ທ່ານ ປະດິດ ວັນນະລັດສະໝີ ຕ້ອນຮັບຄະນະຜູ້ແທນສະຫະພັນແຮງງານນະຄອນໂຮຈິມິນ

ວັນທີ 7 ກັນຍາ 2026, ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງຈໍາປາສັກ ສປປ ລາວ ໄດ້ຕາງໜ້າການນໍາແຂວງ ຕ້ອນຮັບຄະນະຜູ້ແທນສະຫະພັນແຮງງານນະຄອນໂຮຈິມິນ ສສ ຫວຽດນາມນໍາໂດຍ ທ່ານ ດັ້ງ ຈູງ ຢຸງ ກຳມະການຄະນະບໍລິຫານງານໃຫຍ່ສະຫະພັນແຮງງານຫວຽດນາມ ຮອງປະທານສະຫະພັນແຮງງານ ນະຄອນໂຮຈິມິນ ໃນໂອກາດທີ່ເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ແຕ່ວັນທີ 6- 10 ກັນຍາ 2026. ມີທ່ານ ອຸດົມສັກ ດີວິໄຊ ກໍາມະການພັກແຂວງ ກໍາມະການຄະນະບໍລິຫານງານສູນກາງສະຫະພັນກໍາມະບານລາວ ປະທານສະຫະພັນກໍາມະບານແຂວງຈໍາປາສັກ ພ້ອມດ້ວຍການນໍາທັງສອງຝ່າຍ ເຂົ້າຮ່ວມ.
#ໂອກາດນີ້, ທ່ານ ປະດິດ ວັນນະລັດສະໝີ ໄດ້ແຈ້ງກ່ຽວກັບສະພາບຈຸດພິເສດ, ທ່າແຮງບົ່ມຊ້ອນ, ການນໍາພາ - ຊີ້ນໍາວຽກງານແຕ່ລະດ້ານຂອງຄະນະພັກ - ອົງການປົກຄອງແຂວງໃນໄລຍະ 9 ເດືອນ ປີ 2026 ຜ່ານມາ ໂດຍຍົກໃຫ້ເຫັນການນໍາພາ - ຊີ້ນໍາວຽກງານພັກ - ພະນັກງານ, ວຽກງານປ້ອງກັນຊາດ - ປ້ອງກັນຄວາມສະຫງົບ, ການພັດທະນາເສດຖະກິດ, ວຽກງານວັດທະນະທຳ - ສັງຄົມ, ວຽກງານການພົວພັນຮ່ວມມືກັບຕ່າງປະເທດ, ການຄຸ້ມຄອງ - ພັດທະນາສີມືແຮງງານ ແລະ ສະພາບການລົງທຶນຂອງຕ່າງປະເທດ ຢູ່ແຂວງຈໍາປາສັກ. ສໍາລັບການລົງທຶນຂອງນັກທຸລະກິດຈາກ ສສ ຫວຽດນາມ ຢູ່ແຂວງຈໍາປາສັກ ແມ່ນຢູ່ໃນແຖວໜ້າຂອງລົງທຶນຈາກຕ່າງປະເທດ ເຊິ່ງໄດ້ປະກອບສ່ວນໃນການພັດທະນາເສດຖະກິດ - ສັງຄົມ, ຊ່ວຍສ້າງໃຫ້ແກ່ປະຊາຊົນແຂວງຈໍາປາສັກ ມີວຽກເຮັດງານທໍາ. ພ້ອມນີ້, ທ່ານ ຍັງມີຄໍາເຫັນ ໃຫ້ສະຫະພັນແຮງງານນະຄອນໂຮຈິມິນ ພົວພັນປະສານສົມທົບກັບ ສະຫະພັນກໍາມະບານແຂວງຈໍາປາສັກ ເພື່່ອຮ່ວມມື ແລະ ຊ່ວຍເຫຼືອເຊິ່ງກັນ ແລະ ກັນໃນຕໍ່ໜ້າ.
#ຕໍ່ມາ, ທ່ານ ດັ້ງ ຈູງ ຢຸງ ກຳມະການຄະນະບໍລິຫານງານໃຫຍ່ສະຫະພັນແຮງງານຫວຽດນາມ ຮອງປະທານສະຫະພັນແຮງງານ ນະຄອນໂຮຈິມິນ ກໍໄດ້ມີຄໍາເຫັນ ໂດຍສະແດງຄວາມຂອບໃຈສໍາລັບການຕ້ອນຮັບອັນອົບອຸ່ນຂອງການນໍາແຂວງຈໍາປາສັກ ພ້ອມທັງແຈ້ງຈຸດປະສົງໃນການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ໃນຄັ້ງນີ້. ຈາກນັ້ນ, ກໍໄດ້ລາຍງານພາລະບົດບາດ, ສິດ - ໜ້າທີ່ ແລະ ສະພາບການເຄື່ອນໄຫວວຽກງານຂອງສະຫະພັນແຮງງານ ນະຄອນໂຮຈິມິນ ໃຫ້ການນໍາແຂວງຈໍາປາສັກ ຮັບຊາບ ໂດຍຍົກໃຫ້ເຫັນການນໍາໃຊ້ລະບົບເຕັກໂນໂລຊີທີ່ທັນສະໄໝເຂົ້າໃນການຊີ້ນໍາ - ບັນຊາ, ການຄຸ້ມຄອງພະນັກງານ - ລັດຖະກອນ ແລະ ກໍາມະກອນ ຢູ່ຕາມໂຮງຈັກໂຮງງານຕ່າງໆພາຍໃນນະຄອນໂຮ່ຈີມິນ. ສໍາລັບການພົວພັນຮ່ວມມືກັບ ສະຫະພັນກໍາມະບານແຂວງຈໍາປາສັກ ທີ່ທ່ານ ປະດິດ ວັນນະລັດສະໝີ ມີຄໍາເຫັນ ແມ່ນໄດ້ເຊັນບົດບັນທຶກການຮ່ວມມືນໍາກັນແລ້ວ ມີແຕ່ຈະສືບຕໍ່ຈັດຕັ້ງຜັນຂະຫຍາຍການຮ່ວມມື ໃຫ້ເຂົ້າສູ່ລວງ ແລະ ເປັນຮູບພະທໍາຍິ່ງຂື້ນ.