ເມືອງປະທຸມພອນ ຈັດພິທີປິດຊຸດຝຶກອົບຮົມ ທິດສະດີການເມືອງ-ແນວທາງຂອງພັກ ໄລຍະສັ້ນ 15 ວັນ ຮຸ່ນທີ II ໄດ້ຈັດຂຶ້ນ ໃນເຊົ້າວັນທີ 7 ສິງຫາ 2025 ຢູ່ທີ່ສະໂມສອນຂອງເມືອງ, ໂດຍການເປັນກຽດເຂົ້າຮ່ວມເປັນປະທານ ຂອງສະຫາຍ ສົມຈິດ ແພງສະຫວັດ ເລຂາຄະນະບໍລິຫານງານພັກເມືອງປະທຸມພອນ, ມີ ສະຫາຍ ສີທະນົນໄຊ ສີສະຫວ່າງວົງ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ, ມີບັນດາຄະນະຮັບຜິດຊອບຂັ້ນແຂວງ- ເມືອງ ,ແຂກທີ່ຖືກເຊີນ, ຄູອາຈານ ແລະ ບັນດານັກສຳມະນາກອນເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ສີທະນົນໄຊ ສີສະຫວ່າງວົງ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ ໃຫ້ຮູ້ວ່າ: ຊຸດຝຶກອົບຮົມທິດສະດີ-ແນວທາງຂອງພັກ ໃນຄັ້ງນີ້ໄດ້ຈັດຂຶ້ນແຕ່ວັນທີ 7 ກໍລະກົດ 2025 – 1 ສິງຫາ 2025 ມີນັກຝຶກອົບຮົມທັງໝົດ 105 ສະຫາຍ, ຍິງ 49 ສະຫາຍ, ແມ່ນໄດ້ສຳເລັດຕາມແຜນການທີ່ວາງໄວ້ ເຊິ່ງຜ່ານການຝຶກອົບຮົມຕົວຈິງເຫັນໄດ້ຄຸນນະພາບຄວາມຮັບຮູ້ຂອງນັກສຳມະນາກອນ ເຊີ່ງເປັນເຈົ້າການຄົ້ນຄວ້າແລກປ່ຽນຄຳຄິດຄຳເຫັນ ແລະ ສົມທົບກັບການສ້າງກິດຈະກຳເຮັດໃຫ້ການຝຶກອົບຮົມສາມາດບັນລຸຄາດຕາມແຜນ. ສະແດງອອກ ການຂຶ້ນຫ້ອງສອນຂອງຄູ-ອາຈານປະເມີນໄດ້ດີຫຼາຍ 95%, ຄວາມເຂົ້າໃຈຂອງນັກສຳມະນາກອນປະເມີນໄດ້ດີຫຼາຍ 95%.
ໂອກາດດັ່ງກ່າວນີ້ ສະຫາຍ ສົມຈິດ ແພງສະຫວັດ ເລຂາຄະນະບໍລິຫານງານພັກ ເມືອງປະທຸມພອນ ກໍ່ໄດ້ມີຄຳເຫັນຕໍ່ຜົນສຳເລັດຂອງການຝຶກອົບຮົມ ເຊິ່ງສະຫາຍ ໄດ້ກ່າວສະແດງຄວາມຊົມເຊີຍຕໍ່ຄະນະຮັບຜິດຊອບກໍ່ຄືອາຈານ ແລະ ນັກສຳມະນາກອນ ທີ່ເປັນເຈົ້າການຮຽນຮູ້ບົດຮຽນອັນໃໝ່ທາງດ້ານທິດສະດີ-ແນວທາງທີ່ມີຄວາມສຳຄັນ ແລະ ຈຳເປັນໃນສະພາບການປະຕິບັດວຽກງານ; ພ້ອມນີ້, ສະຫາຍຍັງໄດ້ຮຽກຮ້ອງມາຍັງນັກສຳມະນາກອນຈົ່ງສືບຕໍ່ສຶກສາຄົ້ນຄວ້າແນວທາງ ນະໂຍບາຍຂອງພັກ, ລະບຽບກົດໝາຍຂອງລັດໃຫ້ເລິກເຊິ່ງ, ເປັນແບບຢ່າງທີ່ດີໃນການປະຕິບັດໜ້າທີ່ວຽກງານ, ນຳໃຊ້ຄວາມຮູ້ພື້ນຖານທາງດ້ານ-ແນວທາງ ໝູນໃຊ້ເຂົ້າສູ່ການຈັດຕັ້ງປະຕິບັດວຽກງານຢູ່ກົມກອງ ແລະ ຂັ້ນຮາກຖານບ້ານໃຫ້ມີຜົນສໍາເລັດຂຶ້ນກວ່າເກົ່າ.
ໃນຕອນທ້າຍ ກໍ່ໄດ້ມີພິທີມອບໃບຢັ້ງຢືນໃຫ້ແກ່ບັນດານັກສຳມະນາກອນເພື່ອເປັນການຢັ້ງຢືນເຖິງຜົນສໍາເລັດການຝຶກອົບຮົມຄັ້ງນີ້
