ແມ່ນມີພາລະບົດບາດໃນການນໍາພາ – ຊີ້ນໍາ 4 ຂະແໜງການ, ສາມອົງການຈັດຕັ້ງມະຫາຊົນ ທີ່ຂຶ້ນກັບຄວາມຮັບຜິດຊອບຂອງໜ່ວຍພັກ. ພ້ອມນີ້, ຍັງຍົກໃຫ້ເຫັນການນໍາພາທາງດ້ານເສດຖະກິດ - ສັງຄົມ, ການພົວພັນ – ຮ່ວມມືກັບຕ່າງປະເທດ, ການນໍາພາແຜນພັດທະນາຂະແໜງການຂົງເຂດຕົນຮັບຜິດຊອບ ຕິດພັນກັບການຈັດຕັ້ງປະຕິບັດໜ້າທີ່ວຽກງານ ການນໍາພາວຽກງານປ້ອງກັນຊາດ - ປ້ອງກັນຄວາມສະຫງົບ ແລະ ປ້ອງກັນສໍານັກງານຮອບດ້ານ; ວຽກງານກໍ່ສ້າງພັກ - ພະນັກງານ; ວຽກງານຄຸ້ມຄອງປ້ອງກັນພັກ - ພະນັກງານ ແລະ ວຽກງານການເງິນຂອງພັກ. ປັດຈຸບັນ ມີສະມາຊິກພັກທັງໝົດ 32 ສະຫາຍ, ຍິງ 16 ສະຫາຍ, ໃນນັ້ນ ສະມາຊິກພັກສຳຮອງ 2 ສະຫາຍ(ຍິງ). ໃນກອງປະຊຸມ ຍັງໄດ້ຜ່ານທິດທາງແຜນການ ແລະ ວຽກງານຈຸດສຸມ ໃນ 5 ປີຕໍ່ໜ້າ. ຕໍ່ມາ, ຄະນະໜ່ວຍພັກຮາກຖານຊຸດເກົ່າ ກໍໄດ້ຜ່ານບົດສຳຫຼວດການນໍາພາລວມ ແລະ ກ່າວລາໜ້າທີ່.
ຈາກນັ້ນ, ຜູ້ແທນກອງປະຊຸມ ກໍໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະໜ່ວຍພັກຮາກຖານຄະນະໂຄສະນາອົບຮົມແຂວງ ຊຸດໃໝ່ ບົນພື້ນຖານຄວາມຖືກຕ້ອງ ສອດຄ່ອງກັບມາດຖານເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກເລືອກຕັ້ງທັງໝົດ 5 ສະຫາຍ, ຍິງ 1 ສະຫາຍ, ໃນນັ້ນ ເລືອກເອົາ 3 ສະຫາຍ. ຜ່ານການປ່ອນບັດຕົວຈິງ ສາມາດເລືອກໄດ້ຄະນະໜ່ວຍພັກຮາກຖານຄະນະໂຄສະນາອົບຮົມແຂວງ ຄັ້ງທີ X ຈໍານວນ 3 ສະຫາຍ, ຍິງ 1 ສະຫາຍ; ເຊິ່ງກອງປະຊຸມຄັ້ງປະຖົມມະລຶກ ເປັນເອກະສັນຢ່າງສົມບູນ ເລືອກເອົາເລຂາ, ຮອງເລຂາໜ່ວຍພັກຮາກຖານ ແລະ ປະທານກວດກາໜ່ວຍພັກຮາກຖານ ຄື:
1. ສະຫາຍ ບົວສອນ ວົງຫາຈັກ ເປັນເລຂາໜ່ວຍພັກຮາກຖານຄະນະໂຄສະນາອົບຮົມແຂວງ ສະໄໝທີ X
2.ສະຫາຍ ປອ.ວັນນະລາ ສຸດທິຈັກ ເປັນຮອງເລຂາໜ່ວຍພັກຮາກຖານ
3.ສະຫາຍ ນາງ ພອນທິບ ແກ້ວປະເສີດ ເປັນປະທານກວດກາ ໜ່ວຍພັກຮາກຖານ.
ໃນຕອນທ້າຍກອງປະຊຸມ ສະຫາຍ ປອ.ສຸປານີ ສີລິປຸນໂຍ ປະທານກອງປະຊຸມ ກໍມີຄໍາເຫັນໂອ້ລົມຊີ້ທິດເຍືອງທາງ ຕື່ມອີກ.
