ສຳເລັດກອງປະຊຸມວຽກງານເວັບໄຊທົ່ວປະເທດ ປະຈໍາໄຕມາດ III ປີ 2026
ໃນຕອນບ່າຍຂອງວັນທີ 06 ຕຸລາ 2026 ນີ້ ຄະນະໂຄສະນາອົບຮົມແຂວງຈໍາປາສັກ ເຂົ້າຮ່ວມກອງປະຊຸມ ສ່ອງແສງລາຍງານການຈັດຕັ້ງປະຕິບັດວຽກງານໂຄສະນາຜ່ານສື່ເອເລັກໂຕຮນິກ ເວັບໄຊຂອງຄະນະໂຄສະນາອົບຮົມທົ່ວປະເທດ ປະຈໍາໄຕມາດ III ປີ 2026 ໄດ້ຈັດຂຶ້ນຢ່າງເປັນທາງການ ໂດຍການເປັນປະທານຂອງທ່ານ ນາງ ອິດໄຊທອງ ສົມມະນີ ຫົວໜ້າພະແນກເຕັກໂນໂລຊີຂໍ້ມູນຂ່າວສານ, ມີບັນດາທ່ານຮອງຫົວໜ້າຄະນະໂຄສະນາອົບຮົມແຂວງ ແລະ ຜູ້ຮັບຜິດຊອບວຽກງານເວັບໄຊຂອງຄະນະໂຄສະນາອົບຮົມໃນທົ່ວປະເທດ ເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ ຈັດຂຶ້ນເພື່ອສະຫຼຸບປະເມີນຜົນການຈັດຕັ້ງປະຕິບັດວຽກງານຄຸ້ມຄອງ, ພັດທະນາ ແລະ ປັບປຸງເວັບໄຊໃນໄລຍະ 3 ເດືອນຜ່ານມາ (ໄຕມາດ III ), ພ້ອມທັງຮ່ວມກັນປຶກສາຫາລື, ແລກປ່ຽນບົດຮຽນ ແລະ ວາງທິດທາງກິດຈະກຳຈຸດໂຟກັດ ສຳລັບໄຕມາດ IV ປີ 2026 ເພື່ອຍົກລະດັບການຫັນເປັນດິຈິຕອນຂອງພາກຮັດໃຫ້ມີປະສິດທິພາບສູງຂຶ້ນ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບ:
* ຄວາມຄືບໜ້າການພັດທະນາລະບົບ: ການປັບປຸງຮູບໂສມ, ຄວາມໄວ ແລະ ຄວາມປອດໄພຂອງເວັບໄຊທາງການ ໃຫ້ສະດວກຕໍ່ການເຂົ້າເຖິງຂອງປະຊາຊົນ.
* ການສະໜອງຂໍ້ມູນ-ຂ່າວສານ: ການອັບເດດຂໍ້ມູນຂ່າວສານ, ລັດຖະບານດິຈິຕອນ ແລະ ການບໍລິການປະຊາຊົນຜ່ານຊ່ອງທາງອອນໄລນ໌ ໃຫ້ມີຄວາມຖືກຕ້ອງ, ໄວ ແລະ ໂປ່ງໃສ.
* ຄວາມປອດໄພທາງໄຊເບີ (Cybersecurity): ການເຝົ້າລະວັງ ແລະ ຮັບມືກັບຄວາມສ່ຽງທາງດ້ານຄວາມປອດໄພຂອງຂໍ້ມູນໃນລະບົບເວັບໄຊພາກຮັດ.
ໃນຕອນທ້າຍ ທ່ານປະທານກອງປະຊຸມ ໄດ້ເນັ້ນໃສ່ໃຫ້ບັນດາໜ່ວຍງານທີ່ຮັບຜິດຊອບ ເອົາໃຈໃສ່ຕື່ມໃນການຍົກລະດັບມາດຕະຖານເວັບໄຊ, ພັດທະນາບຸກຄະລາກອນດ້ານເຕັກໂນໂລຊີ, ແລະ ສົ່ງເສີມການເຊື່ອມໂຍງຂໍ້ມູນລະຫວ່າງຂະແໜງການ ເພື່ອຮັບປະກັນໃຫ້ເວັບໄຊພາກຮັດເປັນຊ່ອງທາງສື່ສານຫຼັກທີ່ທັນສະໄໝ, ເຊື່ອຖືໄດ້ ແລະ ຮັບໃຊ້ນະໂຍບາຍການຫັນເປັນເສດຖະກິດ-ສັງຄົມດິຈິຕອນຢ່າງແທ້ຈິງ.
ກອງປະຊຸມໄດ້ອັດລົງດ້ວຍຜົນສໍາເລັດຢ່າງຢ່າງຈົບງາມ ພ້ອມທັງໄດ້ຮັບຮອງເອົາທິດທາງແຜນການ ແລະ ມາດຕະການຈັດຕັ້ງປະຕິບັດໃນໄຕມາດ IV ປີ 2026 ຢ່າງເປັນຮູບປະທໍາ