ໃນວັນທີ 14 ມີນາ 2024 ຄະນະໂຄສະນາອົບຮົມແຂວງ ຈັດພິທີປິດຊຸດຝຶກອົບຮົມເປົ້າໝາຍທີ່ຈະຂະຫຍາຍເຂົ້າເປັນສະມາຊິກພັກ ປະຊາຊົນປະຕິວັດລາວ ຊຸດທີ II ປະຈຳປີ 2023 ຂຶ້ນຢູ່ທີ່ສະໂມສອນຫຼັກ 4 ໂດຍໃຫ້ກຽດເປັນປະທານຂອງ ສະຫາຍ ສຸປານີ ສີລິປຸນໂຍ ຫົວໜ້າຄະນະໂຄສະນາອົບຮົມແຂວງຈຳປາສັກ ເຂົ້າຮ່ວມໃນພິທີຄັ້ງນີ້ ມີຄະນະພັກຮາກຖານ, ໜ່ວຍພັກຮາກຖານພະແນການອ້ອມຂ້າງແຂວງ, ຄະນະຮັບຜິດຊອບຊຸດຝຶກອົບຮົມ ແລະ ມະຫາຊົນກ້າວໜ້າຈຳນວນທັງໝົດ 21 ສະຫາຍ, ຍິງ 12 ສະຫາຍເຊິ່ງມາຈາກ 4 ຮາກຖານ ແລະ 1 ໜ່ວຍພັກຮາກຖານເຂົ້າຮ່ວມ.
ໃນພິທີສະຫາຍ ສົມພອນ ວິໄລສົມ ຫົວໜ້າຂະແໜງອົບຮົມ ຕ່າງໜ້າຄະນະຊຸດຝຶກອົບຮົມ ໄດ້ຂື້ນຜ່ານບົດສະຫຼຸບການຈັດຕັ້ງຝຶກອົບຮົມ ເຊິ່ງສັງລວມໄດ້ວ່າ: ພາຍຫຼັງໄດ້ຮັບເປົ້າໝາຍທີ່ອະນຸມັດຈາກຄະນະກຳມະການຄຸ້ມຄອງ-ປ້ອງກັນພັກຂັ້ນແຂວງ ກໍຄືຄະນະຈັດຕັ້ງແຂວງ, ຄະນະໂຄສະນາອົບຮົມແຂວງ ກໍໄດ້ຮີບຮ້ອນແຕ່ງຕັ້ງຄະນະຮັບຜີດຊອບບັ້ນຝືກອົບຮົມ ແລະ ແບ່ງຄວາມຮັບຜິດຊອບໃຫ້ແຕ່ລະສະຫາຍຢ່າງລະອຽດ, ການຝຶກອົບຮົມ ແມ່ນໃຊ້ເວລາ 2 ວັນ ຈັດແບ່ງເວລາຂຶ້ນຫ້ອງ 02 ຄາບ, ຄົ້ນຄວ້າສົນທະນາແລກປ່ຽນບົດຮຽນລວມຫ້ອງ 02 ຊົ່ວໂມ, ລະບົບຄືນແກ້ຂໍ້ຂ້ອງໃຈ 3 ຊົ່ວໂມງ; ການຈັດຊຸດອົບຮົມ ໄດ້ປະກອບເອກະສານຕຳລາຮຽນເປັນຄູ່ມື ພ້ອມທັງອອກໃບຢັ້ງຢືນການຮຽນໃຫ້ບັນດາສະຫາຍມະຫາຊົນກ້າວໜ້າຢ່າງຄົບຖ້ວນ, ເປົ້າໝາຍທີ່ໄດ້ຮັບການອະນຸມັດທັງໝົດ 21 ສະຫາຍ, ຍິງ 12 ສະຫາຍ (ມາຈາກ 04 ຮາກຖານ 01 ໜ່ວຍພັກຮາກຖານ; ບັນດາສະຫາຍຄູ-ອາຈານ ທີ່ຂຶ້ນຫ້ອງບັນລະຍາຍເອກະສານແມ່ນມາຈາກ ຄະນະໂຄສະນາອົບຮົມແຂວງທັງໝົດ ເອກະສານທີ່ນຳໃຊ້ເຂົ້າໃນການອົບຮົມທັງໝົດ 13 ຄຳຖາມ 13 ຄຳຕອບ ທີ່ຄະນະໂຄສະນາອົບຮົມສູນກາງສົ່ງໃຫ້, ການຂຶ້ນຫ້ອງບັນລະຍາຍເອກະສານແຕ່ລະບົດ ແມ່ນໄດ້ເນັ້ນໜັກໃສ່ບັນດາເນື້ອໃນພື້ນຖານ ພ້ອມທັງອະທິບາຍສົມທຽບໃສ່ພຶດຕິກຳ ແລະ ທິດສະດີເພື່ອເຮັດໃຫ້ບັນດາສະຫາຍເຂົ້າໃຈຈະແຈ້ງ, ບັນດາສະຫາຍນັກຝຶກອົບຮົມ ມີຄວາມຕັ້ງໃຈຟັງການບັນຍາຍເອກະສານແຕ່ລະບົດ ຂອງຄູ-ອາຈານ, ການຄົ້ນຄວ້າສົນທະນາແລກປ່ຽນຄຳຄິດຄຳເຫັນລວມຫ້ອງ ເຫັນວ່າມີບັນຍາກາດຟົດຟື້ນ, ຜ່ານການຄົ້ນຄວ້າ-ຮ່ຳຮຽນມາເປັນເວລາ 02 ວັນ ສາມາດຕີລາຄາປະເມີນຄວາມຄວາມຮັບຮູ້ເຂົ້າໃຈຂອງນັກຝຶກອົບຮົມໄດ້ປະມານ 95 %.
ໃນຕອນທ້າຍ ສະຫາຍ ປະທານຊຸດອົບຮົມ ກໍໄດ້ໃຫ້ກຽດມອບໃບຢັ້ງຢືນ ແລະ ມີຄໍາເຫັນໂອ້ລົມຕໍ່ມະຫາຊົນກ້າວໜ້າທີ່ໄດ້ສໍາເລັດການຝຶກອົບຮົມໃນຄັ້ງນີ້. ເຊິ່ງເພິ່ນໄດ້ກ່າວວ່າ: ຜົນສຳເລັດບັ້ນຝຶກອົບຮົມໃນຄັ້ງນີ້, ຍັງພຽງແຕ່ເປັນຜົນ ສຳເລັດໃນຂັ້ນຕົ້ນເທົ່ານັ້ນ ໜ້າທີ່ອັນໜັກໜ່ວງແຕ່ມີກຽດສະງ່າຂອງບັນດາສະຫາຍ ຍັງຕ້ອງໄດ້ໝູນໃຊ້ບົດຮຽນ-ທິດສະດີທີ່ໄດ້ຮຽນມາເຂົ້າໃນພາກພຶດຕິກຳໃຫ້ມີຜົນສຳເລັດທີ່ໃຫຍ່ຫຼວງ ແລະ ມີປະສິດທິຜົນສູງ ແລະ ຕ້ອງໄດ້ສູ້ຊົນຈັດຕັ້ງປະຕິບັດໃນຕໍ່ໜ້າ.
