ວັນທີ 23 ສິງຫາ 2026 – ປະຊາຊົນຜູ້ໄດ້ຮັບຜົນກະທົບຈາກໄພພິບັດນ້ຳຖ້ວມ ຢູ່ຕາແສງມ່ວງ ເມືອງປະທຸມພອນ ແຂວງຈຳປາສັກ ໄດ້ຮັບການຊ່ວຍເຫຼືອໃນເບື້ອງຕົ້ນແລ້ວ ຫຼັງຈາກ ບໍລິສັດ ດັກລັກ ດັບເບີ ຈຳກັດ ນຳເອົາເຄື່ອງອຸປະໂພກ-ບໍລິໂພກ ແລະ ເຂົ້າສານ,ອາຫານແຫ້ງ ລົງພື້ນທີ່ມອບໃຫ້ເຖິງມືປະຊາຊົນຢ່າງ ວ່ອງໄວ ເພື່ອແບ່ງເບົາຄວາມລຳບາກໃນຍາມວິກິດ.
ພິທີມອບ-ຮັບເຄື່ອງຊ່ວຍເຫຼືອຄັ້ງນີ້ ໄດ້ຈັດຂຶ້ນຢູ່ 2 ຈຸດສຳຄັນ ຄື: ວັດຕາແສງມ່ວງ ແລະ ວັດບ້ານນ້ຳໃສ ໂດຍໄດ້ຮັບກຽດເຂົ້າຮ່ວມຂອງ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ຜູ້ຊີ້ນຳວຽກງານຮອບດ້ານເມືອງປະທຸມພອນ, ທ່ານ ກິ່ງແກ້ວ ນະວະພົມ ປະທານຄະນະກຳມະການປົກຄອງເມືອງ, ພ້ອມດ້ວຍການນຳຂັ້ນຕາແສງ, ນາຍບ້ານ ແລະ ປະຊາຊົນທີ່ໄດ້ຮັບຜົນກະທົບເຂົ້າຮ່ວມ.
ການມອບເຄື່ອງຊ່ວຍເຫຼືອໃນຄັ້ງນີ້ ເປັນການຜັນຂະຫຍາຍການປຸກລະດົມຢ່າງຕັ້ງໜ້າຂອງຄະນະນຳແຂວງຈຳປາສັກ ແລະ ອຳນາດການປົກຄອງເມືອງ. ທ່ານ ໂດ໋ທ້ຽນເຫງຍ ອຳນວຍການບໍລິສັດ ດັກລັກ ດັບເບີ ຈຳກັດ ໄດ້ກ່າວດ້ວຍຄວາມເຫັນອົກເຫັນໃຈວ່າ: “ເຄື່ອງທີ່ນຳມາມອບໃນມື້ນີ້ ອາດຈະມີຈຳນວນບໍ່ຫຼາຍ, ແຕ່ຄືນ້ຳໃຈ ແລະ ຄວາມຫ່ວງໃຍຢ່າງຈິງໃຈຈາກບໍລິສັດ ເພື່ອຫວັງແບ່ງເບົາຄວາມ ລຳບາກ ແລະ ເປັນກຳລັງໃຈໃຫ້ພໍ່ແມ່ປະຊາຊົນກ້າວຂ້າມຜ່ານໄລຍະເວລາວິກິດນີ້ໄປ ດ້ວຍກັນ.”
ດ້ານ ທ່ານ ກິງແກ້ວ ນະວະພົມ ໃນນາມຕາງໜ້າອຳນາດການປົກຄອງ ແລະ ປະຊາຊົນຜູ້ໄດ້ຮັບຜົນກະທົບທັງສອງຈຸດ, ໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງຈິງໃຈ ຕໍ່ຄະນະນຳທຸກຂັ້ນ ພ້ອມດ້ວຍບໍລິສັດ ດັກລັກ ດັບເບີ ຈຳກັດ ທີ່ຍາມໃດກໍບໍ່ເຄີຍປະຖິ້ມປະຊາຊົນ, ສະແດງໃຫ້ເຫັນເຖິງ ມູນເຊື້ອຄວາມສາມັກຄີ ແລະ ການຮ່ວມມືຮອບດ້ານ ທີ່ບໍລິສັດມີຕໍ່ອຳນາດການປົກຄອງເມືອງ ແລະ ຊ່ວຍເຫຼືອກັນໃນຍາມ ໄພພິບັດຢ່າງແທ້ຈິງ.
ຂ່າວ-ພາບ: ນາງ ພິລາວັນ ເພັງສະຫວັດ.