ກົມກວດກາ ຄະນະໂຄສະນາອົບຮົມສູນກາງພັກ ເຄື່ອນໄຫວຕິດຕາມ ແລະ ຊຸກຍູ້ວຽກງານໂຄສະນາອົບຮົມ ຢູ່ສອງເມືອງຂອງແຂວງຈໍາປາສັກ
ໃນວັນທີ 06 ມັງກອນ 2026 ທີ່ຜ່ານມາ, ກົມກວດກາ ຄະນະໂຄສະນາອົບຮົມສູນກາງພັກ ເຄື່ອນໄຫວຕິດຕາມ ແລະ ຊຸກຍູ້ວຽກງານໂຄສະນາອົບຮົມ ຢູ່ສອງເມືອງຂອງແຂວງຈໍາປາສັກ ຄື: ເມືອງໂຂງ ແລະ ເມືອງ ມຸນລະປາໂມກ , ເຊິ່ງນໍາໂດຍທ່ານ ນາງ ຫຼ້າຊ້ອຍ ກອງແກ້ວມະນີວົງ ຮອງຫົວໜ້າກົມກວດກາ ຄະນະໂຄສະນາອົບຮົມສູນກາງພັກ ພ້ອມດ້ວຍຄະນະພະແນກຂອງກົມ, ຫ້ອງການບໍລິຫານຄະນະໂຄສະນາອົບຮົມແຂວງຈໍາປາສັກ ຕິດຕາມ,
ເຊິ່ງໃນຄາບເຊົ້າໄດ້ລົງເຄື່ອນໄຫວຢູ່ເມືອງໂຂງ, ໂດຍມີ ທ່ານ ນາງ ສ້ອຍມະນີ ພັນທະວົງ ກໍາມະການພັກເມືອງ ຫົວໜ້າຄະນະໂຄສະນາອົບຮົມເມືອງໂຂງ ພ້ອມຄະນະ, ພະນັກງານທັງໝົດເຂົ້າຮ່ວມຕ້ອນຮັບ ແລະ ໃນຄາບບ່າຍ ໄດ້ສືບຕໍ່ເຄື່ອນ ໄຫວທີ່ເມືອງມຸນລະປະໂມງ ໂດຍມີ ທ່ານ ນາງ ລໍາພອນ ພົມມະນີວັນ ຄະນະປະຈໍາພັກເມືອງ ຫົວໜ້າຄະນະໂຄສະນາອົບຮົມເມືອງມຸນລະປາໂມກ ພ້ອມຄະນະ ແລະ ພະນັກງານທັງໝົດເຂົ້າຮ່ວມຕ້ອນຮັບຢ່າງພ້ອມພຽງ.
ໃນໂອກາດນີ້, ຫົວໜ້າຄະນະໂຄສະນາອົບຮົມທັງສອງເມືອງ ໄດ້ລາຍງານການຈັດຕັ້ງຜັນຂະຫຍາຍ ແລະ ຈັດຕັ້ງປະຕິ ບັດແນວທາງນະໂຍບາຍຂອງລັດ, ມະຕິກອງປະຊຸມໃຫຍ່ຂອງພັກ, ມະຕິກອງປະຊຸມໃຫຍ່ຄະນະບໍລິຫານງານພັກແຂວງ, ການຝຶກອົບຮົມໃຫ້ເປົ້າໝາຍຕ່າງໆ, ການກໍ່ສ້າງພັກ-ພະນັກງານ ແລະ ບັນດາວຽກງານບ່າງດ້ານຕາມຄໍາເຈາະຈີ້ມຂອງກົມກວດກາ; ພ້ອມນັ້ນ ພະນັກງານທັງສອງເມືອງຍັງມີການປະກອບຄໍາເຫັນ ແລະ ມີຂໍ້ສະເໜີ ຕໍ່ຂໍ້ຄົງຄ້າງ ແລະ ຂໍ້ຫຍຸງຍາກໃນການປະຕິບັດວຽກງານ ເພື່ອລາຍງານຕໍ່ຂັ້ນເທິ່ງມີທິດຊີ້ນໍາ ແລະ ຫາວິທີແກ້ໄຂ.
ຈາກນັ້ນ , ທ່ານ ນາງ ຫຼ້າຊ້ອຍ ກອງແກ້ວມະນີວົງ ຮອງຫົວໜ້າກົມກວດກາ ຄະນະໂຄສະນາອົບຮົມສູນກາງພັກ ກໍ່ໄດ້ເຜີຍແຜ່ ຂໍ້ຕົກລົງວາດ້ວຍການຈັດຕັ້ງ ແລະ ການເຄື່ອນໄຫວ ຂອງກົມກວດກາ ສະບັບເລກທີ 253/ຄອສພ, ລົງວັນທີ 29 ພະຈິກ 2022; ແລະ ມີຄໍາຊຸກຍູ້ການຈັດຕັ້ງປະຕິບັດພາລະບົດບາດ, ສິດ, ໜ້າທີ່, ຄວາມຮັບຜິດຊອບ, ການຈັດຕັ້ງປະຕິ ບັດບັນດາແຜນງານ, ແນະນໍາທັດສະນະຄວາມຮັບຮູ້-ຄວາມເຂົ້າໃຈຂອງຄະນະນໍາ ແລະ ສະມາຊິກພັກ-ພະນັກງານ ກ່ຽວກັບ ວຽກງານກວດກາ ເພື່ອເສີມຂະຫຍາຍດ້ານຕັ້ງໜ້າ ແລະ ປັບປຸງແກ້ໄຂ ດ້ານປະກົດການຫຍໍ້ທໍ້ ຂອງສະມາຊິກພັກ-ພະນັກງານ ຂັ້ນເມືອງ ໃຫ້ມີຄວາມໜັກແໜ້ນ, ເຂັ້ມແຂງ ທາງດ້ານແນວຄິດ, ການຈັດຕັ້ງ ແລະ ແບບແຜນວິທີນຳພາ, ວິທີເຮັດວຽກ.
