ໃນວັນທີ 31 ກໍລະກົດ 2026 ນີ້, ຄະນະໂຄສະນາອົບຮົມແຂວງຈຳປາສັກ ໄດ້ຈັດພິທີປະກາດພະນັກງານນຳພາ-ຄຸ້ມຄອງ ອອກພັກການຮັບອຸດໜູນບຳນານຢ່າງເປັນທາງການ, ທີ່ສຳນັກງານຫ້ອງວ່າການປົກຄອງແຂວງຈຳປາສັກ ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ປະດິດ ວັນນະລັດສະໝີ, ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ. ເຂົ້າຮ່ວມໃນພິທີ ມີຄະນະນຳຈາກພະແນກການທີ່ກ່ຽວຂ້ອງຂອງແຂວງ, ຄະນະໂຄສະນາອົບຮົມແຂວງ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານວິຊາການເຂົ້າຮ່ວມຢ່າງພ້ອມພຽງ
ພິທີປະກາດພະນັກງານອອກພັກການຮັບອຸດໜູນບຳນານຄັ້ງນີ້ ແມ່ນເປັນການປະຕິບັດຕາມຂໍ້ຕົກລົງຂອງປະທານຄະນະກຳມະການປົກຄອງແຂວງຈຳປາສັກ ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກການຮັບອຸດໜູນບຳນານ ຈຳນວນ 5 ທ່ານ ທີ່ໄດ້ທຸ້ມເທເຫື່ອແຮງ ແລະ ສະຕິປັນຍາ ເຂົ້າໃນພາລະກິດຮັບໃຊ້ຊາດມາຢ່າງຍາວນານ, ເຊິ່ງປະກອບມີ:
ທ່ານ ບຸນປັນ ມະຫາລາດ, ຮອງຫົວໜ້າຄະນະໂຄສະນາອົບຮົມແຂວງ (ອາຍຸການ 40 ປີ)
ທ່ານ ສຸພົນ ພົນຊຽງສາ, ສັງກັດຂະແໜງສື່ມວນຊົນ-ຖະແຫຼງຂ່າວ (ອາຍຸການ 42 ປີ)
ທ່ານ ອິດສຸລິຍະ ຫຼວງອາໄພ, ຮອງຫົວໜ້າຂະແໜງໂຄສະນາປາຖະກະຖາ (ອາຍຸການ 42 ປີ)
ທ່ານ ນາງ ທອງໃສ ສຸກຈະເລີນ, ວິຊາການຂະແໜງສື່ມວນຊົນ-ຖະແຫຼງຂ່າວ(ອາຍຸການ 30 ປີ)
ທ່ານ ບຸນເຄນ ຂັນທອງ, ສັງກັດຂະແໜງສື່ມວນຊົນ-ຖະແຫຼງຂ່າວ (ອາຍຸການ 32 ປີ)
ໃນໂອກາດອັນມີຄວາມໝາຍສຳຄັນກ່ອນເຂົ້າຮັບອຸດໜູນບຳນານນີ້, ທ່ານ ບຸນປັນ ມະຫາລາດ ໄດ້ຕາງໜ້າໃຫ້ພະນັກງານຮັບບຳນານ ທັງ 5 ທ່ານ ຂຶ້ນສະແດງຄວາມຮູ້ສຶກຕໍ່ພະນັກງານລັດຖະກອນ ແລະ ການຈັດຕັ້ງ. ທ່ານໄດ້ກ່າວສະແດງຄວາມກະຕັນຍູ ແລະ ຮູ້ບຸນຄຸນຢ່າງສູງຕໍ່ ພັກ-ລັດ ທີ່ໄດ້ອົບຮົມບຳລຸງ, ກໍ່ຮ່າງສ້າງຕົວ ແລະ ໃຫ້ໂອກາດແກ່ທຸກທ່ານໄດ້ຮັບໃຊ້ປະເທດຊາດຕະຫຼອດໄລຍະການປະຕິບັດໜ້າທີ່ຕະຫຼອດໄລຍະຜ່ານມາ; ພ້ອມດຽວກັນທ່ານຍັງໄດ້ມອບພາລະໜ້າທີ່ອັນຊົງກຽດໃຫ້ແກ່ພະນັກງານຮຸ່ນສືບທອດ ໃຫ້ຕັ້ງໜ້າສືບຕໍ່ຝຶກຝົນຫຼໍ່ຫຼອມຕົນເອງ ແລະ ປະຕິບັດໜ້າທີ່ວຽກງານໃຫ້ປະສົບຜົນສຳເລັດຕາມການຈັດຕັ້ງມອບໝາຍໃຫ້.
ຈາກນັ້ນ, ທ່ານ ປະດິດ ວັນນະລັດສະໝີ ໄດ້ໃຫ້ກຽດມອບຂໍ້ຕົກລົງ ແລະ ເງິນນະໂຍບາຍອຸດໜູນບຳນານໃຫ້ແກ່ແຕ່ລະທ່ານ. ບັນຍາກາດພາຍໃນພິທີເປັນໄປຢ່າງອົບອຸ່ນ ແລະ ເຕັມໄປດ້ວຍຄວາມສາມັກຄີຮັກແພງ, ໂດຍຕົວແທນຈາກຂະແໜງການຕ່າງໆພາຍໃນຄະນະໂຄສະນາອົບຮົມແຂວງຍັງໄດ້ຜັດປ່ຽນກັນຂຶ້ນມອບກະຕ່າຂອງຂວັນ ເພື່ອສະແດງຄວາມຊົມເຊີຍ ແລະ ຂອບໃຈຕໍ່ຜົນງານ, ຄຸນງາມຄວາມດີ ທີ່ທຸກທ່ານໄດ້ສ້າງໄວ້.
ຕອນທ້າຍຂອງພິທີ, ຜູ້ເຂົ້າຮ່ວມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນຳຈາກ ທ່ານ ປະດິດ ວັນນະລັດສະໝີ ເພື່ອເປັນເຂັມຊີ້ທິດເຍືອງທາງໃຫ້ແກ່ພະນັກງານບຳນານ ພ້ອມທັງພະນັກງານລັດຖະກອນພາຍໃນຄະນະໂຄສະນາອົບຮົມແຂວງ ຈົ່ງສືບຕໍ່ປະຕິບັດໜ້າທີ່ທີ່ການຈັດຕັ້ງມອບໝາຍໃຫ້ໃຫ້ມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍໂຕຍິ່ງໆຂຶ້ນ.
__________
#ໜັງສືພິມຈຳປາໃໝ່
ບກ: ມົນທຽນ ໄຊຍະສິດ