ນະຄອນຫຼວງວຽງຈັນ: ເມື່ອວັນທີ 22 ມິຖຸນາ 2026, ຄະນະໂຄສະນາອົບຮົມສູນກາງພັກ ຮ່ວມກັບ ກົມສື່ມວນຊົນ ກະຊວງວັດທະນະທຳ, ກິລາ ແລະ ການທ່ອງທ່ຽວ ແຫ່ງ ສສ ຫວຽດນາມ ໄດ້ເປີດຊຸດຝຶກອົບຮົມວຽກງານສື່ມວນຊົນ ພາຍໃຕ້ຫົວຂໍ້ “ທັກສະການນຳໃຊ້ເຄື່ອງມືປັນຍາປະດິດ (AI) ເຂົ້າໃນສື່ຫຼາຍແພລດຟອມ, ຫຼາຍມິຕິ” ຢ່າງເປັນທາງການ ທີ່ໂຮງແຮມ ເມືອງແທັງ,ນະຄອນຫຼວງວຽງຈັນ.

           ພິທີເປີດໄດ້ຮັບກຽດເຂົ້າຮ່ວມ ແລະ ກ່າວເປີດໂດຍ ສະຫາຍ ວັນສີ ກົວມົວ, ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ພ້ອມດ້ວຍ ສະຫາຍ ນາງ ດັງ ທິ ເຟືອງ ຖ້າວ, ຮອງຫົວໜ້າກົມສື່ມວນຊົນ ກະຊວງວັດທະນະທຳ, ກິລາ ແລະ ການທ່ອງທ່ຽວ ແຫ່ງ ສສ ຫວຽດນາມ, ຄະນະຮັບຜິດຊອບ, ວິທະຍາກອນ ແລະ ສໍາມະນາກອນເຂົ້າຮ່ວມທັງໝົດ 40 ສະຫາຍ (ໃນນີ້ມີສື່ມວນຊົນຍິງ 8 ສະຫາຍ) ທີ່ມາຈາກຫຼາກຫຼາຍພາກສ່ວນທີ່ເປັນກຳລັງຫຼັກຂອງວຽກງານສື່ຈາກສູນກາງ ແລະ ທ້ອງຖິ່ນເຂົ້າຮ່ວມ.

            ຊຸດຝຶກອົບຮົມໃນຄັ້ງນີ້ (ຈັດຂຶ້ນແຕ່ວັນທີ 22-26 ມິຖຸນາ 2026) ເນັ້ນໃສ່ການປະຕິບັດຕົວຈິງ ແລະ ການຫັນປ່ຽນສູ່ລະບົບດິຈິຕອນ ໂດຍນັກຂ່າວ ແລະ ບຸກຄະລາກອນສື່ຈະໄດ້ຮຽນຮູ້ສິ່ງໃໝ່ໆ ເຊັ່ນ: ​ເຕັກນິກການຜະລິດສື່ຜ່ານມືຖື: ທັງການຖ່າຍພາບ, ຕັດຕໍ່   ວິດີໂອ ແລະ ແກ້ໄຂຜົນງານໃຫ້ສົມບູນແບບ.
​ການນຳໃຊ້ AI ຢ່າງສ້າງສັນ: ຮຽນຮູ້ການສ້າງ “ຜູ້ຊ່ວຍ AI” (AI Assistant) ໂດຍບໍ່ຈຳເປັນຕ້ອງມີພື້ນຖານການຂຽນໂປຣແກຣມ, ການໃຊ້ AI ຊ່ວຍຂຽນບົດສະຄຣິບ (Script) ວິດີໂອ, ຂຽນຫົວຂໍ້ຂ່າວ ແລະ ເນື້ອໃນສື່ສັງຄົມອອນລາຍ.
​ຈັນຍາບັນ ແລະ ຄວາມສ່ຽງ: ສຶກສາເຖິງໂອກາດ, ຂໍ້ຄວນລະວັງ ແລະ ຈັນຍາບັນໃນການນຳໃຊ້ AI ເຂົ້າໃນວຽກງານສື່.
​
​ໃນພິທີເປີດ, ສະຫາຍ ວັນສີ ກົວມົວ ກຳມະການສູນກາງພັກ, ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ມີຄຳເຫັນ ແລະ ຝາກຂໍ້ຄິດທີ່ເລິກເຊິ່ງເຖິງບັນດາສຳມະນາກອນວ່າ:
​”AI ອາດຈະບໍ່ສາມາດມາແທນທີ່ນັກຂ່າວໄດ້, ແຕ່ນັກຂ່າວທີ່ຮູ້ຈັກນຳໃຊ້ AI ຢ່າງສຳນິສຳນານ ຈະກາຍເປັນກຳລັງແຮງຫຼັກ ທີ່ຈະກ້າວຂຶ້ນມານຳໜ້າ ແລະ ກຳນົດທິດທາງຂອງສື່ມວນຊົນໃນຍຸກດິຈິຕອນນີ້”
​ພ້ອມທັງຮຽກຮ້ອງໃຫ້ສໍາມະນາກອນທຸກສະຫາຍ ຈົ່ງຍົກສູງຄວາມຮັບຜິດຊອບ, ຕັ້ງໃຈຄົ້ນຄວ້າ, ກ້າຕັ້ງຄຳຖາມ ແລະ ຖອດຖອນບົດຮຽນຈາກຜູ້ຊ່ຽວຊານ ສສ ຫວຽດນາມ ໃຫ້ໄດ້ຫຼາຍທີ່ສຸດ ເພື່ອນຳໄປໝູນໃຊ້ເຂົ້າໃນວຽກງານຕົວຈິງໃຫ້ມີປະສິດທິພາບສູງ ແລະ ຫັນເປັນທັນສະໄໝຢ່າງແທ້ຈິງ.

ສື່ມວນຊົນລາວ #ຝຶກອົບຮົມAI #ຄະນະໂຄສະນາອົບຮົມສູນກາງພັກ #ສື່ຍຸກໃໝ່ #LaosMedia #AIinJournalism

ໜັງສືພິມຈຳປາໃໝ່
ຂ່າວ: ມົນທຽນ ໄຊຍະສິດ
ພາບ: ວັນເພັງ

Bài viết ສື່ລາວຍຸກໃໝ່! ເປີດຊຸດຝຶກອົບຮົມຍົກລະດັບການຜະລິດສື່ ແລະ ການນຳໃຊ້ AI ຜ່ານມືຖື đã xuất hiện đầu tiên vào ngày .

              ວັນທີ​ 20​ ມິຖຸນາ​ 2026,​ບໍລິສັດ ຊຽວໜີວ ເທັກໂນໂລຢີ ຈຳກັດ ເປີດໂຕ ລົດຖີບໄຟຟ້າຮັບໃຊ້ສັງຄົມ (Laos E bike) ຢູ່ນະຄອນປາກເຊ ແຂວງຈໍາປາສັກ ເພື່ອຮ່ວມກັນສ້າງ ນະຄອນປາກເຊ ໃຫ້ເປັນຕົວເມືອງສີຂຽວ, ຫຼຸດຜ່ອນການນໍາໃຊ້ນໍ້າມັນເຊື້ອໄຟ ແລະ ສົ່ງເສີມການທ່ຽງທ່ຽວແບບອະນຸລັກ ສິ່ງແວດລ້ອມ.​ ພິທີ​ຈັດຂຶ້ນ​ຢູ່ໂຮງແຮມ ເອລາວັນ ຣີເວີຊາຍ ໂດຍການ​ໃຫ້ກຽດ​ເຂົ້າຮ່ວມ​ຂອງທ່ານ​ ສະນັ່ນ​ ສີດາວົງ ກໍາມະການພັກແຂວງ​ ຫົວໜ້າ​ພະແນກການ​ເງິນແຂວງ, ທ່ານ​ ບາສີ ພອນ​ແກ້ວ​ ຮອງຫົວໜ້າ​ພະແນກ​ໂຍທາທິການ​ ແລະ​ ຂົນສົ່ງ​ແຂວງ,​ ທ່ານ ດວງປັນຍາ ວໍລະວົງ ຮອງຜູ້ອໍານວຍການບໍລິສັດ ຊຽວໝິວ ເທັກໂນໂລຢີ ຈໍາກັດ.​ ມີນໍາການນໍາພະແນກການກົມກອງທີ່ກ່ຽວຂ້ອງຂອງແຂວງ, ການນໍານະຄອນປາກເຊ, ແຂກເຊື້ອເຊີນ ຈາກພາກລັດ,​ ເອກະຊົນ,​ ພະນັກງານ ແລະ ສະມາຊິກຄອບຄົວ ລົດຖີບໄຟຟ້າ ຮັບໃຊ້ສັງຄົມ​ ເຂົ້າ​ຮ່ວມ.​

                ໃນພິທີ,​ ທ່ານ ດວງປັນຍາ ວໍລະວົງ ໃນນາມຜູ້ຮ່ວມກໍ່ຕັ້ງ ແລະ ຕາງໜ້າບໍລິສັດ ຊຽວໝິວ ເທັກໂນໂລຢີ ຈໍາກັດ​ ໄດ້ໃຫ້ກຽດກ່າວຈຸດປະສົງ ແລະ ລາຍງານຄວາມເປັນມາຂອງໂຄງການ​ ວ່າ: ໂລກຂອງພວກເຮົາພວມຜ່ານຜ່າການປ່ຽນແປງຄັ້ງໃຫຍ່ ໂດຍສະເພາະສິ່ງທ້າທາຍດ້ານສິ່ງແວດລ້ອມ ແລະ ການຫັນປ່ຽນດ້ານພະລັງງານ ເຊິ່ງບໍ່ແມ່ນເລື່ອງໄກຕົວ, ແຕ່ເປັນໜ້າທີ່ຂອງທຸກຄົນທີ່ຈະຕ້ອງໄດ້ຮ່ວມ ມືກັນແກ້ໄຂ.​ ດ້ວຍແຮງບັນດານໃຈດັ່ງກ່າວ, ບໍລິສັດ ຊຽວໜີວ ເທັກໂນໂລຢີ ຈຳກັດ ຈຶ່ງໄດ້ສ້າງຕັ້ງ ແລະ ໄດ້ຮັບການຂຶ້ນທະບຽນວິສາຫະກິດຢ່າງເປັນທາງການ ໃນວັນທີ 24 ທັນວາ 2024​ ເປັນການຮ່ວມທຶນ​ ລະຫວ່າງ​ ນັກລົງທຶນລາວ ແລະ ນັກລົງທຶນຈາກ ສປ ຈີນ​ ໂດຍມີທຶນຈົດທະບຽນ 10 ຕື້ກີບ ເຊິ່ງເປັນການຢັ້ງຢືນເຖິງຄວາມມຸ່ງໝັ້ນອັນແຮງກ້າ ທີ່ຈະນຳເອົາການບໍລິການດ້ານເທັກໂນໂລຢີທີ່ທັນສະໄໝ ແລະ ບໍລິການລົດໃຫ້ເຊົ່າທີ່ໄດ້ມາດຕະຖານສາກົນ ມາຮັບໃຊ້ສັງຄົມລາວ.​

            ທ່ານ ດວງປັນຍາ ວໍລະວົງ ກ່າວຕື່ມວ່າ: ລົດຖີບໄຟຟ້າຈະເປັນທາງເລືອກທີ່ຊ່ວຍປະຢັດຄ່າໃຊ້ຈ່າຍດ້ານພະລັງງານໃນການເດີນທາງປະຈຳວັນຢ່າງແທ້ຈິງ​ ທັງເປັນການຕອບແທນຄືນສູ່ຊຸມຊົນ,​ ບໍລິສັດ​ ໄດ້ຕັ້ງເປົ້າໝາຍແບ່ງປັນຜົນກຳໄລເຂົ້າໃນກິດຈະກໍາສາທາລະນະປະໂຫຍດ ເຊັ່ນ: ການສະໜັບສະໜູນການສຶກສາ, ການຊ່ວຍເຫຼືອສັງຄົມ ແລະ ການປູກຕົ້ນໄມ້ເພີ່ມພື້ນທີ່ສີຂຽວ.​ ພວກເຮົາເຊື່ອໝັ້ນ​ວ່າ​ ລົດຖີບໄຟຟ້າ ຮັບ ໃຊ້ສັງຄົມ ຈະເປັນສ່ວນໜຶ່ງໃນການຍົກລະດັບຊີວິດການເປັນຢູ່ຂອງຊາວນະຄອນປາກເຊ, ອຳນວຍຄວາມສະດວກ ໃຫ້ນັກທ່ອງທ່ຽວທີ່ມາຢ້ຽມຢາມ ແລະ ສ້າງພາບລັກການເປັນເມືອງທັນສະໄໝພະລັງງານສະອາດ​ ໃຫ້ແກ່ແຂວງ ຈຳປາສັກ.​ ພ້ອມນີ້​ ກໍໄດ້ນໍາສະເໜີຂໍ້ມູນດ້ານເຕັກນິກ, ວິທີການນໍາໃຊ້ ແລະ ລະບົບແອັບພລິເຄຊັນ.​

          ໂອກາດນີ້,​ ທ່ານ​ ສະນັ່ນ​ ສີດາວົງ ກໍາມະການພັກແຂວງ​ ຫົວໜ້າ​ພະແນກການ​ເງິນແຂວງ​ ກໍມີກ່າວຄຳເຫັນວ່າ: ການເປີດໂຕລົດຖີບໄຟຟ້າຮັບໃຊ້ສັງຄົມຄັ້ງນີ້ ຖືເປັນບາດກ້າວອັນສໍາຄັນ ແລະ ເປັນຂີດໝາຍໃໝ່ ໃນການຫັນປ່ຽນວິຖີຊີວິດການສັນຈອນຂອງພໍ່ແມ່ປະຊາຊົນ, ນັກຮຽນ​ – ນັກສຶກສາ ລວມເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ກ້າວໄປສູ່ການນໍາໃຊ້ພະລັງງານສະອາດ ເພື່ອບັນລຸເປົ້າໝາຍຫຼຸດຜ່ອນມົນລະພິດ,​ ຊ່ວຍຫຼຸດຜ່ອນການປ່ອຍກາສເຮືອນແກ້ວ ແລະ ຄວັນພິດຈາກຍານພາຫະນະຕາມທ້ອງຖະໜົນ, ຮັກສາອາກາດທີ່ບໍລິສຸດໃຫ້ກັບຕົວເມືອງ; ເປັນທາງເລືອກໃໝ່ໃນການເດີນທາງທີ່ມີລາຄາປະຢັດ, ເໝາະສົມກັບທຸກເພດທຸກໄວ, ຊ່ວຍຫຼຸດຜ່ອນຄ່າໃຊ້ຈ່າຍໃນຊີວິດປະຈຳວັນຂອງປະຊາຊົນ.​ ນອກນີ້​ ກໍເພື່ອຍົກລະດັບພາບພົດການທ່ອງທ່ຽວ,​ ສ້າງຄວາມປະທັບໃຈໃຫ້ແກ່ນັກທ່ອງທ່ຽວ ຜ່ານການບໍລິການທີ່ ທັນສະໄໝ, ສະດວກສະບາຍ ແລະ ເປັນມິດຕໍ່ສິ່ງແວດລ້ອມ.​ ການຫັນມານໍາໃຊ້ລົດຖີບໄຟຟ້າ ຍັງເປັນການສະແດງເຖິງຄວາມສີວິໄລ ແລະ ຄວາມຮ່ວມມືຂອງທຸກພາກສ່ວນ ໃນການສ້າງສັງຄົມ.​ ເພື່ອເຮັດໃຫ້ໂຄງການນີ້ ດໍາເນີນໄປດ້ວຍຄວາມຮຽບຮ້ອຍ, ມີຄວາມຍືນຍົງ ແລະ ເກີດປະໂຫຍດສູງສຸດຕໍ່ສັງຄົມ, ຂໍຮຽກຮ້ອງມາຍັງພາກສ່ວນຮັບຜິດຊອບ ແລະ ບໍລິສັດຜູ້ບໍລິການ​ ຈົ່ງເອົາໃຈໃສ່ໃນການຄຸ້ມຄອງ, ບຳລຸງຮັກສາລະບົບ ແລະ ຕົວລົດຖີບໄຟຟ້າໃຫ້ມີຄວາມພ້ອມ, ມີຄວາມປອດໄພ 100% ໃນການບໍລິການຢູ່ສະເໝີ,​ ພໍ່ແມ່ປະຊາຊົນ ແລະ ຜູ້ຊົມໃຊ້ທຸກທ່ານ: ຈົ່ງຮ່ວມກັນເປັນເຈົ້າການໃນການນໍາໃຊ້ຢ່າງມີສະຕິ, ຮັກສາ ຊັບສິນສ່ວນລວມ, ເຄົາລົບກົດລະບຽບການຈະລາຈອນຢ່າງເຂັ້ມງວດ ເພື່ອຄວາມປອດໄພຂອງຕົນເອງ ແລະ ຜູ້ຮ່ວມທາງ.
#ຕໍ່ມາ, ກໍໄດ້ຕັດແຖບຜ້າເປີດໂຕ ລົດຖີບໄຟຟ້າຢ່າງເປັນທາງການ.​ ຈາກນັ້ນ, ຄະນະປະທານ, ການນໍາຂັ້ນສູງ ແລະ ແຂກທີ່​ເຂົ້າຮ່ວມ​ພີລິທີ ກໍໄດ້ຢ້ຽມຊົມຜະລິດຕະພັນ ແລະ ທົດລອງຂັບຂີ່ລົດຖີບໄຟຟ້າຕົວຈິງ​​ ຕື່ມອີກ.

ຂ່າວ​-ພາບ​: ທູນທອງໃຈ​​

Bài viết ເປີດໂຕ ” ລົດຖີບໄຟຟ້າຮັບໃຊ້ສັງຄົມ “​ ຢູ່ນະຄອນປາກເຊ​ ແຂວງຈໍາປາສັກ​ đã xuất hiện đầu tiên vào ngày .

             ພິທີເປີດຊຸດຝຶກອົບຮົມທິດສະດີ – ແນວທາງຂອງພັກ ໄລຍະສັ້ນ ຊຸດທີ V ປະຈຳປີ 2026 ຂອງເມືອງຊະນະສົມບູນ ແຂວງຈຳປາສັກ ໄດ້ຈັດຂຶ້ນຢ່າງເປັນທາງການ.ໃນວັນທີ 22 ມິຖຸນາ 2026 ນີ້ ຢູ່ທີ່ສະໂມສອນຂອງເມືອງ. ໂດຍພາຍໃຕ້ການເປັນປະທານຂອງ ສະຫາຍ ປະດິດ ວັນນະລັດສະໝີ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມ ແຂວງຈຳປາສັກ,ໂດຍມີ ສະຫາຍ ຄຳສີ ຫຼິນສະຫວາດ ກຳມະການພັກແຂວງ,ເລຂາຄະນະບໍລິຫານງານພັກເມືອງຊະນະສົມບູນ ພ້ອມດ້ວຍ ບັນດາສະຫາຍຮອງເລຂາພັກເມືອງ,ຄະນະປະຈຳພັກເມືອງ, ກຳມະການພັກເມືອງ, ຫົວໜ້າກົມກອງ, ຫ້ອງການ, ອົງຄະນະພັກຕາແສງ ແລະ ນັກສຳມະນາກອນເຂົ້າຮ່ວມຢ່າງພ້ອມພຽງ.

            ໃນພິທີ, ສະຫາຍ ຍຸງທອງ ຈັນທະລ້ອມ ກຳມະການພັກເມືອງ,ຫົວໜ້າຄະນະໂຄສະນາອົບຮົມເມືອງ ໄດ້ຂຶ້ນຜ່ານແຜນການການກະກຽມຄວາມພ້ອມໃນການເປີດຊຸດຝຶກອົບຮົມ ເຊິ່ງຊຸດຝຶກອົບຮົມໃນຄັ້ງນີ້ ຈະໄດ້ດຳເນີນໄປເປັນເວລາ 10 ວັນ ຄື: (ເລີ່ມແຕ່ວັນທີ 22 ມິຖຸນາ ຫາ ວັນທີ 3 ກໍລະກົດ 2026 ຈຶ່ງຈະສຳເລັດ). ເຊີ່ງມີນັກສຳມະນາກອນທີ່ມາຈາກກົມກອງ, ຫ້ອງການ, ຕາແສງ ແລະ ບ້ານທົ່ວເມືອງ ເຂົ້າຮ່ວມທັງໝົດ 51 ສະຫາຍ, ຍິງ 20 ສະຫາຍ.

           ສໍາລັບເນື້ອໃນແມ່ນຈະໄດ້ນໍາໃຊ້ເອກະສານສະບັບປັບປຸງໃໝ່ຂອງຄະນະໂຄສະນາອົບຮົມສູນກາງພັກ ລວມມີ 14 ບົດ ໂດຍຖືເອົາການຂຶ້ນຫ້ອງບັນລະຍາຍ ຕິດພັນກັບການຄົ້ນຄວ້າ ແລະ ສຳມະນາເປັນຈຸໜ່ວຍ, ຖືເອົານັກສຳມະນາກອນເປັນຈຸດໃຈກາງໃນການສົນທະນາແລກປ່ຽນ. ທັງນີ້ ກໍເພື່ອໃຫ້ນັກສຳມະນາກອນ ຮັບຮູ້, ເຂົ້າໃຈ, ເຊື່ອມຊຶມ ແລະ ກຳແໜ້ນພື້ນຖານຄວາມຮູ້ກ່ຽວກັບທິດສະດີມາກ-ເລນິນ ແລະ ມູນເຊື້ອອັນດີງາມຂອງຊາດລາວ,ເຂົ້າໃຈຢ່າງເລິກເຊິ່ງກ່ຽວກັບການສ້າງ ແລະ ບູລະນະລະບອບປະຊາທິປະໄຕປະຊາຊົນ ຕາມທິດສັງຄົມນິຍົມ,ກຳແໜ້ນແນວທາງນະໂຍບາຍປ່ຽນແປງໃໝ່ຮອບດ້ານຢ່າງມີຫຼັກການ ແລະ ແນວທາງເສດຖະກິດຂອງພັກ ທີ່ກຳນົດໄວ້ໃນມະຕິກອງປະຊຸມໃຫຍ່ຄັ້ງທີ XII ຂອງພັກ.

               ຕອນທ້າຍຂອງພິທີ, ສະຫາຍ ປະດິດ ວັນນະລັດສະໝີ ໄດ້ມີຄຳເຫັນໂອ້ລົມ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ທີ່ໄດ້ມີຄວາມພະຍາຍາມກະກຽມຄວາມພ້ອມໃນທຸກໆດ້ານ ແລະ ຊົມເຊີຍນັກຝຶກອົບຮົມທຸກສະຫາຍທີ່ໄດ້ເສຍສະຫຼະເວລາເຂົ້າຮ່ວມຝຶກອົບຮົມ ເພື່ອຍົກລະດັບຄວາມຮູ້ ທີ່ຈະນໍາໄປເປັນເຂັມຊີ້ທິດເຍືອງທາງໃນການປະຕິບັດໜ້າທີ່ວຽກງານຢູ່ຂັ້ນຮາກຖານ ໃຫ້ມີຄຸນນະພາບ ພ້ອມດຽວກັນນັ້ນ ສະຫາຍປະທານກໍໄດ້ຮຽກຮ້ອງມາຍັງຄະນະຮັບຜິດຊອບ ແລະ ນັກສຳມະນາກອນທຸກສະຫາຍ ຈົ່ງເຊີດຊູຄວາມຮັບຜິດຊອບຂອງຕົນດ້ວຍຄວາມເປັນເຈົ້າການ, ຕັ້ງໃຈຮັບຟັງ, ຄົ້ນຄວ້າບົດຮຽນ, ປຶກສາຫາລືຖອດຖອນບົດຮຽນຮ່ວມກັນ ແລະ ສົມທຽບກັບພຶດຕິກຳຕົວຈິງ ເພື່ອກຳໄດ້ເນື້ອໃນບົດຮຽນຢ່າງເລິກເຊິ່ງ ພ້ອມທັງ ໄດ້ອວຍພອນໃຫ້ຊຸດຝຶກອົບຮົມຄັ້ງນີ້ ດຳເນີນໄປດ້ວຍຜົນສຳເລັດຢ່າງຈົບງາມຕາມຄາດໝາຍທີ່ວາງໄວ້.

ຂ່າວ – ພາບ: ນັກຂ່າວເມືອງຊະນະສົມບູນ.

Bài viết ເມືອງຊະນະສົມບູນ ເປີດຊຸດຝຶກອົບຮົມທິດສະດີ – ແນວທາງຂອງພັກ ໄລຍະສັ້ນ ຊຸດທີ V ປະຈຳປີ 2026 đã xuất hiện đầu tiên vào ngày .

            ຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດກອງປະຊຸມສຳມະນາວິທະຍາສາດກະກຽມວຽກງານສື່ມວນຊົນທົ່ວປະເທດ ຄັ້ງທີ 1 ຂຶ້ນໃນວັນທີ 16 ມິຖຸນານີ້ ທີ່ຫ້ອງປະຊຸມ ຄອສພ, ໂດຍການເປັນປະທານຂອງ ສະຫາຍ ຄໍາພັນ ເຜີຍຍະວົງ ກຳມະການກົມການເມືອງສູນກາງພັກ ຫົວໜ້າ ຄອສພ, ມີບັນດາຕາງໜ້າກົມກອງ, ກະຊວງ, ອົງການ ອ້ອມຂ້າງຂັ້ນສູນກາງ ທີ່ກ່ຽວຂ້ອງກັບການເຄື່ອນໄຫວວຽກງານສື່ມວນຊົນທົ່ວປະເທດເຂົ້າຮ່ວມ.

           ໃນໂອກາດດັ່ງກ່າວ, ສະຫາຍ ຄຳພັນ ເຜີຍຍະວົງ ໄດ້ກ່າວວ່າ: ກອງປະຊຸມໃນຄັ້ງນີ້ ແມ່ນຈະໄດ້ພ້ອມກັນຄົ້ນຄວ້າເນື້ອໃນ ຮ່າງບົດສະຫຼຸບການຕີລາຄາການເຄື່ອນໄຫວ ວຽກງານສື່ມວນຊົນໃນໄລຍະຜ່ານມາ ແລະ ການກໍານົດທິດທາງລວມຕໍ່ໜ້າ ຮອດປີ 2030; ພ້ອມນີ້ຍັງຈະໄດ້ຄົ້ນຄວ້າລົງເລິກເນື້ອໃນຮ່າງມະຕິຂອງກົມການເມືອງສູນກາງພັກ ທີ່ຈະປ່ຽນແທນມະຕິ 36 ຂອງກົມການເມືອງສູນກາງພັກ ກ່ຽວກັບການເພີ່ມທະວີການນໍາພາຂອງພັກ ແລະ ການຄຸ້ມຄອງຂອງລັດ ຕໍ່ສື່ມວນຊົນ ໃນໄລຍະໃໝ່, ລົງວັນທີ 19 ມິຖຸນາ ປີ 1993 ຊຶ່ງເຫັນວ່າເອກະສານດັ່ງກ່າວນີ້ ນໍາໃຊ້ມາເປັນເວລາຍາວນານສົມຄວນແລ້ວ. ສະນັ້ນ, ເພື່ອໃຫ້ສອດຄ່ອງກັບວຽກງານການພັດທະນາເສດຖະກິດ-ສັງຄົມໃນໄລຍະໃໝ່ ຕ້ອງໄດ້ຄົ້ນຄວ້າປັບປຸງຄືນ; ກອງປະຊຸມຈະໄດ້ລົງເລິກສອງເອກະສານສໍາຄັນ ເພື່ອກະກຽມໃຫ້ແກ່ກອງປະຊຸມວຽກງານສື່ມວນຊົນ ທົ່ວປະເທດ ຄັ້ງທີ 1 ແລະ ຖືວ່າເປັນກອງປະຊຸມຄັ້ງປະຫວັດສາດ, ຄັ້ງທໍາອິດຂອງວຽກງານສື່ມວນຊົນທົ່ວປະເທດ, ທີ່ຈະພ້ອມກັນສຸມໃສ່ສະຫຼຸບຕີລາຄາຄືນການເຄື່ອນໄຫວວຽກງານຂອງສື່ມວນຊົນໄລຍະຜ່ານມາ ແລະ ກໍານົດທິດທາງລວມຮອດປີ 2030 ເພື່ອໃຫ້ມີການຫັນປ່ຽນໄປສູ່ຄຸນນະພາບໃໝ່ ຢ່າງແຂງແຮງ.

           ພ້ອມນີ້, ສະຫາຍ ຄຳພັນ ເຜີຍຍະວົງ ຍັງໄດ້ຮຽກຮ້ອງມາຍັງບັນດາສະຫາຍທັງໝົດທີ່ເຂົ້າຮ່ວມກອງປະຊຸມ ຈົ່ງເຊີດຊູຄວາມຮັບຜິດຊອບສູງ, ເອົາໃຈໃສ່ຄົ້ນຄວ້າ, ສຸມສະຕິປັນຍາເຂົ້າໃນການປະກອບຄຳຄິດຄຳເຫັນໃສ່ຮ່າງເອກະສານສຳຄັນ ຮ່າງບົດສະຫຼຸບຕີລາຄາ, ຮ່າງມະຕິ ທີ່ກອງເລຂາຄະນະຮັບຜິດຊອບຈະໄດ້ນໍາສະເໜີຜ່ານກອງປະຊຸມສໍາມະນາ ແລະ ບັນດາເອກະສານທີ່ກອງເລຂາແຈກຢາຍໄປກ່ອນແລ້ວນັ້ນ ເພື່ອໃຫ້ມີເນື້ອໃນຄົບຖ້ວນ, ເລິກເຊິ່ງ ແລະ ສອດຄ່ອງກັບສະພາບຕົວຈິງໃນປັດຈຸບັນ.

(ຂ່າວ ສົມຫວັງ; ພາບ ຂັນໄຊ)

Bài viết ຄະນະໂຄສະນາອົບຮົມສູນກາງພັກ ສຳມະນາວິທະຍາສາດກະກຽມກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ 1 đã xuất hiện đầu tiên vào ngày .

ກອງປະຊຸມໃຫຍ່ຜູ້ແທນທົ່ວປະເທດ ຂອງພັກປະຊາຊົນ ປະຕິວັດລາວ ແມ່ນເຫດການການເມືອງ ທີ່ມີຄວາມໝາຍສຳຄັນສູງສຸດ ເຊິ່ງເປັນການຮ່ວມຊຸມນຸມເພື່ອສະຫຼຸບຕີລາຄາການນຳພາ, ວາງແຜນທາງຍຸດທະສາດໃນການພັດທະນາປະເທດຊາດ ແລະ ເລືອກຕັ້ງຄະນະບໍລິຫານງານຊຸດໃໝ່. ນີ້ແມ່ນຂໍ້ມູນສະຫຼຸບໂດຍຫຍໍ້ກ່ຽວກັບປະຫວັດການຈັດກອງປະຊຸມໃຫຍ່ ແຕ່ຄັ້ງທີ I ຈົນເຖິງປັດຈຸບັນ:< ​ປະຫວັດຄວາມເປັນມາໂດຍຫຍໍ້ >

ຄໍາຂັວນກອງປະຊຸມໃຫ່ຍຜູ້ແທນທົ່ວປະເທດ ນັບແຕ່ຄັ້ງທີ I-XII ຂອງພັກປະຊາຊົນປະຕິວັດລາວ

ກອງປະຊຸມໃຫຍ່ ຄັ້ງທີ I (ປີ 1955)  ເປັນກອງປະຊຸມສ້າງຕັ້ງ “ພັກປະຊາຊົນລາວ” (ຊື່ໃນເວລານັ້ນ) ໂດຍມີ ທ່ານ ໄກສອນ ພົມວິຫານ ເປັນເລຂາທິການໃຫຍ່ຄົນທຳອິດ.

ສະຖານທີ່: ແຂວງຫົວພັນ ພາຍໃຕ້ຄຳຂັວນ: 

*. ເນື້ອໃນຈິດໃຈ: “ເຕົ້າໂຮມທຸກກຳລັງຮັກຊາດ, ຕີຊະນະຈັກກະພັດລ່າເມືອງຂຶ້ນຝຣັ່ງ ແລະ ແທດເສີຍ (ລູກມື), ຕ້ານການແຊກແຊງຂອງຈັກກະພັດອາເມລິກາ, ສ້າງຕັ້ງປະເທດລາວ ທີ່ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.”

ກອງປະຊຸມໃຫຍ່ ຄັ້ງທີ II (ປີ 1972) ໄດ້ປ່ຽນຊື່ພັກມາເປັນ “ພັກປະຊາຊົນ ປະຕິວັດລາວ” ຈົນເຖິງປັດຈຸບັນ ແລະ ວາງທິດທາງປົດປ່ອຍຊາດ.

ສະຖານທີ່: ແຂວງຫົວພັນ ພາຍໃຕ້ຄຳຂັວນ: 

*. ເນື້ອໃນຈິດໃຈ: “ເພີ່ມທະວີຄວາມສາມັກຄີທົ່ວປວງຊົນ, ເສີມຂະຫຍາຍກຳລັງແຮງແຫ່ງຄວາມເປັນເຈົ້າການ, ເດັດດ່ຽວຕີຊະນະສົງຄາມຮຸກຮານຂອງຈັກກະພັດອາເມລິກາ ແລະ ລູກມື, ປົດປ່ອຍປະເທດຊາດ, ເຮັດໃຫ້ການປະຕິວັດຊາດ ປະຊາທິປະໄຕ ສຳເລັດຜົນໃນທົ່ວປະເທດ.”

ກອງປະຊຸມໃຫຍ່ ຄັ້ງທີ III (ປີ 1982) ເປັນກອງປະຊຸມໃຫຍ່ຄັ້ງທຳອິດຫຼັງຈາກສະຖາປະນາ ສປປ ລາວ (ປີ 1975) ເພື່ອວາງແນວທາງປົກປັກຮັກສາ ແລະ ສ້າງສາລະບົບໃໝ່.

ສະຖານທີ່: ນະຄອນຫຼວງວຽງຈັນ (ເປັນຄັ້ງທຳອິດຫຼັງສະຖາປະນາ ສປປ ລາວ) ພາຍໃຕ້ຄຳຂັວນ: 

*. ເນື້ອໃນຈິດໃຈ: “ປົກປັກຮັກສາເອກະລາດ, ອະທິປະໄຕ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ, ເສີມຂະຫຍາຍລະບອບຜະເດັດການປະຕິວັດ, ຫັນປ່ຽນໄປສູ່ການຜະລິດໃຫຍ່ສັງຄົມນິຍົມ ເທື່ອລະກ້າວ.”

ກອງປະຊຸມໃຫຍ່ ຄັ້ງທີ IV (ປີ 1986) ເປັນຂີດໝາຍປະຫວັດສາດທີ່ສຳຄັນ ເພາະແມ່ນຈຸດເລີ່ມຕົ້ນຂອງ “ແນວທາງປ່ຽນແປງໃໝ່ຈິນຕະນາການ” ຮອບດ້ານທີ່ມີຫຼັກການ ໂດຍສະເພາະແມ່ນການຫັນປ່ຽນດ້ານເສດຖະກິດ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ເນື້ອໃນຈິດໃຈ: “ປ່ຽນແປງໃໝ່ຢ່າງມີຫຼັກການ ແລະ ຮອບດ້ານ” (ນີ້ແມ່ນຈຸດເລີ່ມຕົ້ນຂອງແນວທາງຈິນຕະນາການໃໝ່, ຫັນປ່ຽນຈາກເສດຖະກິດເກື້ອກູນ ໄປສູ່ເສດຖະກິດຕະຫຼາດ ທີ່ມີການຄຸ້ມຄອງຂອງລັດ).

ກອງປະຊຸມໃຫຍ່ ຄັ້ງທີ  V – X (ປີ 1991 – 2016): ແມ່ນໄລຍະການສືບຕໍ່ບູລະນະແນວທາງປ່ຽນແປງໃໝ່, ຊຸກຍູ້ການພັດທະນາເສດຖະກິດ-ສັງຄົມ, ເປີດກວ້າງການທູດ ແລະ ດຶງດູດການລົງທຶນຈາກຕ່າງປະເທດ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ກອງປະຊຸມໃຫຍ່ ຄັ້ງທີ  V ເນື້ອໃນຈິດໃຈ: “ສືບຕໍ່ບູລະນະລະບອບປະຊາທິປະໄຕປະຊາຊົນ, ເພີ່ມທະວີຄວາມສາມັກຄີທົ່ວປວງຊົນ, ຊຸກຍູ້ການປ່ຽນແປງໃໝ່ຢ່າງຮອບດ້ານ, ສ້າງປະເທດລາວ ໃຫ້ມີສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.”

*. ກອງປະຊຸມໃຫຍ່ ຄັ້ງທີ  VI ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ຍົກສູງບົດບາດນຳພາຂອງພັກ, ຊຸກຍູ້ຂະບວນການປ່ຽນແປງໃໝ່ໃຫ້ແຂງແຮງ, ສ້າງປະຖົມປັດໄຈໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ.”

*. ກອງປະຊຸມໃຫຍ່ ຄັ້ງທີ  VII ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ຍົກສູງຄວາມສາມາດນຳພາ ແລະ ສູ້ຮົບຂອງພັກ, ສືບຕໍ່ພາລະກິດປ່ຽນແປງໃໝ່ຢ່າງຮອບດ້ານ, ສ້າງປະຖົມປັດໄຈເພື່ອການຫັນເປັນອຸດສາຫະກຳ ແລະ ທັນສະໄໝ, ນຳພາປະເທດຊາດຫຼຸດພົ້ນອອກຈາກສະຖານະພາບຄວາມທຸກຍາກ ແລະ ດ້ອຍພັດທະນາ.”

*. ກອງປະຊຸມໃຫຍ່ ຄັ້ງທີ  VIII ເນື້ອໃນຈິດໃຈ: ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນ, ຢຶດໝັ້ນຈຸດໝາຍປ່ຽນແປງໃໝ່ຢ່າງຮອບດ້ານ, ພັດທະນາເສດຖະກິດ-ສັງຄົມ ໃຫ້ກ້າວຂຶ້ນຢ່າງໄວວາ ແລະ ຍືນຍົງ, ຍູ້ແຮງການຫຼຸດພົ້ນອອກຈາກຄວາມດ້ອຍພັດທະນາ.

*. ກອງປະຊຸມໃຫຍ່ ຄັ້ງທີ  IX ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ເຊີດຊູຄວາມເປັນຜູ້ນຳພາຂອງພັກ, ບຸກທະລຸທັງ 4 ດ້ານ (ຈິນຕະນາການ, ຊັບພະຍາກອນມະນຸດ, ກົນໄກການບໍລິຫານ, ຄວາມທຸກຍາກ), ສ້າງພື້ນຖານໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ, ນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020.”

*. ກອງປະຊຸມໃຫຍ່ ຄັ້ງທີ X ເນື້ອໃນຈິດໃຈ: “ເພີ່ມທະວີຄວາມສາມັກຄີທົ່ວປວງຊົນ, ຍຶດໝັ້ນແນວທາງປ່ຽນແປງໃໝ່ຢ່າງມີຫຼັກການ, ຍົກສູງຄວາມສາມາດນຳພາຂອງພັກ, ສ້າງລັດແຫ່ງກົດໝາຍທີ່ສັກສິດ, ຍູ້ແຮງການພັດທະນາແບບຍືນຍົງ, ນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວໄປສູ່ຈຸດໝາຍສັງຄົມນິຍົມ.”

*. ກອງປະຊຸມໃຫຍ່ ຄັ້ງທີ XI  (ປີ 2021) ຈັດຂຶ້ນພາຍໃຕ້ສະພາບການທ້າທາຍຂອງໂລກ (ໂດຍສະເພາະແມ່ນການລະບາດຂອງໂຄວິດ-19) ເພື່ອວາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ເນື້ອໃນຈິດໃຈ (ຄຳຂວັນລວມ): “ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ, ຍຶດໝັ້ນແນວທາງປ່ຽນແປງໃໝ່ຢ່າງມີຫຼັກການ, ເຊີດຊູນ້ຳໃຈຮັກຊາດ, ເສີມຂະຫຍາຍພະລັງແຮງຂອງລະບອບປະຊາທິປະໄຕປະຊາຊົນ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອຮັບປະກັນໃຫ້ປະເທດຊາດມີສະຖຽນລະພາບຢ່າງໜັກແໜ້ນ, ເສດຖະກິດ-ສັງຄົມຂະຫຍາຍຕົວຢ່າງຕໍ່ເນື່ອງ, ຄຸນນະພາບຊີວິດຂອງປະຊາຊົນໄດ້ຮັບການຍົກສູງຂຶ້ນ, ສ້າງບາດກ້າວບຸກທະລຸໃນການນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວຂຶ້ນສູ່ຈຸດໝາຍສັງຄົມນິຍົມຢ່າງມີສະຖຽນລະພາບ.”

ກອງປະຊຸມໃຫຍ່ ຄັ້ງທີ XII (ປີ 2026) ເປັນກອງປະຊຸມໃຫຍ່ຄັ້ງຫຼ້າສຸດທີ່ຫາກໍຈັດຂຶ້ນ ເພື່ອປະເມີນຜົນການຈັດຕັ້ງປະຕິບັດໄລຍະຜ່ານມາ ແລະ ວາງທິດທາງຍຸດທະສາດໃໝ່ໃນການນຳພາປະເທດຊາດກ້າວຂຶ້ນຢ່າງໜັກແໜ້ນ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ ( ບົດລາຍງານການເມືອງ) :

ກອງປະຊຸມໃຫຍ່ດໍາເນີນ “ຍົກສູງບົດບາດການນໍາພາທີ່ເຂັ້ມແຂງຂອງພັກ. ຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງສຶບຕໍ່ບູລະນະລະບອບປະຊາທິປະໄຕປະຊາຊົນ. ໃຫ້ໜັກແໜ້ນກ້າວຂື້ນສູ່ສັງຄົມນິຍົມ.
*. ແຜນພັດທະນາເສດຖະກິດສັງຄົມ ( 5 ປີ ) 2026-2030 ພາຍໃຕ້ຄໍາຂວັນ: ຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງນໍາໃຊ້ທຸກທ່າແຮງຢ່າງປະສິດທິຜົນ. ພັດທະນາເສດຖະກິດ-ສັງຄົມ ຕາມທິດວ່ອງໄວ ສີຂຽວ ແລະ ຍືນຍົງຕາມກຳນົດ 6 ເປົ້າໝາຍໃຫ່ຍ.

Bài viết ຄໍາຂັວນກອງປະຊຸມໃຫ່ຍຜູ້ແທນທົ່ວປະເທດ ນັບແຕ່ຄັ້ງທີ I-XII ຂອງພັກປະຊາຊົນປະຕິວັດລາວ đã xuất hiện đầu tiên vào ngày .

ຄໍາຂັວນຂອງກອງປະຊຸມໃຫ່ຍຂອງອົງຄະນະພັກແຂວງຈໍາປາສັກຄັ້ງທີ I-IX   

ຄຳຂວັນ ຫຼື ທິດທາງໜ້າທີ່ລວມຂອງກອງປະຊຸມໃຫຍ່ອົງຄະນະພັກແຂວງຈຳປາສັກ ແຕ່ລະສະໄໝ (ຄັ້ງທີ I ຫາ IX )

ແມ່ນການສະຫຼຸບລວມເອົາເນື້ອໃນຈິດໃຈ, ວິໄສທັດ ແລະ ເປົ້າໝາຍຍຸດທະສາດໃນການພັດທະນາເສດຖະກິດ-ສັງຄົມກໍ່ຄືການປ້ອງກັນຊາດ-ປ້ອງກັນຄວາມສະຫງົບ ຂອງແຂວງໃນແຕ່ລະໄລຍະ.

ກອງປະຊຸມຄັ້ງທີ I ຂອງອົງຄະນະພັກແຂວງ (1984-1989 )

ໄຂຂຶ້ນ ວັນທີ 12-22 ມີນາ 1984 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ສຸມໃສ່ການຟື້ນຟູເສດຖະກິດຫຼັງສົງຄາມ, ຫັນປ່ຽນກົນໄກການຄຸ້ມຄອງໃໝ່, ປັບປຸງຮາກຖານການເມືອງໃຫ້ໜັກແໜ້ນ ແລະສ້າງປະຖົມປັດໄຈໃຫ້ແກ່ການກ້າວຂຶ້ນສັງຄົມນິຍົມ ເທື່ອລະກ້າວ.

ກອງປະຊຸມຄັ້ງທີ II  ຂອງອົງຄະນະພັກແຂວງ ( 1989-1994 )

ໄຂຂຶ້ນ ວັນທີ 24 ຕຸລາ 1989 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ເພີ່ມທະວີຄວາມສາມັກຄີທົ່ວປວງຊົນ, ຍູ້ແຮງການຜະລິດກະສິກຳ-ປ່າໄມ້ ຕິດພັນກັບການຫັນເປັນອຸດສາຫະກຳເບົາ, ປັບປຸງຊີວິດການເປັນຢູ່ຂອງປະຊາຊົນ ແລະ ສະກັດກັ້ນທຸກກົນອຸບາຍທຳລາຍເພພັງຂອງອິດທິກຳລັງປໍລະປັກ.

ກອງປະຊຸມໃຫຍ່ ຄັ້ງທີ III ຂອງອົງຄະນະພັກແຂວງ ( 1994-2000 )

ໄຂຂຶ້ນ ວັນທີ 20-24 ສິງຫາ 1994 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ບຸກທະລຸທາງດ້ານຈິນຕະນາການເສດຖະກິດ, ເປີດກວ້າງການຮ່ວມມືກັບຕ່າງປະເທດ, ຫັນເສດຖະກິດທຳມະຊາດໄປສູ່ເສດຖະກິດສິນຄ້າ ແລະ ສ້າງຄວາມເຂັ້ມແຂງໃຫ້ແກ່ລະບົບການເມືອງແຕ່ຮາກຖານ.

ກອງປະຊຸມໃຫຍ່ ຄັ້ງທີ IV ຂອງອົງຄະນະພັກແຂວງ ( 2001-2005 )

ໄຂຂຶ້ນ ວັນທີ 28 ທັນວາ 2000 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ສືບຕໍ່ບູລະນະລະບອບປະຊາທິປະໄຕປະຊາຊົນ, ຊຸກຍູ້ການເຕີບໂຕທາງເສດຖະກິດຢ່າງຕໍ່ເນື່ອງ, ແກ້ໄຂຄວາມທຸກຍາກຂອງປະຊາຊົນບັນດາເຜົ່າ ແລະ ຫັນເອົາກຳລັງລົງກໍ່ສ້າງຮາກຖານການເມືອງຢ່າງແຂງແຮງ.

ກອງປະຊຸມໃຫຍ່ ຄັ້ງທີ V ຂອງອົງຄະນະພັກແຂວງ ( 2005-2010 )

ໄຂຶ້ນ ວັນທີ 21-23 ພະຈິກ 2005 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ເພີ່ມທະວີຄວາມສາມັກຄີທົ່ວປວງຊົນ, ຍົກສູງຄວາມສາມາດນຳພາຂອງພັກ, ຂຸດຄົ້ນທຸກທ່າແຮງບົ່ມຊ້ອນເພື່ອພັດທະນາເສດຖະກິດ-ສັງຄົມໃຫ້ຂະຫຍາຍຕົວຢ່າງໄວ ແລະ ໝັ້ນທ່ຽງ, ຮັບປະກັນສະຖຽນລະພາບທາງການເມືອງຢ່າງໜັກແໜ້ນ.

ກອງປະຊຸມໃຫຍ່ ຄັ້ອງງທີ VI ຂອງອົງຄະນະພັກແຂວງ ( 2010-2015 )

ໄຂຂຶ້ນ ວັນທີ 21 ກັນຍາ 2010 ພາຍໃຕ້ເນື້ອໃນຄຳຂວັນ:

ເນື້ອໃນຈິດໃຈຫຼັກ: ຍົກສູງຄວາມສາມາດນຳພາ ແລະ ສີລະທຳປະຕິວັດຂອງພັກ, ເປີດກວ້າງການຮ່ວມມື ແລະ ດຶງດູດການລົງທຶນ, ພັດທະນາພື້ນຖານໂຄງລ່າງ, ສ້າງແຂວງຈຳປາສັກໃຫ້ເປັນສູນກາງເສດຖະກິດຂອງ 4 ແຂວງພາກໃຕ້.

ກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ( 2015-2020 )

ໄຂຂຶ້ນວັນທີ 22-24 ກໍລະກົດ 2015 ພາຍໃຕ້ເນື້ອໃນຄຳຂວັນ:

ຄຳຂວັນລວມ: “ເພີ່ມທະວີຄວາມສາມັກຄີເປັນເອກະພາບ, ຍົກສູງຄວາມສາມາດນຳພາ ແລະ ລັກສະນະຕໍ່ສູ້ຂອງອົງຄະນະພັກ, ສ້າງຈຸດພິກຂຸ້ນໃໝ່ໃນການພັດທະນາເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນຢ່າງຂາດຕົວ, ສ້າງແຂວງຈຳປາສັກໃຫ້ມັ່ງຄັ່ງເຂັ້ມແຂງ.”

ກອງປະຊຸມໃຫຍ່ ຄັ້ງທີ VIII ( 2020-2025 )

ໄຂຂຶ້ນ ວັນທີ 29-30 ຕຸລາ 2020 ພາຍໃຕ້ເນື້ອໃນຄຳຂວັນ:

ຄຳຂວັນລວມ: “ເພີ່ມທະວີຄວາມສາມັກຄີທົ່ວປວງຊົນ, ຍົກສູງຄວາມສາມາດນຳພາຂອງພັກ, ບຸກທະລຸໃນການພັດທະນາ, ຮັບປະກັນໃຫ້ແຂວງມີສະຖຽນລະພາບ, ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ, ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ, ເຊື່ອມໂຍງກັບພາກພື້ນ ແລະ ສາກົນ.”

ກອງປະຊຸມໃຫ່ຍ ຄັງທີ IX ( 2025-2030 )

                  ໄຂຂຶ້ນ ວັນທີ 24-25 ກັນຍາ 2025 ພາຍໃຕ້ເນື້ອໃນຄຳຂວັນ:

 ພາຍໃຕ້ຄຳຂັວນ: ຍົກສູງຄວາມສາມາດນຳພາຂອງພັກ ເພີ່ມທະວີການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍເສີມຂະຫຍາຍກຳລັງແຮງງານລວມສ້າງເສດຖະກິດເອກະລາດເປັນ ເຈົ້າຕົນເອງຢ່າງແຂງແຮງ, ສ້າງແຂວງຈຳປາສັກເພື່ອສູນກາງພັດທະນາຂອງພາຍໃຕ້ ເຮັດໃຫ້ປວງປະຊາຢູ່ດີກິນດີ.

*. ທິດທາງແຜນພັດທະນາເສດຖະກິດ–ສັງຄົມ 5ປີ ຄັ້ງທີ X ( 2026-2030 ) ຂອງແຂວງຈຳປາສັກ ພາຍໃຕ້ຄຳຂັວນ: ຍູ້ແຮງພັດທະນາເສດຖະກິດ–ສັງຄົມ ໃຫ້ຂະຫຍາຍຕົວ ແລະ ມີປະສິດທິພາບ ນຳໃຊ້ທຸກທ່າແຮງບົ່ມຊ້ອນຢ່າງມີປະສິດທິຜົນ. ຕາມທິດສີຂຽວ ແລະ ຍືນຍົງ. ຕັ້ງໜ້າເສດຖະກິດເອກະສາດເປັນເຈົາຕົນເອງ.

          #.ໝາຍເຫດ: ໃນໄລຍະກອງປະຊຸມໃຫ່ຍ ຄັ້ງທີ I ຫາ IV (ໄລຍະປີ 1970-1990 ປາຍ), ເນື້ອໃນມັກຈະຖືກກຳນົດເປັນ “ທິດທາງໜ້າທີ່ລວມ” ທີ່ມີເນື້ອໃນຍາວ ແລະ ກວມລວມ, ກ່ອນທີ່ໄລຍະຫຼັງ (ຄັ້ງທີ V-IX) ຈະມີການສະຫຼຸບຫຍໍ້ໃຫ້ເປັນ “ຄຳຂວັນ” ທີ່ກະທັດຮັດ ແລະ ຊັດເຈນຂຶ້ນ ເພື່ອປຸກລະດົມຂະບວນການແຂ່ງຂັນຮັກຊາດ ແລະ ພັດທະນາ.

Bài viết ການປົກປັກຮັກສາ ແລະ ສ້າງສາພັດທະນາ ແຂວງຈຳປາສັກ ພາຍໃຕ້ຮົ່ມທຸງໄຊຂອງພັກ ແລະ ພາຍໃຕ້ເນື້ອໃນຄຳຂວັນຂອງແຕ່ລະສະໄໝ   ຄັ້ງທີ I- IX đã xuất hiện đầu tiên vào ngày .

         ວັນທີ 10 ມິຖຸນາ 2026, ສະຫາຍ​ ທອງລຸນ ສີສຸລິດ​ ເລຂາທິການໃຫຍ່​ ຄະນະບໍລິຫານງານສູນກາງພັກ​ ປະທານ​ປະເທດ​ແຫ່ງ ສປປ ລາວ​ ພ້ອມຄະນະ​ ໄດ້ເດີນທາງມາເຄື່ອນໄຫວວຽກງານຢູ່ແຂວງຈໍາປາສັກ​ ແລະ​ ໄດ້ພົບປະໂອ້ລົມ​ພະນັກງານ​ຫຼັກແຫຼ່ງແຂວງຈໍາປາສັກ.​ ການພົບປະຄັ້ງນີ້ ຈັດຂຶ້ນ​ຢູ່ຫ້ອງປະຊຸມໃຫຍ່ສະໂມສອນແຂວງ​ ໂດຍມີສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລຂາຄະບໍລິຫານງານພັກແຂວງ ປະທານ​ສະພາ​ປະຊາຊົນ​ແຂວງຈໍາປາສັກ,​ ບັນດາສະຫາຍການນໍາພັກ​ – ລັດ​ ຈາກສູນກາງ,​ ບັນດາສະຫາຍຮອງເລຂາຄະນະບໍລິຫານງານພັກແຂວງ,​ ຄະນະ​ກຳມະ​ການປົກຄອງ​ແຂວງ,​ ກໍາມະການພັກແຂວງ,​ ເລຂາຄະນະ​ບໍລິຫານ​ງານພັກ​ເມືອງ,​ ຄະນະກໍາມະການປົກຄອງເມືອງ, ພະນັກງານ​ອາວຸໂສ​ບໍາ​ນານ,​ ອະດີດ​ການນໍາແຂວງ,​ ການນໍາ​ພະແນກ​ການກົມກອງ,​ ສະຖາບັນການສຶກສາ​ ອ້ອມຂ້າງ​ແຂວງ​ ​ແລະ​ ຂະແໜງການ​ທີ່​ກ່ຽວຂ້ອງ​ ເຂົ້າ​ຮ່ວມ.​​

        ໂອກາດນີ້,​ ສະຫາຍ ອາລຸນໄຊ​ ສູນນະລາດ​ ກຳມະການ​ສູນກາງ​ພັກ​ ເລຂາຄະນະບໍລິຫານພັກແຂວງ ປະທານສະພາປະຊາຊົນ ແຂວງ ກໍໄດ້ກ່າວຕ້ອນຮັບ ແລະ ລາຍງານສະພາບການນໍາພາ​ – ຊີ້ນໍາ ວຽກງານ ຮອບດ້ານຂອງແຂວງ ໃນໄລຍະ​ຜ່ານມາ​ ໃຫ້ສະຫາຍ​ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ຮັບຊາບ​ໂດຍສັງເຂບ.​

               ຈາກນັ້ນ,​ ສະຫາຍ​ທອງລຸນ​ ສີສຸລິດ​ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ​ ກໍໄດ້ໃຫ້ກຽດມີຄໍາເຫັນ​ໂອ້ລົມ,​ ເນື້ອໃນ​ສໍາຄັນ​ ສະຫາຍໄດ້ເນັ້ນໜັກ​ໃຫ້ຄະນະພັກ​ -​ ຄະນະ​ກໍາມະ​ການປົກຄອງ​ແຂວງ​ ສືບຕໍ່ສຸມໃສ່ຊອກຄົ້ນທ່າແຮງທີ່ບົ່ມຊ້ອນຂອງແຂວງ​ ແລ້ວສືບຕໍ່ວາງມາດຕະການໃນການພັດທະນາ​ ໂດຍນໍາໃຊ້ທ່າແຮງດັ່ງກ່າວ​ປະກອບສ່ວນ​ໃນ​ການພັດທະນາ​ເສດຖະກິດ​ -​ ສັງຄົມ​ໃຫ້ຈະເລີນເຕີບໂຕ; ຍົກສູງບົດບາດການນໍາພາຂອງຄະນະພັກ​ -​ ຄະນະ​ກໍາມະ​ການປົກຄອງ​ແຕ່ລະຂັ້ນ, ເພີ່ມທະວີຄວາມເປັນແບບຢ່າງຂອງສະມາຊິກພັກ -​ ພະນັກງານ​ ເພື່ອສ້າງ​ຄວາມເຊື່ອໝັ້ນໃຫ້ແກ່ປະຊາຊົນ,​ ນໍາພາ​ -​ ຊີ້ນໍາແກ້ໄຂບັນຫາກຍຸ້ງຍາກຫຼ້າຫຼັງ​ ເພື່ອນໍາເອົາຜົນປະໂຫຍດ​ມາໃຫ້​ປະຊາຊົນ,​ ສາມາດ​ພັດທະນາ​ຊີວິດການເປັນຢູ່ຂອງປະຊາຊົນບັນດາເຜົ່າຊາວແຂວງຈໍາປາສັກ​ ໃຫ້ນັບມື້ດີຂຶ້ນ; ຮັກສາ​ໄດ້​ ຄວາມສາມັກຄີພາຍໃນຄະນະພັກ​ -​ ຄະນະກໍາມະການປົກຄອງ​ແຂວງ​ ໃຫ້ເປັນປຶກແຜ່ນແໜ້ນໜາ,​ ນໍາພາ​ -​ ຊີ້ນໍາວຽກງານ​ ປກຊ​ -​ ປກສ​ ໃຫ້ແຂງແຮງກວ່າເກົ່າ ເພື່ອຮັບປະກັນໃຫ້ແຂວງມີຄວາມສະຫງົບທາງດ້ານການເມືອງ,​ ມີຄວາມເປັນລະບຽບຮຽບຮ້ອຍທາງສັງຄົມ; ເອົາໃຈໃສ່ປັບປຸງກົງຈັກການຈັດຕັ້ງຂັ້ນຕາແສງ​ ໃຫ້ມີຄວາມໜັກແໜ້ນເຂັ້ມແຂງ ທາງດ້ານ​ການເມືອງ,​ ແນວຄິດ,​ ການຈັດຕັ້ງ​ ແລະ​ ແບບແຜນວິທີເຮັດວຽກ; ປຸກລະດົມຂົນຂວາຍໃຫ້ທົ່ວປວງຊົນ​ ມີສະຕິຕື່ນຕົວ,​ ປະກອບສ່ວນ​ໃນການ​ແຂ່ງຂັນຂະບວນການ​ຮັກຊາດ​ ແລະ​ ພັດທະນາ,​ ມີສະຕິລະວັງຕົວຕໍ່ກົຮອຸບາຍມ້າງເພທໍາລາຍຂອງສັດຕູ,​ ຕ້ານ​ ແລະ​ ສະກັດກັ້ນ​ ປາກົດ​ກາ​ນຫຍໍ້​ທໍ້ຕ່າງໆໃນສັງຄົມ​ ເປັນຕົ້ນ​ແມ່ນ​ ບັນຫາຢາເສບຕິດ,​ ບັນຫາ​ອຸບັດເຫດຕາມທ້ອງຖະໜົນ,​ ການຕົວະຍົວະຫຼອກລວງໃນສື່ສັງຄົມອອນລາຍ,​ ສະແກມເມີ ແລະ​ ອື່ນໆ​ໃຫ້ຫຼຸດໜ່ອຍຖືຍລົງ.​ ນອກນັ້ນ,​ ກໍເອົາໃຈໃສ່ເປີດກວ້າງການພົວພັນຮ່ວມມືກັບພາຍນອກ​ ເພື່ອດຶງດູດການລົງທຶນ​ ຈາກ​ຕ່າງ​ປະເທດ​ ມາປະກອບສ່ວນໃນການພັດທະນາເສດຖະກິດ -​ ສັງຄົມ​ຂອງແຂວງ​ ໃຫ້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.

ຂ່າວ​-ພາບ​: ທູນທອງໃຈ

Bài viết ສະຫາຍ​ ທອງລຸນ​ ສີສຸລິດ ເລຂາທິການໃຫຍ່​ ປະທານ​ປະເທດ​ແຫ່ງ ສປປ ລາວ​ ພົບປະ​ໂອ້ລົມ​ພະນັກງານ​ຫຼັກແຫຼ່ງແຂວງຈໍາປາສັກ đã xuất hiện đầu tiên vào ngày .

             ໃນຕອນເຊົ້າຂອງ ວັນທີ 9 ມິຖຸນາ 2026, ເມືອງປະທຸມພອນ ໄດ້ຈັດພິທີສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ 1 ມິຖຸນາ 2026 ແລະ ວັນສິ່ງແວດລ້ອມໂລກ 5 ມິຖຸນາ 2026 ຂຶ້ນຢູ່ ທີ່ໂຮງຮຽນປະຖົມສົມບູນ ບ້ານຫຼັກສີ່ສິບ
ໃຫ້ກຽດເຂົ້າຮ່ວມເປັນປະທານໃນພິທີໂດຍ ທ່ານ ປະດິດ ວັນນະລັດສະໝີ ກຳມະການປະຈຳພັກແຂວງ ຫົວໜ້າຄະນະໂຄສະນາອົງຮົມແຂວງ(ຜູ້ຊີ້ນຳວຽກງານຮອບດ້ານເມືອງປະທຸມພອນ), ທ່ານ ສົມຈິດ ແພງສະຫວັດ ກຳມະການພັກແຂວງ ເລຂາຄະນະບໍລິຫານງານພັກເມືອງປະທຸມພອນ. ພ້ອມດ້ວຍບັນດາທ່ານຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ບໍລິສັດດັກລັກຣັບເບີຈຳກັດ(ຜູ້ສະໜັບສະໜູນການຈັດງານ), ກຳລັງປກສ-ປກຊ, ຄະນະກຳມະການປົກຄອງ 5 ຕາແສງ, ບັນດາແຂກທີ່ຖຶກເຊີນ, ພະນັກງານ-ລັດຖະກອນ, ອົງການປົກຄອງບ້ານຫຼັກສີ່ສິບ ພ້ອມດ້ວຍຄູ-ອາຈານ ແລະ ນັກຮຽນ ເຂົ້າຮ່ວມພິທີຢ່າງພ້ອມພຽງ.

              ການຈັດກິດຈະກຳໃນຄັ້ງນີ້ ມີຈຸດປະສົງເພື່ອສືບສານປະເພນີອັນດີງາມໃນການອະນຸລັກ ແລະ ຟື້ນຟູຊັບພະຍາກອນປ່າໄມ້, ສ້າງຈິດສຳນຶກໃຫ້ພາກສ່ວນຕ່າງໆ ແລະ ປະຊາຊົນ ໃຫ້ເຫັນຄວາມສຳຄັນຂອງການປົກປັກຮັກສາສິ່ງແວດລ້ອມ, ການເພີ່ມພື້ນທີ່ສີຂຽວ ແລະ ການຮ່ວມມືກັນຮັບມືກັບການປ່ຽນແປງສະພາບດິນຟ້າອາກາດ.
#ໃນໂອກາດນີ້ ທ່ານ ປະດິດ ວັນນະລັດສະໝີ ໄດ້ເນັ້ນໜັກໃຫ້ທຸກຂະແໜງການ, ອົງການຈັດຕັ້ງ ແລະ ປະຊາຊົນ ສືບຕໍ່ປຸກຈິດສຳນຶກໃນການຮັກສາປ່າໄມ້, ອະນຸລັກທຳມະຊາດ, ຫຼຸດຜ່ອນການທຳລາຍສິ່ງແວດລ້ອມ ແລະ ຮ່ວມກັນປູກຕົ້ນໄມ້ໃຫ້ຫຼາຍຂຶ້ນ ເພື່ອສ້າງຄວາມຂຽວງາມ ແລະ ຄວາມຍືນຍົງໃຫ້ແກ່ສັງຄົມ.
ຫຼັງຈາກສຳເລັດພິທີເປີດ ບັນດາຜູ້ເຂົ້າຮ່ວມໄດ້ພ້ອມໃຈກັນປູກຕົ້ນໄມ້ພາຍໃນບໍລິເວນໂຮງຮຽນ ເພື່ອປະກອບສ່ວນໃນການອະນຸລັກສິ່ງແວດລ້ອມ, ສ້າງພູມສັນຖານສີຂຽວ ແລະ ສົ່ງເສີມໃຫ້ນັກຮຽນໄດ້ຮຽນຮູ້ເຖິງຄຸນຄ່າຂອງຕົ້ນໄມ້ ແລະ ທຳມະຊາດ. ບັນຍາກາດຂອງກິດຈະກຳເປັນໄປດ້ວຍຄວາມຄຶກຄື້ນ, ສາມັກຄີ ແລະ ຮັບຜິດຊອບຕໍ່ການອະນຸລັກສິ່ງແວດລ້ອມຮ່ວມກັນ.

#ຂ່າວ-ພາບ: ສີສົມບູນ ວົງວຽງຄຳ

Bài viết ຫົວໜ້າຄະນະໂຄສະນາອົບຮົມແຂວງ ຮ່ວມຂະບວນປູກຕົ້ນໄມ້ຢູ່ເມືອງ ປະທຸມພອນ đã xuất hiện đầu tiên vào ngày .

              ໃນວັນທີ 13 ມິຖຸນາ 2026 ນີ້, ຢູ່ທີ່ຈຸດບ້ານນໍ້າພາກ (ເຂດອຸທິຍານແຫ່ງຊາດດົງຫົວສາວ) ແລະ ຢູ່ທີ່ຈຸດພູດິນ ບ້ານກຽດໂງ້ງ (ເຂດອຸທິຍານແຫ່ງຊາດ ເຊປຽນ) ເມືອງປະທຸມພອນ ແຂວງຈຳປາສັກ,ພະແນກກະສິກຳ ແລະ ສິ່ງແວດລ້ອມແຂວງ ຈຳປາສັກ ຮ່ວມກັບ ກອງຄຸມຄອງອຸທິຍານແຫ່ງຊາດດົງຫົວສາວ, ກອງຄຸ້ມຄອງອຸທິຍານແຫ່ງຊາດ ເຊປຽນ, ອົງການປົກຄອງເມືອງປະທຸມພອນ, ອົງການກອງທຶນອະນຸລັກທຳມະຊາດໂລກ ປະຈຳ ສປປ ລາວ (WWF-Laos) ແລະ ບໍລິສັດ ລາວຮາຍຊຽງ ຊັບພະຍາກອນທຳມະຊາດ ຈຳກັດຜູ້ດຽວ ໄດ້ຮ່ວມກັນຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ ຄົບຮອບ 46 ປີ (1 ມິຖຸນາ 1980 – 2026) ຕິດພັນກັບວັນເດັກນ້ອຍສາກົນ, ວັນສິ່ງແວດລ້ອມໂລກ ຄົບຮອບ 53 ປີ ແລະ ວັນສິ່ງແວດລ້ອມແຫ່ງຊາດ ຄົບຮອບ 27 ປີ (5 ມິຖຸນາ) ພາຍໃຕ້ຄຳຂວັນ “ເຖິງເວລາແລ້ວ ພວກເຮົາຕ້ອງໃສ່ໃຈຕໍ່ສະພາບພູມອາກາດ ໃຫ້ສົດໃສ ແລະ ສົດຊື່ນ” (#NowForClimate).

              ໃຫ້ກຽດເຂົ້າຮ່ວມ ແລະ ກ່າວເປີດພິທີໂດຍ ທ່ານ ປະດິດ ວັນນະລັດສະໝີ, ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ, ໂດຍມີ ທ່ານ ສົມຈິດ ແພງສະຫວັດ, ກຳມະການພັກແຂວງ, ເລຂາພັກເມືອງ, ປະທານສະພາປະຊາຊົນປະຈຳເມືອງປະທຸມພອນ; ທ່ານ ຄຳ ນີລະວົງ, ກຳມະການພັກແຂວງ, ຫົວໜ້າພະແນກກະສິກຳ ແລະ ສິ່ງແວດລ້ອມແຂວງ, ພ້ອມດ້ວຍບັນດາການນຳແຂວງ, ເມືອງ, ຜູ້ຕາງໜ້າຈາກພາກທຸລະກິດ, ຕະຫຼອດຮອດພໍ່ແມ່ປະຊາຊົນ ແລະ ນ້ອງນ້ອຍນັກຮຽນ ເຂົ້າຮ່ວມຢ່າງພ້ອມພຽງ.

            ໃນພິທີ, ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ກ່າວເນັ້ນໜັກເຖິງຄວາມສຳຄັນຂອງປ່າໄມ້ ທີ່ເປັນຊັບພະຍາກອນອັນລໍ້າຄ່າ ແລະ ຕິດພັນກັບການດຳລົງຊີວິດຂອງປະຊາຊົນ. ການປົກປັກຮັກສາປ່າໄມ້ ແລະ ສິ່ງແວດລ້ອມ ແມ່ນວຽກງານຍຸດທະສາດທີ່ສຳຄັນ ຕາມທິດທາງພັດທະນາສີຂຽວ ແລະ ຍືນຍົງ ໂດຍສຸມໃສ່ຍຸດທະສາດການເພີ່ມເນື້ອທີ່ປົກຫຸ້ມຂອງປ່າໄມ້ໃຫ້ບັນລຸ 70% ໃນປີ 2030. ຄຽງຄູ່ກັນນັ້ນ, ທ່ານຍັງໄດ້ຮຽກຮ້ອງໃຫ້ເອົາໃຈໃສ່ພັດທະນາຊັບພະຍາກອນມະນຸດ ໂດຍສະເພາະແມ່ນເດັກນ້ອຍ ແລະ ເຍົາວະຊົນ ໃຫ້ມີຄຸນນະພາບ, ມີສະຕິຮັກ ແລະ ຫວງແຫນທຳມະຊາດ ເພື່ອສ້າງຄົນຮຸ່ນໃໝ່ທີ່ຈະກາຍເປັນຜູ້ສືບທອດທີ່ດີຂອງຊາດໃນອະນາຄົດ ດັ່ງຄຳຂວັນທີ່ວ່າ “ປູກຕົ້ນໄມ້ໃນວັນນີ້ ເພື່ອລູກຫຼານໃນວັນໜ້າ, ເດັກນ້ອຍທີ່ດີໃນວັນນີ້ ຄືຜູ້ໃຫຍ່ທີ່ມີຄຸນນະພາບໃນອະນາຄົດ”.

             ໂອກາດດຽວກັນ, ທ່ານ ຄຳ ນີລະວົງ ຫົວໜ້າພະແນກກະສິກໍາ ແລະ ສິ່ງແສດລ້ອມ ໄດ້ມີຄໍາເຫັນໃຫ້ຮູ້ກ່ຽວກັບແຜນການຟື້ນຟູ ແລະ ປູກປ່າ ໂດຍສະເພາະໃນເຂດອຸທິຍານແຫ່ງຊາດດົງຫົວສາວ (ເຊິ່ງມີເນື້ອທີ່ທັງໝົດ 99.795 ເຮັກຕາ, ກວມເອົາເຂດເມືອງປະທຸມພອນ 57.42%). ໃນໄລຍະປີ 2025 ຜ່ານມາ ສາມາດປູກໄມ້ໄດ້ 5 ເຮັກຕາ ແລະ ຟື້ນຟູປ່າແບບທຳມະຊາດໄດ້ 1.500 ເຮັກຕາ. ສໍາລັບປີ 2026 ນີ້, ອຸທິຍານແຫ່ງຊາດດົງຫົວສາວ ມີແຜນການທີ່ຈະປູກໄມ້ທັງໝົດ ຈຳນວນ 120 ເຮັກຕາ ໂດຍຈະເລີ່ມປູກຢູ່ບ້ານນໍ້າພາກ 3 ເຮັກຕາ, ບ້ານສົມສຸກ ແລະ ບ້ານນາບອນ ບ້ານລະ 5 ເຮັກຕາ, ພ້ອມທັງສົ່ງເສີມປະຊາຊົນປູກຕົ້ນໝາກຈອງ ແລະ ຮ່ວມມືກັບເຂື່ອນໄຟຟ້ານໍ້າປາກຊ່ອງ ປູກໄມ້ໃນບໍລິເວນອ່າງຮັບນໍ້າຕື່ມອີກ 16 ເຮັກຕາ.
#ພ້ອມນີ້ທ່ານ ສົມພານ ແກ້ວຫານາມ, ຫົວໜ້າກອງຄຸ້ມຄອງອຸທິຍານແຫ່ງຊາດ ເຊປຽນ ໄດ້ຂຶ້ນລາຍງານການກະກຽມຄວາມພ້ອມ ໂດຍຍົກໃຫ້ເຫັນວ່າ: ໃນທົ່ວແຂວງຈຳປາສັກ ມີເນື້ອທີ່ປ່າໄມ້ທັງໝົດ 1.062.648 ເຮັກຕາ, ກວມ 69,23% ຂອງເນື້ອທີ່ທົ່ວແຂວງ. ສຳລັບແຜນການປູກໄມ້ໃນປີ 2026 ນີ້, ອຸທິຍານແຫ່ງຊາດ ເຊປຽນ ມີແຜນການປູກໄມ້ໃນເຂດອຸທິຍານໃຫ້ໄດ້ 15 ເຮັກຕາ, ຟື້ນຟູປ່າແບບທຳມະຊາດ ແລະ ປູກເສີມກ້ອງປ່າໃຫ້ໄດ້ 785 ເຮັກຕາ. ສະເພາະຂະບວນການປູກໄມ້ເນື່ອງໃນວັນປູກຕົ້ນໄມ້ແຫ່ງຊາດຄັ້ງນີ້ ແມ່ນໄດ້ຮ່ວມກັບ ອົງການ WWF-Laos ປູກໃນພື້ນທີ່ກຳນົດ 8 ເຮັກຕາ ຢູ່ຈຸດພູດິນ ບ້ານກຽດໂງ້ງ, ນຳໃຊ້ເບ້ຍໄມ້ທັງໝົດ 10,000 ເບ້ຍ (ມີ 11 ຊະນິດໄມ້ ເປັນຕົ້ນແມ່ນ ໄມ້ດູ່, ໄມ້ແຄນ, ໄມ້ແຕ້ຂ່າ, ໄມ້ຂະຍຸງ, ໄມ້ຍາງ ແລະ ໄມ້ໝາກຈອງ). ນອກຈາກນີ້, ຍັງມີແຜນປູກຢູ່ເຂດອຸທິຍານແຫ່ງຊາດດົງຫົວສາວ ອີກຈຳນວນ 120 ເຮັກຕາ, ໃນນັ້ນປູກຢູ່ບ້ານນຳ້ພາກ 3 ເຮັກຕາ (ໂດຍການສະໜັບສະໜູນ ຈາກບໍລິສັດ ລາວຮາຍຊຽງ ຊັບພະຍາກອນທຳມະຊາດ ຈຳກັດຜູ້ດຽວ), ບ້ານສົມສຸກ ແລະ ບ້ານນາບອນ ບ້ານລະ 5 ເຮັກຕາ ພ້ອມທັງສົ່ງເສີມປະຊາຊົນປູກໄມ້ ແລະ ຮ່ວມກັບເຂື່ອນໄຟຟ້ານໍ້າປາກຊ່ອງ ປູກໃນເຂດອ່າງຮັບນໍ້າອີກ 16 ເຮັກຕາ.

              ໃນຕອນທ້າຍຂອງພິທີ ຍັງໄດ້ມີການມອບເບ້ຍໄມ້ ແລະ ໃບກຽດຕິຄຸນ ໃຫ້ແກ່ຜູ້ສະໜັບສະໜູນຫຼັກ ເປັນຕົ້ນແມ່ນ ອົງການ WWF-Laos, ບໍລິສັດ ໄຟຟ້າແສງຕາເວັນ ບ້ານໂພນສະອາດ (ຈະເລີນເຊກອງ) ແລະ ບໍລິສັດ ລາວຮາຍຊຽງ ຊັບພະຍາກອນທຳມະຊາດ ຈຳກັດຜູ້ດຽວ. ພ້ອມດຽວກັນນັ້ນ, ຄະນະປະທານກໍ່ໄດ້ຮ່ວມກັນມອບຂອງຂວັນວັນເດັກ ໃຫ້ແກ່ນ້ອງນ້ອຍນັກຮຽນ ແລະ ນຳພາຜູ້ເຂົ້າຮ່ວມທັງໝົດ ລົງມືປູກຕົ້ນໄມ້ ເພື່ອສ້າງຂະບວນການສະເຫຼີມສະຫຼອງວັນສຳຄັນດັ່ງກ່າວ ໃຫ້ມີບັນຍາກາດຟົດຟື້ນ ແລະ ມີຄວາມໝາຍເລິກເຊິ່ງ. ຫຼັງຈາກນີ້, ທາງຄະນະຮັບຜິດຊອບ ຈະໄດ້ມອບໝາຍຄວາມຮັບຜິດຊອບ ໃຫ້ແກ່ອົງການຈັດຕັ້ງທ້ອງຖິ່ນ, ພາກສ່ວນກ່ຽວຂ້ອງ ແລະ ປະຊາຊົນ ໃນການຕິດຕາມ, ບົວລະບັດຮັກສາ ແລະ ປູກສ້ອມແຊມຕົ້ນໄມ້ທີ່ຕາຍ ເພື່ອຮັບປະກັນໃຫ້ຕົ້ນໄມ້ທີ່ປູກໃນມື້ນີ້ ສາມາດຈະເລີນເຕີບໂຕກາຍເປັນຜືນປ່າທີ່ອຸດົມສົມບູນ ແລະ ຂຽວສົດງົດງາມໃນອະນາຄົດ.

ຂ່າວ-ພາບ: ຈັນທະວີສັກ

Bài viết ຈັດພິທີສະເຫຼີມສະຫຼອງວັນປູກຕົ້ນໄມ້ແຫ່ງຊາດ, ວັນເດັກນ້ອຍສາກົນ ແລະ ວັນສິ່ງແວດລ້ອມ ປະຈຳປີ 2026 ຢ່າງຟົດຟື້ນ ພ້ອມຕັ້ງເປົ້າປູກໄມ້ໃຫ້ໄດ້ 120 ເຮັກຕາ ໃນເຂດອຸທິຍານແຫ່ງຊາດດົງຫົວສາວ đã xuất hiện đầu tiên vào ngày .

ຕອນເຊົ້າວັນທີ 10 ມີຖຸນາ 2026 ນີ້, ຢູ່ທີ່ຄະນະໂຄສະນາອົບຮົມແຂວງຈຳປາສັກ ໄດ້ຈັດຊຸດຝຶກອົບຮົມເພື່ອສ້າງຄວາມເຂັ້ມແຂງກ່ຽວກັບຫຼັກການເວົ້າທີ່ດີ, ວຽກພິທີການ ແລະ ມາລະຍາດທາງສັງຄົມ ໃຫ້ແກ່ພະນັກງານ-ລັດຖະກອນ ພາຍໃນກົມກອງຂອງຕົນ. ໂດຍການໃຫ້ກຽດເຂົ້າຮ່ວມ ແລະ ເປັນປະທານຂອງ ທ່ານ ນາງ ສຸກສົມພອນ ພົນອາສາ ຮອງຫົວໜ້າຄະນະໂຄສະນາອົບຮົມແຂວງຈຳປາສັກ; ມີບັນດາຫົວໜ້າ, ຮອງຫົວໜ້າຂະແໜງການ, ຫ້ອງການ ພ້ອມດ້ວຍສະມາຊິກ 3 ອົງການຈັດຕັ້ງມະຫາຊົນ (ຊາວໜຸ່ມ, ສະຫະພັນແມ່ຍິງ, ກໍາມະບານ) ເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ນາງ ສຸກສົມພອນ ພົນອາສາ ຮອງຫົວໜ້າຄະນະໂຄສະນາອົບຮົມແຂວງ ໄດ້ກ່າວເປີດຊຸດຝຶກອົບຮົມຢ່າງເປັນທາງການ ເຊິ່ງທ່ານໄດ້ເນັ້ນໜັກວ່າ: ຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ ແມ່ນເພື່ອແນໃສ່ໃຫ້ຜູ້ເຂົ້າຮ່ວມໄດ້ຝຶກຝົນຫຼໍ່ຫຼອມ ແລະ ຮຽນຮູ້ກ່ຽວກັບຫຼັກການເວົ້າ, ສາມາດນຳໄປຜັນຂະຫຍາຍໃຫ້ກາຍເປັນຜູ້ເວົ້າທີ່ດີ, ມີຄຸນນະພາບ, ມີຄວາມຈະແຈ້ງ ແລະ ຊັດເຈນໃນທຸກຖ້ອຍຄຳ. ສາມາດສ້າງຄວາມດຶງດູດ ແລະ ຄວາມສົນໃຈໃຫ້ແກ່ຜູ້ຟັງ ເຊິ່ງມີຄວາມສຳຄັນເປັນຢ່າງຍິ່ງ ໂດຍສະເພາະແມ່ນຜູ້ທີ່ເຮັດໜ້າທີ່ວຽກງານສື່ມວນຊົນ, ວຽກງານປະຖະກະຖາ ກໍຄືການປະສານງານ ແລະ ການປາກເວົ້າທົ່ວໄປ ທັງໃນທາງການ ແລະ ບໍ່ເປັນທາງການ. ນອກຈາກນີ້, ຍັງເປັນການສ້າງໂອກາດໃຫ້ພະນັກງານ, ເອື້ອຍນ້ອງສະມາຊິກ 3 ອົງການຈັດຕັ້ງມະຫາຊົນ ໄດ້ພົບປະແລກປ່ຽນບົດຮຽນ, ສ້າງຄວາມສະໜິດສະໜົມ ແລະ ຮັດແໜ້ນຄວາມສາມັກຄີພາຍໃນຮາກຖານໃຫ້ມີຄວາມແໜ້ນແຟ້ນຍິ່ງໆຂຶ້ນ.

#ສຳລັບເນື້ອໃນບົດຮຽນທີ່ນຳມາບັນຍາຍໃນການຝຶກອົບຮົມຄັ້ງນີ້ ປະກອບມີຫຼາຍຫົວຂໍ້ທີ່ສຳຄັນ ເປັນຕົ້ນແມ່ນ: ຄວາມໝາຍຄວາມສຳຄັນຂອງການເວົ້າ, ຫຼັກການ ແລະ ເຕັກນິກການເວົ້າທີ່ດີ, ຂັ້ນຕອນການກຽມຕົວ ແລະ ການເວົ້າໃນທີ່ຊຸມຊົນ. ນອກຈາກນັ້ນ, ຜູ້ເຂົ້າຮ່ວມຍັງໄດ້ຮຽນຮູ້ກ່ຽວກັບວຽກງານພິທີການ ແລະ ມາລະຍາດທາງສັງຄົມຕື່ມອີກ ເຊິ່ງໃຫ້ກຽດຂຶ້ນບັນລະຍາຍໂດຍ ທ່ານ ນາງ ສຸກສົມພອນ ພົນອາສາ ຮອງຫົວໜ້າຄະນະໂຄສະນາອົບຮົມແຂວງຈຳປາສັກ.

Bài viết ຄະນະໂຄສະນາອົບຮົມແຂວງຈຳປາສັກ ຈັດຊຸດຝຶກອົບຮົມກ່ຽວກັບຫຼັກການເວົ້າທີ່ດີ, ວຽກພິທີການ ແລະ ມາລະຍາດທາງສັງຄົມ đã xuất hiện đầu tiên vào ngày .