ນະຄອນປາກເຊ ກຽມເປັນເຈົ້າພາບ ເວທີປຶກສາຫາລືເສດຖະກິດລະດັບພາກພື້ນ ເພື່ອຊຸກຍູ້ການເຊື່ອມຕໍ່ແນວທາງ EWEC 2026 ໂດຍການຮ່ວມມືຮອບດ້ານ ລະຫວ່າງ ລາວ-ຫວຽດນາມ
ເພື່ອສືບຕໍ່ຜັນຂະຫຍາຍສາຍພົວພັນມິດຕະພາບອັນຍິ່ງໃຫຍ່ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃຫ້ເຂົ້າສູ່ລວງເລິກ, ໃນວັນທີ 3 ເມສາ 2026 ນີ້, ຢູ່ທີ່ນະຄອນປາກເຊ ແຂວງຈຳປາສັກ ຈະມີພິທີເປີດ “ກອງປະຊຸມເວທີປຶກສາຫາລືການຮ່ວມມືດ້ານການລົງທຶນ, ການຄ້າ ແລະ ການທ່ອງທ່ຽວ ເພື່ອຊຸກຍູ້ການເຊື່ອມຕໍ່ແນວທາງເສດຖະກິດ ຕາເວັນອອກ-ຕາເວັນຕົກ (EWEC) 2026” ຢ່າງເປັນທາງການ.
ເຫດການເສດຖະກິດທີ່ພົ້ນເດັ່ນໃນຄັ້ງນີ້ ແມ່ນການຮ່ວມມືກັນລະຫວ່າງ ຄະນະກຳມະການປະຊາຊົນນະຄອນດານັງ (ສສ ຫວຽດນາມ), ສະຖານກົງສຸນໃຫຍ່ ແຫ່ງ ສສ ຫວຽດນາມ ປະຈຳ ປາກເຊ ແລະ ອົງການປົກຄອງແຂວງຈຳປາສັກ (ສປປ ລາວ) ເພື່ອແນໃສ່ເປີດກວ້າງກາລະໂອກາດການຮ່ວມມື ໃຫ້ແກ່ບັນດາທ້ອງຖິ່ນໃນທົ່ວແນວທາງເສດຖະກິດ EWEC.
ການລວມຕົວຂອງບັນດາຜູ້ນຳ ແລະ ນັກທຸລະກິດກວ່າ 400 ທ່ານ. ກອງປະຊຸມຄັ້ງນີ້ ຄາດວ່າຈະດຶງດູດຄະນະຜູ້ແທນເຂົ້າຮ່ວມປະມານ 400 ທ່ານ ຈາກບັນດາກະຊວງ, ຂະແໜງການຂັ້ນສູນກາງຂອງສອງປະເທດ, ລວມທັງຜູ້ຕາງໜ້າຈາກ 12 ທ້ອງຖິ່ນຂອງຫວຽດນາມ ແລະ ການນຳຈາກ 5 ແຂວງ ພາກກາງ ແລະ ພາກໃຕ້ຂອງລາວ (ຈຳປາສັກ, ເຊກອງ, ສາລະວັນ, ອັດຕະປື ແລະ ສະຫວັນນະເຂດ). ນອກຈາກນີ້ ຍັງມີຜູ້ຕາງໜ້າຈາກແຂວງອຸບົນລາດຊະທານີ (ຣາຊະອານາຈັກໄທ) ພ້ອມດ້ວຍນັກທຸລະກິດ ແລະ ອົງການການທູດຢ່າງຫຼວງຫຼາຍ ເຊິ່ງເປັນການຢືນຢັນເຖິງທີ່ຕັ້ງຍຸດທະສາດຂອງແນວທາງ EWEC ໃນການເຊື່ອມໂຍງເສດຖະກິດພາກພື້ນ. ຈາກເວທີສົນທະນາ ສູ່ການປະຕິບັດຕົວຈິງ ເວທີປຶກສາຫາລືຈະສຸມໃສ່ການສົນທະນາທີ່ເປັນຮູບປະທຳ ຜ່ານ 2 ຫົວຂໍ້ຫຼັກ ຄື:“ປະຕູສູ່ຕະຫຼາດພາກໃຕ້ – ພາກກາງຂອງລາວ”: ເຈາະເລິກກາໂອກາດ ແລະ ສິ່ງທ້າທາຍໃນການເຂົ້າສູ່ຕະຫຼາດທ້ອງຖິ່ນ.
“ການຊຸກຍູ້ການຮ່ວມມືຂ້າມແດນ”: ປຶກສາຫາລືກ່ຽວກັບການປັບປຸງນະໂຍບາຍໃນຂົງເຂດການລົງທຶນ, ການຄ້າ, ການທ່ອງທ່ຽວ ແລະ ລະບົບໂລຈິສຕິກ (Logistics) ເພື່ອຂຸດຄົ້ນທ່າແຮງຮ່ວມກັນໃຫ້ເກີດປະໂຫຍດສູງສຸດ.
ຂີດໝາຍໃໝ່: ເຊັນ MOU ກວ່າ 20 ສະບັບ ສຳລັບປີ 2026-2030. ຈຸດເດັ່ນທີ່ສຳຄັນ ແລະ ເປັນໜ້າຈັບຕາທີ່ສຸດຂອງກອງປະຊຸມຄັ້ງນີ້ ແມ່ນຈະມີພິທີລົງນາມໃນບົດບັນທຶກຄວາມເຂົ້າໃຈ (MOU) ຫຼາຍກວ່າ 20 ສະບັບ ລະຫວ່າງ ນະຄອນດານັງ ແລະ ບັນດາທ້ອງຖິ່ນຂອງຫວຽດນາມ ກັບບັນດາທ້ອງຖິ່ນ ແລະ ສະມາຄົມທຸລະກິດຢູ່ລາວ ສຳລັບໄລຍະປີ 2026 – 2030.
ກອງປະຊຸມເວທີປຶກສາຫາລືໃນຄັ້ງນີ້ ບໍ່ພຽງແຕ່ເປັນເວທີພົບປະແລກປ່ຽນເທົ່ານັ້ນ, ແຕ່ຍັງເປັນການຢືນຢັນເຖິງອະນາຄົດແຫ່ງຄວາມຈະເລີນຮຸ່ງເຮືອງຮ່ວມກັນ, ເຊິ່ງສາຍພົວພັນມິດຕະພາບອັນເປັນມູນເຊື້ອ ແລະ ຄວາມສາມັກຄີພິເສດ ລາວ – ຫວຽດນາມ ຈະໄດ້ຮັບການເພີ່ມພູນຄູນສ້າງດ້ວຍຜົນສຳເລັດດ້ານເສດຖະກິດ-ສັງຄົມ ທີ່ເປັນຮູບປະທຳ ແລະ ຍືນຍົງ.