ໃນຕອນເຊົ້າວັນທີ 13 ທັນວາ 2024 ທີ່ຫ້ອງປະຊຸມພະແນກກະສິກຳແລະປ່າໄມ້ແຂວງຈຳປາສັກ ໄດ້ຈັດພິທີມອບ-ຮັບທຸງໄຊນໍາໜ້າຂະບວນການ 4 ບຸກ ໃຫ້ແກ່ຄະນະຊາວໜຸ່ມປະຊາຊົນ ປະຕິວັດລາວ ຈໍານວນ 4 ໜ່ວຍຊາວໜຸ່ມຮາກຖານ ຄື: ຊາວໜຸ່ມຮາກຖາພະແນກກະສິກຳແລະປ່າໄມ້ແຂວງ, ໜ່ວຊາວໜຸ່ມຮາກຖານຄະນະໂຄສະນາອົບຮົມແຂວງ, ໜ່ວຍຊາວໜຸ່ມຮາກຖານກຳມະບານແຂວງ ແລະ ໜ່ວຍຊາວໜຸ່ມຮາກຖານບໍລິສັດລາວໂທລະຄົມ, ໂດຍການໃຫ້ກຽດເຂົ້າຮ່ວມເປັນປະທານ ແລະ ມອບທຸງໄຊນໍາໜ້າ 4 ບຸກ ຂອງສະຫາຍ ຄຳແດງ ດີວິໄຊ ຮອງເລຂາຄະນະບໍລິຫານງານຊາວໜຸ່ມ ປປລ ແຂວງຈໍາປາສັກ, ມີ ຄະນະພັກຮາກຖານພະແນກກະສິກຳແລະປ່າໄມ້ແຂວງ, ຄະນະພັກກຳມະບານແຂວງ, ຄະນະພັກໂຄສະນາອົບຮົມແຂວງ, ຄະນະພັກບໍລິສັດລາວໂທລະຄົມ, ພ້ອມນັ້ນ ຍັງມີເລຂາຊາວໜຸ່ມຮາກຖານ, ໜ່ວຍຊາວໜຸ່ມຮາກຖານ, ພ້ອມດ້ວຍສະມາຊິກຊາວໜຸ່ມເຂົ້າຮ່ວມຢ່າງພ້ອມພຽງ.
ໃນວາລະພິທີ ສະຫາຍ ວຽງວິໄລ ວໍລະຈິດ ເລຂາຊາວໜຸ່ມຮາກຖານພະແນກກະສິກຳແລະປ່າໄມ້ແຂວງ ໄດ້ຕາງໜ້າຄະນະໜ່ວຍຊາວໜຸ່ມຮາກຖານ 4 ພາກສ່ວນ ຂື້ນຜ່ານບົດສະຫຼຸບປະເມີນຜົນການປະຕິບັດຂໍ້ແຂ່ງຂັນ 4 ບຸກ, ໄລຍະ 3 ປີ ແລະ ວາງທິດທາງແຜນການຈັດຕັ້ງປະຕິບັດໃນຊຸມປີຕໍ່ໜ້າ ເປັນຕົ້ນ: ຄະນະໜ່ວຍຊາວໜຸ່ມຮາກຖານທັງ 4 ໜ່ວຍ ຍາມໃດກໍໄດ້ຍຶດຫມັ້ນໃນອຸດົມການຂອງພັກ-ລັດ ຖືເອົາ ວຽກງານການເມືອງ-ແນວຄິດຂອງພັກເປັນຫຼັກ, ເຄົາລົບລັດຖະທຳມະນູນ ແລະ ລະບຽບກົດຫມາຍຂອງລັດ, ຮັກສາວັດທະນະທຳຮີດຄອງປະເພນີອັນດີງາມຂອງຊາດ, ຖືເອົາການຝຶກຝົນຫຼໍ່ຫຼອມຄຸນສົມບັດສິນທຳປະຕິວັດ, ຖືເອົາການຕໍານິສົ່ງຂ່າວ ຊ່ວຍເຫຼືອເຊິ່ງກັນ ແລະ ກັນ ໃຫ້ມີຄວາມປອດໃສຂາວສະອາດໃນການດໍາລົງຊີວິດຂອງຕົນ, ເຊິ່ງຜ່ານການເຄື່ອນໄຫວຕົວຈິງເຫັນໄດ້ວ່າ ສະມາຊິກຊາວໜຸ່ມທຸກສະຫາຍ ໄດ້ມີແນວຄິດຮັກຊາດຮັກລະບອບໃຫມ່, ຮັກບ້ານເກີດເມືອງນອນ ມີຄວາມເຊື່ອຫມັ້ນຕໍ່ການນໍາພາຂອງພັກ-ລັດ ຢ່າງຕາຍໃຈ ແລະ ໃນວາລະພິທີຕໍ່ມາ ສະຫາຍນາງ ອອ້ຍໃຈ ໄຊມົນຕີ ຫົວໜ້າຂະແໜງຈັດຕັ້ງ-ກວດກາ ຊາວໜຸ່ມແຂວງ ໄດ້ຂື້ນຜ່ານຂໍ້ຕົກລົງວ່າດ້ວຍການອະນຸມັດທຸງໄຊນຳໜ້າໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ໃຫ້ຄະນະຊາວໜຸ່ມຮາກຖານ 4 ໜ່ວຍຮາກຖານ ທີ່ມີຜົນງານການເຄື່ອນໄຫວພົ້ນເດັ່ນໃນສະໄໜທີ VIII (2020-2024).
