ໃນຕອນເຊົ້າຂອງວັນ 04 ກັນຍາ 2025 ຄະນະໂຄສະນາອົບຮົມແຂວງຈໍາປາສັກ ເຊິ່ງນໍາໂດຍ ທ່ານ ບົວສອນ ວົງຫາຈັກ ຮອງຫົວໜ້າຄະນະໂຄສະນາອົບຮົມແຂວງ ພ້ອມດ້ວຍພະນັກງານຂະແໜງຂໍ້ມູນຂ່າວສານ ເຂົ້າຮ່ວມກອງປະຊຸມສ່ອງແສງລາຍງານການເຄື່ອນໄຫວວຽກງານເວັບໄຊ ຄະນະໂຄສະນາອົບຮົມແຂວງທົ່ວປະເທດ ປະຈຳໄຕມາດ III(7-8-9) ປີ 2025 ຜ່ານລະບົບກອງປະຊຸມທາງໄກ Video conference.
ພາຍໃຕ້ການເປັນປະທານຂອງ ທ່ານ ວັນຕຸລາ ຮັກນຸດ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ ຄະນະໂຄສະນາອົບຮົມສູນກາງພັກ, ມີພະນັກງານນໍາພາຂອງກົມຂໍ້ມູນ, ກົມຈັດຕັ້ງ-ພະນັກງານ, ບັນດາທ່ານຮອງຫົວໜ້າ ຜູ້ຊີ້ນໍາວຽກງານເວັບໄຊ ພ້ອມແອັດມິນຄະນະໂຄສະນາອົບຮົມແຂວງ ທົ່ວປະເທດ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງການສ່ອງແສງລາຍງານໂດຍຫຍໍ້ ສະພາບຂໍ້ສະດວກ ແລະ ຂໍ້ຫຍຸ້ງຍາກ ໃນການເຄື່ອນໄຫວວຽກງານເວັບໄຊ ພາຍຫຼັງປະກາດວຽກງານຖະແຫຼງຂ່າວ ມາຂຶ້ນກັບຄະນະໂຄສະນາອົບຮົມແຂວງ ພ້ອມທັງການກຳນົດທິດທາງການຈັດຕັ້ງປະຕິບັດວຽກງານປະຈຳໄຕມາດ IV (10-11-12)/2025. ເຊິ່ງ ທ່ານ ບົວສອນ ວົງຫາຈັກ ຮອງຫົວໜ້າຄະນະໂຄສະນາອົບຮົມແຂວງຈໍາປາສັກ ໄດ້ລາຍງານສະພາບການໃນແຕ່ລະດ້ານວ່າ:
# ສະພາບລວມ: ວຽກງານຖະແຫຼງຂ່າວທີ່ໂອນມາຂຶ້ນກັບຄະນະໂຄສະນາອົບຮົມແຂວງຈໍາປາສັກ ລວມມີ 3 ພາກສ່ວນ ຄື: ຂະແໜງຖະແຫຼງຂ່າວ, ສື່ສິ່ງພິມ ແລະ ກອງວິທະຍຸ-ໂທລະພາບ ລວມມີພະນັກງານທັງໝົດທີ່ໂອນມາ 65 ທ່ານ ຍິງ 31 ທ່ານ; ໃນນັ້ນມີສະມາຊິກພັກ 54 ສະຫາຍ, ຍິງ 21 ສະຫາຍ.
#ຂໍ້ສະດວກ: ພາຍຫຼັງທີ່ໄດ້ປະກາດໂອນວຽກງານຖະແຫຼງຂ່າວ (ສື່ມວນຊົນ) ມາຂຶ້ນກັບຄະນະໂຄສະນາອົບ ຮົມແຂວງພວກເຮົາແລ້ວ ແຕ່ປັດຈຸບັນນີ້ຍັງບໍ່ທັນມີມະຕິຕົກລົງຂອງຄະນະປະຈໍາພັກແຂວງ ເຊິ່ງຢູ່ໃນໄລຍະນີ້ແມ່ນລໍຖ້າກໍຕາມ ແຕ່ການຈັດຕັັ້ງປະຕິບັດວຽກງານໂຄສະນາຜ່ານສື່ເອເລັກໂຕຣນິກ (ເວັບໄຊ໋) ແມ່ນຍັງເຄື່ອນໄຫວປົກກະຕິ ໂດຍແມ່ນຄວາມຮັບຜິດຊອບຂອງຂະ ແໜງການສະເພາະ ກໍຄື ຂະແໜງຂໍ້ມູນໃນຂ່າວສານ, ພະນັກງານພາຍໃນຂະແໜງ ເປັນຜູ້ຮັບຜິດ ຊອບ(ເວັບໄຊ) ເຊິ່ງໄດ້ເອົາໃຈໃສ່ເກັບກໍາ ແລະຂຽນຂ່າວການເຄື່ອນໄຫວວຽກງານການເມືອງ-ແນວຄິດ ກໍຄືວຽກງານໂຄສະນາອົບຮົມໃນທົົ່ວແຂວງ ປ້ອນລົງເວັບໄຊ໋ຢ່າງຕໍ່ເນື່ອງ ເຊິ່ງໃນໄຕມາດທີ III ສາມາດປະຕິບັດໄດ້ 38 ຂ່າວ; ດ້ານອຸປະກອນ ແລະ ດ້ານເຕັກນິກ ນໍາໃຊ້ໄດ້ຢ່າງເປັນປົກກະຕິ.
ການເກັບກໍາຂ່າວ ພາຍຫຼັງປະກາດວຽກງານຖະແຫຼງຂ່າວມາຂຶ້ນກັບໂຄສະນາອົບຮົມ ຄາດວ່າວຽກງານດັ່ງກ່າວນີ້ ຈະມີຄວາມສະດວກວ່ອງໄວ ແລະ ມີປະສິດທິຜົນດີກວ່າເກົ່າ ຍ້ອນວ່າມີການປະສານສົມທົບທີ່ໃກ້ຊິດ, ມີບຸກຄະລາກອນ ແລະ ເຄື່ອງມືຮັບໃຊ້ເຂົ້າໃນວຽກງານຄົບຖ້ວນກວ່າເກົ່າ, ການຮ່ວມມືລະຫວ່າງຂະແໜງຂໍ້ມູນຂ່າວສານ (ຜູ້ຮັບຜິດຊອບເວັບໄຊ) ກັບຂະແໜງ ຖະແຫຼງຂ່າວ(ສື່ມວນຊົນ) ມີຄວາມກົມກຽວໃນການເກັບກໍາຂ່າວ-ພາບ ແລະ ການແລກປ່ຽນຂໍ້ມູນຂ່າວສານຕ່າງໆ ໂດຍມີການນໍາພາ-ຊີ້ນໍາຂອງທ່ານຫົວໜ້າຄະນະໂຄສະນາອົບຮົມແຂວງ.
# ຂໍ້ຫຍຸ້ງຍາກ: ເຫັນວ່າຍັງບໍ່ມີຄວາມຫຍຸ້ງຍາກສັບສົນໃນການຈັດຕັ້ງປະຕິບັດ ຍ້ອນວ່າຄວາມຮັບຜິດຊອບຍັງແມ່ນຂອງຂະແໜງການວິຊາສະເພາະ, ບຸກຄະລາກອນຍັງແມ່ນຜູ້ຮັບຜິດຊອບຜູ້ເກົ່າບໍ່ທັນມີການປັບປຸງສັບຊ້ອນ, ການເຄື່ອນໄຫວແມ່ນປະຕິບັດຕາມພາລະບົດບາດຂອງໃຜລາວ.
# ທິດທາງແຜນການໃນຕໍ່ໜ້າ: ພາຍຫຼັງໂອນວຽກງານສື່ມາຂຶ້ນກັບຄະນະໂຄສະນາອົບຮົມແຂວງແລ້ວ ຈະໄດ້ສືບຕໍ່ວຽກງານດັ່ງນີ້:
– ສືບຕໍ່ເກັບກໍາຂ່າວ-ຂຽນຂ່າວ ການເຄື່ອນໄຫວວຽກງານໂຄສະນາອົບຮົມໃນທົົ່ວແຂວງ ປ້ອນລົງເວັບໄຊ ຢ່າງເປັນປົກກະຕິຕໍ່ເນື່ອງ.
– ດ້ານຂໍ້ມູນເວັບໄຊ ພາຍຫຼັງປັບປຸງກົງຈັກການຈັດຕັ້ງ ແລະ ກໍານົດພາລະບົດບາດເຊັດເຈນ ຈຶ່ງຈະໄດ້ອັບລົງເວັບໄຊໃຫ້ສົມບູນ.
– ດ້ານບຸກຄະລາກອນ ຈະໄດ້ມີການປັບປຸງສັບຊ້ອນພະນັກງານວິຊາສະເພາະທີ່ມີຄວາມຊໍານິຊໍານານກ່ຽວກັບວຽກງານເວັບໄຊ ທີ່ໂອນມາເຂົ້າໃສ່ໃຫ້ສອດຄ່ອງ ຖືກກັບວິຊາສະເພາະຕື່ມອີກ ເພື່ອເຮັດໃຫ້ວຽກງານຂໍ້ມູນຂ່າວສານຂອງພວກເຮົາມີຄວາມເຄື່ອນໄຫວດີຂຶ້ນກວ່າເກົ່າ.
ຈາກນັ້ນ ກອງປະຊຸມຍັງໄດ້ຮັບຟັງການມີຄໍາເຫັນຂອງທ່ານຫົວໜ້າກົມຈັດຕັ້ງ-ພະນັກງານ ກ່ຽວກັບທິດທາງໃນການປັບປຸງກົງຈັກການຈັດຕັ້ງ ແລະພາລະບົດບາດຂອງຄະນະໂຄສະນາອົບຮົມແຂວງ ພາຍຫຼັງໂອນວຽກງານສື່ມາຂຶ້ນກັບ ໃຫ້ມີຄວາຍຖືກຕ້ອງ ແລະເປັນເອກະພາບໃນທົ່ວປະເທດ.
ໃນຕອນທ້າຍ, ທ່ານ ວັນຕຸລາ ຮັກນຸດ ຫົວໜ້າກົມຂໍ້ມູນຂ່າວສານ ແລະຝຶກອົບຮົມ ປະທານກອງປະຊຸມ ກໍາໄດ້ມີຄໍາເຫັນຊີ້ນໍາໃນການຈັດຕັ້ງວຽກງານເວັບໄຊໃນຕໍ່ໜ້າ ເຊິ່ງທ່ານໄດ້ເນັ້ນບາງບັນຫາດັ່ງນີ້: ເອົາໃຈໃສປັບປຸງກົງຈັກການຈັດຕັ້ງແລະກຳນົດພາລະບົດບາດຂອງຄະນະໂຄສະນາອົບຮົມແຂວງໃຫ້ຖືກຕ້ອງຊັດເຈນ, ປັບປຸງສັບຊ້ອມພະນັກງານຜູ້ທີ່ມີຄວາມສາມາດດ້ານເຕັກໂນໂລຊີຈາກຖະແຫຼງຂ່າວເຂົ້າໃສ່ວຽກງານຂໍ້ມູນຂ່າວສານ ກໍຄືວຽກງານເວັບໄຊ ເຮັດໃຫ້ວຽກງານເຄື່ອນໄຫວຢ່າງມີປະສິດທິຜົນສູງຂຶ້ນ ກ້າວໄປສູ່ການຫັນເປັນທັນສະໄໝເທື່ອລະກ້າວ; ເອົາໃຈໃສ່ເຄື່ອນໄຫວສຶກສາອົບຮົມການເມືອງ-ແນວຄິດໃຫ້ແກ່ພະນັກງານທີ່ຢູ່ໃນຄວາມຮັບຜິດຊອບຂອງຕົນ ໃຫ້ມີຄວາຍຮັບຮູ້ເຂົ້າໃຈ ແລະ ທຸ່ນທ່ຽງຕໍ່ທິດທາງການປັບປຸງກົງຈັກການຈັດຕັ້ງຂອງຂັ້ນເທິງ.
