ໃນຕອນເຊົ້າຂອງວັນທີ 29 ກໍລະກົດ 2024 ພະແນກພະລັງງານ ແລະ ບໍ່ແຮ່ແຂວງຈຳປາສັກໄດ້ຈັດຕັ້ງເຜີຍແຜ່ເຊື່ອມຊືມ ແລະ ຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ XI ວ່າດ້ວຍການ ສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ເຊິ່ງໄດ້ຈັດຂື້ນຢູ່ທີ່ຫ້ອງປະຊຸມ ໄຟ້ຟ້າລາວຊັ້ນ 6. ໂດຍເປັນປະທານຂອງສະຫາຍ ປອ ສຸປານີ ສິລິປຸນໂຍ ຄະນະປະຈຳພັກແຂວງຫົວໜ້າຄະນະໂຄສະນາອົບຮົມແຂວງ ເຂົ້າຮ່ວມມີເລຂາ,ຮອງເລຂາຄະນະພັກຮາກຖານ,ເລຂາໜ່ວຍພັກ,ຮອງເລຂາໜ່ວຍພັກທີ່ຂື້ນກັບຄະນະພັກຮາກຖານທັງໝົດ 8 ໜ່ວຍ, ມີຈຳນວນພົນເຂົ້າຮ່ວມທັງໝົດ 69 ສະຫາຍ/ຍິງ 18 ສະຫາຍ.
ໃນໂອກາດນີ້ສະຫາຍ ປອ ສຸປານີ ສິລິປຸນໂຍ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ກໍ່ໃຫ້ກຽດຂື້ນເຜີຍແຜ່ເອກະສານສູນກາງພັກ ແລະ ລັດຖະບານເຊິ່ງປະກອບມີ:
1. ມະຕິກອງປະຊຸມຄົບຄະນະຄັ້ງທີ 8 ຂອງຄະນະບໍລິຫານງານສູນກາງພັກສະໄໝທີ XI;
2. ມະຕິຂອງກົມການເມືອງສູນກາງພັກສະບັບເລກທີ 04 /ກມສພ ວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງໃນໄລຍະໃໝ່.
3. ມະຕິຂອງລັດຖະບານສະບັບເລກທີ 05 /ລບ ວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງປະຕິບັດວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ການຜັນຂະຫຍາຍມະຕິຂອງສູນກາງພັກ-ລັດຖະບານມາເປັນຂອງອົງຄະນະພັກ-ອົງການປົກຄອງແຂວງ.
ຈາກນັ້ນ ສະຫາຍ ກໍ່ຍັງໄດ້ຕີລາສູງຄວາມໝາຍຄວາມສຳຄັນ ຂອງບັນດາມະຕິທີ່ເຜີຍແຜ່, ເພື່ອໃຫ້ພະນັກງານ ໃນພະແນກພະລັງງານ ແລະ ບໍ່ແຮ່ແຂວງຈຳປາສັກໄດ້ຮັບຮູ້ເຂົ້າໃຈ ແລະ ກຳໄດ້ເນື້ອໃນຢ່າງເລິກເຊິ່ງ, ພ້ອມກັນນຳໄປສຶບຕໍ່ຜັນຂະຫຍາຍ ແລະ ຈັດຕັ້ງປະຕິບັດໃຫ້ໄດ້ຜົນດີ.
