ໃນໂອກາດດັ່ງກ່າວ, ທ່ານ ປອ. ອາລຸນໄຊ ສູນນະລາດ, ກຳມະການສູນກາງພັກ, ເລຂາພັກແຂວງ, ປະທານສະພາປະຊາຊົນແຂວງ ໄດ້ລາຍງານສະພາບການນຳພາ-ຊີ້ນຳ ວຽກງານຮອບດ້ານໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026. ໂດຍສະເພາະແມ່ນ ການພັດທະນາເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການກໍ່ສ້າງຮາກຖານການເມືອງ, ການພັດທະນາຊົນນະບົດ ແລະ ການລຶບລ້າງຄວາມທຸກຍາກ.

              #ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ອົງຄະນະພັກແຂວງຍາດມາໄດ້. ເຖິງວ່າສະພາບການສາກົນ ແລະ ພາກພື້ນຈະມີການຜັນແປຢ່າງສັບສົນ, ແຕ່ແຂວງຈຳປາສັກຍັງສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ-ປອດໄພ. ພ້ອມນີ້, ຍັງໄດ້ຍ້ອງຍໍຕໍ່ຜົນງານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງສາມາດມ້າງຄະດີ ແລະ ຈັບກຸມຜູ້ກະທຳຜິດໄດ້ 781 ຄົນ, ສະກັດກັ້ນອາຊະຍາກຳທາງໄຊເບີ (ສະແກມເມີ) ໄດ້ທັນການ, ລວມທັງດ້ານເສດຖະກິດ GDP ຂະຫຍາຍຕົວ ບັນລຸໄດ້ 28,251.84 ຕື້ກີບ, ເກັບລາຍຮັບງົບປະມານໄດ້ລື່ນກາຍເຄິ່ງໜຶ່ງຂອງແຜນການປີ ແລະ ມີນະໂຍບາຍ ເຊັ່ນ: ການບໍລິການລົດເມຟຣີ ຢູ່ນະຄອນປາກເຊ ເພື່ອຫຼຸດຜ່ອນພາລະລາຍຈ່າຍຂອງປະຊາຊົນ ໃນທ່າມກາງວິກິດການລາຄານໍ້າມັນ.
ພ້ອມນີ້, ທ່ານນາຍົກລັດຖະມົນຕີ ຍັງໄດ້ຊີ້ໃຫ້ເຫັນ 3 ຂໍ້ຄົງຄ້າງ ແລະ ສິ່ງທ້າທາຍ ທີ່ຕ້ອງໄດ້ຮີບຮ້ອນແກ້ໄຂ ຄື:
– ບັນຫາເສດຖະກິດ-ການເງິນ: ອັດຕາເງິນເຟີ້, ລາຄາສິນຄ້າ ແລະ ນໍ້າມັນເຊື້ອໄຟຜັນຜວນ ກະທົບຕໍ່ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ປະຊາຊົນ.
– ການຈັດຕັ້ງປະຕິບັດ 2 ວາລະແຫ່ງຊາດ: ຢູ່ບາງທ້ອງຖິ່ນຍັງຊັກຊ້າ, ການເກັບລາຍຮັບຍັງມີຊ່ອງໂຫວ່, ການຫັນເປັນທັນສະໄໝ ຍັງກວມລວມ ແລະ ເຄືອຂ່າຍຢາເສບຕິດຍັງມີຄວາມສະຫຼັບຊັບຊ້ອນ.

– ຂົງເຂດວັດທະນະທຳ-ສັງຄົມ: ອັດຕາການປະລະການຮຽນ ແລະ ການຂາດແຄນຄູຢູ່ເຂດຫ່າງໄກສອກຫຼີກຍັງເພີ່ມຂຶ້ນ, ການພັດທະນາສີມືແຮງງານຍັງບໍ່ທັນຕອບສະໜອງໄດ້ຕາມຄວາມຕ້ອງການຂອງຕະຫຼາດ.

          #ເພື່ອຮັບປະກັນໃຫ້ການຈັດຕັ້ງປະຕິບັດແຜນການ 6 ເດືອນທ້າຍປີ 2026 ບັນລຸຜົນສຳເລັດ, ທ່ານ ນາຍົກລັດຖະມົນຕີ ໄດ້ຊີ້ນຳ ແລະ ມອບວຽກງານຈຸດສຸມ 4 ດ້ານ ໃຫ້ແຂວງຈຳປາສັກ ສຸມໃສ່ຈັດຕັ້ງປະຕິບັດ ດັ່ງນີ້:
– ດ້ານເສດຖະກິດ-ການເງິນ: ເພີ່ມທະວີການຄຸ້ມຄອງລາຍຮັບຢ່າງເຂັ້ມງວດ ຕາມກົດໝາຍວ່າດ້ວຍງົບປະມານແຫ່ງລັດ ແລະ ກົດໝາຍວ່າດ້ວຍສ່ວຍສາອາກອນ; ເລັ່ງຫັນເປັນທັນສະໄໝນຳໃຊ້ລະບົບ TaxRIS, EasyTax ແລະ ການຊຳລະຜ່ານທະນາຄານ; ສົ່ງເສີມການຜະລິດພາຍໃນ (ເຂົ້ານາປີ, ພືດຜັກ, ການລ້ຽງສັດ) ເພື່ອທົດແທນການນຳເຂົ້າ ແລະ ສົ່ງອອກ; ກວດກາ-ຄຸ້ມຄອງລາຄາສິນຄ້າອຸປະໂພກ-ບໍລິໂພກ, ປະຕິບັດລະບຽບການກັບຜູ້ກັກຕຸນສິນຄ້າ ແລະ ການບໍລິການແລກປ່ຽນເງິນຕາເຖື່ອນຢ່າງເດັດຂາດ.
– ດ້ານປ້ອງກັນຊາດ-ປ້ອງກັນຄວາມສະຫງົບ: ສືບຕໍ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍເນັ້ນໃສ່ການສະກັດກັ້ນ, ມ້າງເຄືອຂ່າຍ ແລະ ການກວດກາຊາຍແດນ ແລະ ດ່ານສາກົນ, ສະກັດກັ້ນກຸ່ມອາຊະຍາກຳຂ້າມຊາດ (ສະແກມເມີ) ບໍ່ໃຫ້ມີບ່ອນຫຼົບຊ້ອນ.
– ດ້ານການພັດທະນາວັດທະນະທຳ-ສັງຄົມ: ວາງມາດຕະການແກ້ໄຂການປະລະການຮຽນ, ປັບປຸງສະຫວັດດີການ ແລະ ນະໂຍບາຍຕໍ່ຄູອາສາສະໝັກຢູ່ເຂດຫ່າງໄກສອກຫຼີກ; ຍົກລະດັບການບໍລິການສາທາລະນະສຸກຮາກຖານ ແລະ ກຽມພ້ອມຮັບມືກັບໄພພິບັດທຳມະຊາດ (ອຸທົກກະໄພ) ໃນໄລຍະລະດູຝົນຕະຫຼອດ 24 ຊົ່ວໂມງ.
– ດ້ານການປັບປຸງກົນໄກການບໍລິຫານລັດ ແລະ ວຽກງານພັກ-ພະນັກງານ: ປັບປຸງກົນໄກບໍລິຫານ ໃຫ້ກະທັດຮັດ, ໂປ່ງໃສ, ວ່ອງໄວ ໂດຍຫັນເປັນລັດດິຈິຕອນ; ເພີ່ມທະວີການບໍລິການຜ່ານປະຕູດຽວ (One-Stop Service); ເຊີດຊູຄວາມເປັນແບບຢ່າງນຳໜ້າ, ຮັກສາຄວາມສາມັກຄີເປັນເອກະພາບພາຍໃນ ເພື່ອຜ່ານຜ່າທຸກອຸປະສັກ ແລະ ຜັນຂະຫຍາຍມະຕິກອງປະຊຸມ ຄັ້ງທີ 5 ສະໄໝທີ IX ໃຫ້ປະກົດຜົນເປັນຈິງ.

ຂ່າວ-ພາບ: ຈັນທະວີສັກ

Bài viết ທ່ານ ສອນໄຊ ສີພັນດອນ ໂອ້ລົມຕໍ່ກອງປະຊຸມຄົບຄະນະບໍລິຫານງານພັກ ແຂວງຈໍາປາສັກ đã xuất hiện đầu tiên vào ngày .

                #ໃນກອງປະຊຸມ,​ ທ່ານ​ ພູວົງ ກິດຕິວົງ ຮອງລັດຖະມົນຕີກະຊວງການເງິນ​ ໄດ້​ລາຍງານກ່ຽວກັບ​ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 6 ເດືອນຕົ້ນປີ, ທິດທາງແຜນການ 6 ເດືອນທ້າຍປີ 2026 ແລະ ຄວາມຄືບໜ້າການສ້າງແຜນພັດທະນາເຂດແຄວ້ນ ຕິດພັນກັບຍຸດທະສາດເຊື່ອມຈອດເສດຖະກິດ ແລະ ນຳສະເໜີກ່ຽວກັບການພັດທະນາເສດຖະກິດ​ – ສັງຄົມ ແລະ ທິດທາງໃນການສ້າງແຜນພັດທະນາເຂດແຄວ້ນ ຂອງບັນດາ 4 ແຂວງພາກໃຕ້. ຈາກນັ້ນ, ບັນດາກະຊວງ, ສະຖາບັນ ແລະ ອົງການປົກຄອງ 4 ແຂວງພາກໃຕ້ ກໍໄດ້ພ້ອມກັນປະກອບຄຳເຫັນ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ​ – ສັງຄົມ ແລະ ການຊຸກຍູ້ສ້າງແຜນພັດທະນາເຂດແຄວ້ນ ໂດຍສະເພາະທິດທາງໃນການພັດທະນາເຂດແຄວ້ນ 4 ແຂວງພາກໃຕ້ ໃນຕໍ່ໜ້າ ເພື່ອສຸມທຸກສະຕິປັນຍາ ໃນການກຳນົດທິດທາງ​ ເພື່ອນຳໄປຈັດຕັ້ງປະຕິບັດ ແຜນພັດທະນາເຂດແຄວ້ນ ໃຫ້ປະກົດຜົນເປັນຮູບປະທຳ​ ທັງເປັນການຜັນຂະຫຍາຍມະຕິຂອງຄະນະບໍລິຫານງານສູນກາງພັກ ສະໄໝທີ XII ເລກທີ 22/ຫສພ, ລົງວັນທີ 1 ເມສາ 2026 ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ເລກທີ 61/ຫສນຍ, ລົງວັນທີ 22 ເມສາ 2026 ໃນການສ້າງແຜນພັດທະນາເຂດແຄວ້ນ ຕິດພັນກັບຍຸດທະສາດເຊື່ອມຈອດເສດຖະກິດ ກັບປະເທດໃກ້ຄຽງ ແລະ ພາກພື້ນ

              #ຕອນທ້າຍກອງປະຊຸມ, ທ່ານ ສອນໄຊ​ ສີພັນດອນ ນາຍົກລັດຖະມົນຕີ ໄດ້ໃຫ້ກຽດສະຫຼຸບຜົນການດຳເນີນກອງປະຊຸມສຳມະນາຄັ້ງນີ້ ພ້ອມທັງໃຫ້ທິດຊີ້ນຳ ຕໍ່ບັນດາກະຊວງ, ຂະແໜງການ ແລະ ອົງການປົກຄອງ 4 ແຂວງພາກໃຕ້ ໃຫ້ມີຄວາມຈະແຈ້ງ, ບໍ່ຊ້ຳຊ້ອນ ແລະ ສາມາດແຂ່ງຂັນໄດ້ໃນລະດັບພາກພື້ນ,​ ໃນນັ້ນ,​ ການພັດທະນາຂະແໜງກະສິກໍາ ເພື່ອຄໍ້າປະກັນສະບຽງອາຫານ ແລະ ເປັນສິນຄ້າສົ່ງອອກ ໂດຍນຳໃຊ້ທ່າແຮງໄດ້ປຽບຂອງເຂດພູພຽງບໍລິເວນ ເຊິ່ງກວມເອົາແຂວງຈຳປາສັກ, ສາລະວັນ, ເຊກອງ​Microsoft​,​ ມີດິນ​ ອາກາດເຢັນຕະຫຼອດປີ, ໃນຕໍ່ໜ້າຕ້ອງຫັນຈາກການປູກຝັງແບບດັ້ງເດີມ ໄປສູ່ການນຳໃຊ້ເຕັກໂນໂລຊີທີ່ທັນສະໄໝ ເພື່ອເພີ່ມຜົນຜະລິດ,​ ສ້າງຍີ່ຫໍ້ໃຫ້ແກ່ຜະລິດຕະພັນທ້ອງຖິ່ນເປັນຕົ້ນແມ່ນ ກາເຟ, ຊາ, ແລະ ພືດຜັກປອດສານພິດອື່ນໆ ໃຫ້ເປັນທີ່ຍອມຮັບໃນລະດັບສາກົນ, ພັດທະນາລະບົບການຂົນສົ່ງ ເພື່ອຮັກສາຄຸນນະພາບສິນຄ້າສົ່ງອອກ, ເປັນການຫຼຸດຜ່ອນການນຳເຂົ້າປຸ໋ຍເຄມີ, ຢາປາບສັດຕູພືດ ແລະ ເມັດພັນຈາກຕ່າງປະເທດ ທີ່ເຮັດໃຫ້ຕົ້ນທຶນການຜະລິດຂອງຊາວກະສິກອນ ແລະ​ ຊາວສວນສູງຂຶ້ນ; ສ້າງສູນຄົ້ນຄວ້າ ແລະ ຜະລິດພັນພືດ, ພັນສັດ ແລະ ປຸຍຊີວະພາບພາຍໃນເຂດພາກໃຕ້, ນຳໃຊ້ເຕັກໂນໂລຊີການຈັດການນ້ຳ ແລະ ພະລັງງານແສງອາທິດ ເຂົ້າໃນການຊົນລະປະທານ ເພື່ອໃຫ້ສາມາດຜະລິດໄດ້ຕະຫຼອດປີ; ຂະແໜງອຸດສາຫະກຳປຸງແຕ່ງກະສິກຳ ເພື່ອຫັນປ່ຽນຈາກການສົ່ງອອກວັດຖຸດິບ ມາເປັນການສົ່ງອອກຜະລິດຕະພັນທີ່ມີມູນຄ່າເພີ່ມສູງ; ຂະແໜງພະລັງງານທົດແທນ ແລະ ພະລັງງານສີຂຽວ,​ ໃນຕໍ່ໜ້າຕ້ອງໄດ້ສືບຕໍ່ພັດທະນາໂຄງການພະລັງງານລົມຂະໜາດໃຫຍ່ ເພື່ອສົ່ງອອກໄປຫວຽດນາມ ແລະ ກຳປູເຈຍ, ສ້າງລະບົບສາຍສົ່ງໄຟຟ້າຮ່ວມກັນ ເພື່ອຄວາມສະຖຽນລະພາບທາງດ້ານພະລັງງານ ຂອງ 4 ແຂວງ,​ ສົ່ງເສີມການນຳໃຊ້ຍານພາຫະນະໄຟຟ້າ ໃນການຂົນສົ່ງໂລຈິສຕິກ ແລະ ການທ່ອງທ່ຽວ ຢູ່ພາກໃຕ້ ເພື່ອຫຼຸດຜ່ອນການໃຊ້ນ້ຳມັນເຊື້ອໄຟ.​ ຂະແໜງການທ່ອງທ່ຽວສີຂຽວ​ ຕ້ອງສຸມໃສ່ພັດທະນາເສັ້ນທາງທ່ອງທ່ຽວເຊື່ອມໂຍງ 4 ແຂວງ ຕ້ອງຍົກລະດັບການບໍລິການ ແລະ ທີ່ພັກ ໃຫ້ເປັນມິດຕໍ່ສິ່ງແວດລ້ອມ, ສ້າງໂຄງການທ່ອງທ່ຽວທີ່ເຊື່ອມໂຍງອຸດສາຫະກຳທ້ອງຖິ່ນ, ສົ່ງເສີມການນຳໃຊ້ອາຫານ, ພືດຜັກອິນຊີ ແລະ ຫັດຖະກຳພາຍໃນ 4 ແຂວງ ເຂົ້າໃນໂຮງແຮມ ແລະ ຮ້ານອາຫານ ເພື່ອບໍ່ໃຫ້ເງິນທ່ອງທ່ຽວຮົ່ວໄຫຼອອກຕ່າງປະເທດ.

               #ສໍາລັບຂະແໜງບໍລິການຂົນສົ່ງ ແລະ ໂລຈິດສະຕິກ,​ ໃນຕໍ່ໜ້າ,​ ທ່ານນາຍົກລັດຖະມົນຕີ ເນັ້ນໜັກໃຫ້ເອົາໃຈໃສ່ພັດທະນາທ່າບົກ ແລະ ສູນປ່ຽນຖ່າຍສິນຄ້າ ຢູ່ຈຳປາສັກ ແລະ ອັດຕະປື ເພື່ອເກັບຄ່າບໍລິການທາງຜ່ານ ຈາກໄທ ໄປ ຫວຽດນາມ ແລະ ກຳປູເຈຍ, ສ້າງລະບົບສາງເກັບຮັກສາ ແລະ ຫ້ອງເຢັນ ເພື່ອຮັກສາຄຸນນະພາບຂອງສິນຄ້າ ແລະ ຄຸ້ມຄອງລາຄາສິນຄ້າກະສິກຳ ບໍ່ໃຫ້ຖືກກົດລາຄາໃນຍາມຜົນຜະລິດອອກຫຼາຍ, ຫຼຸດຜ່ອນຂັ້ນຕອນທາງດ້ານເອກະສານຢູ່ດ່ານຊາຍແດນ ເພື່ອດຶງດູດໃຫ້ພາກໃຕ້ເປັນເສັ້ນທາງຜ່ານຫຼັກ ຂອງການຄ້າພາກພື້ນ; ຂະແໜງຂຸດຄົ້ນ ແລະ ປຸງແຕ່ງບໍ່ແຮ່,​ ໃນຕໍ່ໜ້າ​ ຕ້ອງຫັນຈາກການຂຸດຄົ້ນແລ້ວສົ່ງອອກແຮ່ດິບ ມາເປັນການສ້າງໂຮງງານອຸດສາຫະກຳປຸງແຕ່ງແຮ່ທາດ ເພື່ອສ້າງມູນຄ່າເພີ່ມ ແລະ ສ້າງວຽກເຮັດງານທໍາໃນທ້ອງຖິ່ນ; ການພັດທະນາຂະແໜງການບໍລິການດ້ານສຶກສາ ແລະ ສາທາລະນະສຸກ,​ ໃນຕໍ່ໜ້າ ມະຫາວິທະຍາໄລຈຳປາສັກ ແລະ ໂຮງຮຽນເຕັກນິກວິຊາຊີບ ຕ້ອງສຸມໃສ່ການສ້າງ ນັກເຕັກນິກ, ນັກວິຊາການ ແລະ ຜູ້ປະກອບການ ທີ່ສາມາດອອກມາສ້າງທຸລະກິດ ແລະ ພັດທະນາ 6 ຂະແໜງການປາຍແຫຼມ, ຍົກລະດັບໂຮງໝໍ ແລະ ສູນການແພດ ໃຫ້ມີຄວາມຊ່ຽວຊານສະເພາະດ້ານ ເພື່ອເປັນສູນກາງປິ່ນປົວຂອງພາກໃຕ້ ຫຼຸດຜ່ອນການເດີນທາງໄປປິ່ນປົວຂ້າມແດນ ແລະ ຮັບປະກັນຄຸນນະພາບການບໍລິການໃຫ້ນັກທ່ອງທ່ຽວ; ເພີ່ມທະວີວຽກງານປ້ອງກັນຊາດ​ – ປ້ອງກັນຄວາມສະຫງົບໃຫ້ມີຄວາມທັນສະໄໝ ແລະ ຮັບປະກັນຄວາມສະຫງົບຢ່າງຮອບດ້ານ,​ ໃນຕໍ່ໜ້າ ຕ້ອງສືບຕໍ່ເອົາໃຈໃສ່ຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ຕິດພັນກັບການພັດທະນາຊົນນະບົດຮອບດ້ານ ແລະ ວຽກງານສາມສ້າງ ໃຫ້ເປັນຂະບວນການຟົດຟື້ນ ເພື່ອສ້າງຕາແສງ, ສ້າງບ້ານ ກາຍເປັນປ້ອມທີ່ໝັ້ນແນວໜ້າໃຫ້ແກ່ວຽກງານປ້ອງກັນຊາດ​ – ປ້ອງກັນຄວາມສະຫງົບຢູ່ 4 ແຂວງພາກໃຕ້ ໃຫ້ມີສະຖຽນລະພາບທາງດ້ານການເມືອງ ແລະ ມີຄວາມສະຫງົບປອດໄພ, ສ້າງພື້ນຖານໃຫ້ແກ່ການດຶງດູດການລົງທຶນ ແລະ ການທ່ອງທ່ຽວ; ຄຸ້ມຄອງ ແລະ ສະກັດກັ້ນປະກົດການຫຍໍ້ທໍ້ຕາມຊາຍແດນ,​ ເພີ່ມທະວີການກວດກາ, ສະກັດກັ້ນ ແລະ ແກ້ໄຂບັນຫາຢາເສບຕິດ, ການເຂົ້າ – ອອກເມືອງຜິດກົດໝາຍ, ການຄ້າຂາຍເຖື່ອນ, ການລັກລອບຂຸດຄົ້ນຊັບພະຍາກອນທຳມະຊາດລຽບຕາມຊາຍແດນ ໂດຍການນຳໃຊ້ເຄື່ອງມືທີ່ທັນສະໄໝເຂົ້າໃນການຄຸ້ມຄອງ, ພ້ອມນັ້ນ ກໍເພີ່ມທະວີການເຝົ້າລະວັງ, ຕິດຕາມຢ່າງໃກ້ສິດ ແລະ ຮັກສາຄວາມສະຖຽນລະພາບຢູ່ບໍລິເວນຊາຍແດນຢ່າງເຂັ້ມງວດ, ເເກ້ໄຂບັນຫາຄວາມອ່ອນໄຫວ ຫຼື ຂໍ້ຂັດແຍ່ງຕ່າງໆ ໂດຍຜ່ານກົນໄກການທູດ ແລະ ການປະສານງານຢ່າງສັນຕິວິທີ; ສືບຕໍ່ເສີມຂະຫຍາຍສາຍພົວພັນ, ການຮ່ວມມື ແລະ ການແລກປ່ຽນຂໍ້ມູນຂ່າວສານກັບບັນດາປະເທດທີ່ມີຊາຍແດນຕິດຈອດ ເພື່ອສ້າງເສັ້ນທາງຊາຍແດນແຫ່ງສັນຕິພາບ, ມິດຕະພາບ, ຄວາມສະຫງົບ ແລະ ການຮ່ວມມືພັດທະນາຢ່າງຍືນຍົງ.

               ທັງນີ້ ກໍເພື່ອຜັນຂະຫຍາຍວຽກງານການພັດທະນາເຂດແຄວ້ນ ໃຫ້ກາຍເປັນ ແຜນແມ່ບົດເພື່ອຂຸດຄົ້ນທ່າແຮງບົ່ມຊ້ອນຂອງຊາດໃຫ້ເກີດຜົນປະໂຫຍດສູງສຸດ ໄປຕາມທິດຕາມມະຕິກອງປະຊຸມໃຫຍ່ຄັ້ງທີ XII ຂອງພັກ ໃຫ້ປະກົດຜົນເປັນຈິງ.

* ຂ່າວ​-ພາບ​: ທູນທອງໃຈ​ *

Bài viết ກອງປະຊຸມສຳມະນາ ທິດທາງ ແລະ ແຜນພັດທະນາເຂດແຄວ້ນ 4 ແຂວງພາກໃຕ້,​ ທ່ານ ນາຍົກລັດຖະມົນຕີ ໃຫ້ກຽດເຂົ້າຮ່ວມເປັນປະທານ​ ພ້ອມມີຄໍາເຫັນຊີ້ນໍາ đã xuất hiện đầu tiên vào ngày .

           ສະຫາຍ ປອ. ອາລຸນໄຊ ສູນນະລາດ ໄດ້ກ່າວໄຂກອງປະຊຸມ ເຊິ່ງມີບາງຕອນສຳຄັນກ່າວວ່າ: ກອງປະຊຸມຄົບຄະນະໃນຄັ້ງນີ້ ຖືເປັນຄັ້ງທຳອິດທີ່ຄະນະບໍລິຫານງານພັກແຂວງ ຈັດຂຶ້ນຢູ່ເມືອງໂຂງ ໂດຍຈະດຳເນີນໄປເປັນເວລາ 2 ວັນ (23–24 ກໍລະກົດ 2026). ກອງປະຊຸມຈະໄດ້ພ້ອມກັນຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 4 ສະໄໝທີ IX, ໂດຍສະເພາະແມ່ນການນຳພາ-ຊີ້ນຳວຽກງານຮອບດ້ານຂອງຄະນະບໍລິຫານງານພັກແຂວງ ໃນໄລຍະ 6 ເດືອນຕົ້ນປີ 2026 ທີ່ຜ່ານມາ, ພ້ອມທັງຄົ້ນຄວ້າ ແລະ ປະກອບຄຳຄິດຄຳເຫັນໃສ່ທິດທາງວຽກງານຈຸດສຸມ 6 ເດືອນທ້າຍປີ 2026.

# ສໍາລັບບັນດາວຽກງານສຳຄັນທີ່ຈະໄດ້ຄົ້ນຄວ້າໃນກອງປະຊຸມ ປະກອບມີ:
– ດ້ານເສດຖະກິດ-ສັງຄົມ: ປະເມີນການນຳພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໄລຍະ 6 ເດືອນຕົ້ນປີ, ແຜນດັດແກ້ ແລະ ທິດທາງຊີ້ນຳ-ນຳພາ 6 ເດືອນທ້າຍປີ 2026.
– ດ້ານການບໍລິຫານລັດ: ເນັ້ນການນຳພາຈັດຕັ້ງປະຕິບັດວຽກງານຫັນເປັນທັນສະໄໝ ໃນການບໍລິຫານລັດຂອງພະແນກການ, ບັນດາເມືອງ ແລະ ນະຄອນ.
– ດ້ານຍຸຕິທຳ ແລະ ກົດໝາຍ: ການສ້າງສະຕິເຄົາລົບລະບຽບກົດໝາຍ, ການດຳເນີນຄະດີຕາມຂະບວນການຍຸຕິທຳ ແລະ ການປະຕິບັດຄຳຕັດສິນຂອງສານ ໃນໄລຍະ 6 ເດືອນຜ່ານມາ ພ້ອມທັງທິດທາງ 6 ເດືອນທ້າຍປີ.
– ດ້ານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ): ການນຳພາຈັດຕັ້ງປະຕິບັດວຽກງານ ປກຊ ຕິດພັນກັບການເຄື່ອນໄຫວວຽກງານປ້ອງກັນຊາຍແດນ, ວຽກງານປະຈຳການກຽມພ້ອມສູ້ຮົບ ແລະ ການຝຶກອົບຮົມຫັດແອບກຳລັງກອງຫຼອນ ປະຈຳປີ 2026.
– ການແກ້ໄຂປະກົດການຫຍໍ້ທໍ້: ສຸມໃສ່ການສະກັດກັ້ນ ແລະ ແກ້ໄຂກຸ່ມສະແກມເມີ (Scammer) ທົ່ວແຂວງ ໃນໄລຍະຜ່ານມາ ແລະ ມາດຕະການແກ້ໄຂໃນ 6 ເດືອນທ້າຍປີ 2026.
– ການປັບປຸງກົງຈັກ ແລະ ຮັບມືໄພພິບັດ: ການນຳພາປັບປຸງກົງຈັກການຈັດຕັ້ງພັກ-ລັດ ຂັ້ນແຂວງ ຕິດພັນກັບການສ້າງຄວາມເຂັ້ມແຂງໃຫ້ຄະນະກຳມະການປົກຄອງຕາແສງ, ການກະກຽມຄວາມພ້ອມຮັບມືກັບສະພາບໄພພິບັດ ແລະ ມາດຕະການຊ່ວຍເຫຼືອຜູ້ທີ່ໄດ້ຮັບຜົນກະທົບ.
– ການກວດກາພັກ: ຜ່ານບົດສຳຫຼວດການນຳພາລວມຂອງຄະນະບໍລິຫານງານພັກແຂວງ ສະໄໝທີ IX ໄລຍະ 6 ເດືອນຕົ້ນປີ 2026 ແລະ ການສຳຫຼວດບຸກຄົນໃນຄະນະບໍລິຫານງານພັກແຂວງ.

Bài viết ແຂວງຈຳປາສັກ ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 5 ສະໄໝທີ IX đã xuất hiện đầu tiên vào ngày .

                 ວັນທີ 9 ກໍລະກົດ​ 2026​, ຄະນະພັກຮາກຖານຄະນະໂຄສະນາອົບຮົມແຂວງຈໍາປາສັກ ໄດ້​ດໍາເນີນ​ກອງປະຊຸມໃຫຍ່ຄະນະພັກຮາກຖານ ຄັ້ງທີ​ I.​ ກອງປະຊຸມຈັດຂຶ້ນຢູ່ຫ້ອງ​ປະຊຸມ​ຫ້ອງວ່າການແຂວງ​ ໂດຍການເປັນປະທານຮ່ວມຂອງ ສະຫາຍ​ ສຸພາ​ບ​ ທໍາມະ​ຮັກສາ​ ຮອງເລຂາ​ຄະນະ​ບໍລິຫານງານ​ພັກແຂວງ​ ຜູ້ຊີ້ນໍາ​ວຽກງານ​ການເມືອງ​ -​ ແນວຄິດ,​ ວຽກງານ​ພັກ​ -​ ພະນັກງານ, ວຽກງານ​ສະຫະພັນ​ນັກ​ຮົ​ບເກົ່າ​ ແລະ​ ອົງ​ການ​ຈັດຕັ້ງ​ມະຫາຊົນ​ ຂັ້ນແຂວງ,​ ສະຫາຍ​ ສົມສີ​ ມະນີ​ນິນ​ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ,​ ສະຫາຍ ປະດິດ​ ວັນນະ​ລັດສະໝີ​ ຄະນະປະຈໍາ​ພັກແຂວງ ເລຂາຄະນະພັກຮາກຖານຄະນະໂຄສະນາອົບຮົມແຂວງ. ມີຄະນະກຳມະການບຸກຄະລາກອນຂັ້ນແຂວງ,​ ຄະນະພັກ​ຮາກຖານ, ເລຂາ​ -​ ຄະນະໜ່ວຍພັກ​ ແລະ​ ສະມາຊິກພັກ​ ຈາກ​ໜ່ວຍພັກ​ ແລະ​ ຈຸພັກທີ່ຂຶ້ນກັບຄະນະພັກຮາກຖານ​ຄະນະ​ໂຄສະນາ​ອົບຮົມ​ແຂວງ​ ເຂົ້າຮ່ວມ.​

             ໂອກາດກ່າວເປີດກອງປະຊຸມ ສະຫາຍ​ ປະດິດ​ ວັນນະ​ລັດສະໝີ​ ຄະນະປະຈໍາ​ພັກແຂວງ ເລຂາຄະນະພັກຮາກຖານຄະນະໂຄສະນາອົບຮົມແຂວງ​ ມີຄໍາເຫັນວ່າ: ກອງປະຊຸມໃຫຍ່​ ຄັ້ງທີ I ຂອງຄະນະພັກຮາກຖານຄະນະໂຄສະນາອົບຮົມແຂວງ​ ໄດ້ໄຂຂຶ້ນຢ່າງສະຫງ່າຜ່າເຜີຍ ແລະ ສຸດທີ່ມີຄວາມໝາຍສໍາຄັນ,​ ຍ້ອນແນວນັ້ນ, ຂ້າພະເຈົ້າ​ ຂໍຮຽກຮ້ອງຜູ້ແທນກອງປະຊຸມ ຈົ່ງເຊີດຊູຄວາມຮັບຜິດຊອບຂອງຕົນໃຫ້ສູງ ໃນການປະກອບຄຳເຫັນຢ່າງຕັ້ງໜ້າ ແລະ ຕົກລົງບັນຫາຕ່າງໆໃຫ້ຖືກຕ້ອງ ເຮັດໃຫ້ກອງປະຊຸມ ໃຫຍ່ຄັ້ງນີ້ບັນລຸຜົນສໍາເລັດຢ່າງສູງ.​

            ຕໍ່ມາ,​ ສະຫາຍ​ ປອ.ວັນນະ​ລາ​ ສຸດທິຈັກ ຮອງເລຂຄະນະພັກຮາກຖານ​ ຄະນະໂຄສະນາອົບຮົມແຂວງ​ ກໍໄດ້ຜ່ານບົດລາຍງານ​ການເມືອງ​ທັງ​ 2 ພາກ​ ເຊິ່ງໄດ້ລາຍງານ ແລະ ຕີລາຄາການນໍາພາ​ – ຊີ້ນໍາວຽກງານການເຄື່ອນໄຫວໃນໄລຍະສ້າງຕັ້ງຄະນະພັກຮາກຖານ 6 ເດືອນທີ່ຜ່ານມາ​ ທີ່ໄດ້ສ້າງຕັ້ງຄະນະພັກຮາກຖານຄະນະໂຄສະນາອົບຮົມແຂວງ, ຄະນະພັກ ໄດ້ເອົາໃຈໃສ່ນຳພາ​ – ຊີ້ນຳໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI, XII ຂອງພັກ, ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ເຂົ້າສູ່ເນື້ອໃນວຽກງານຕົວຈິງຢ່າງມີຈຸດສຸມ,​ຄະນະພັກຮາກຖານຄະນະໂຄສະນາອົບຮົມແຂວງ ໄດ້ຮັບການສ້າງຕັ້ງຂຶ້ນ ແລະ ເຄື່ອນໄຫວຢ່າງເປັນທາງການ ນັບແຕ່ເດືອນທັນວາ ປີ 2025 ເປັນຕົ້ນມາ; ເປັນອົງການເສນາທິການ ທີ່ຂຶ້ນກັບອົງຄະນະພັກແຂວງ, ມີພາລະບົດບາດເປັນແກນນຳໃນການນຳພາ​ – ຊີ້ນຳ ວຽກງານການເມືອງ​ – ແນວຄິດ ກໍຄືວຽກງານໂຄສະນາອົບຮົມແນວທາງ, ນະໂຍບາຍຂອງພັກ​ – ລັດ ໃນຂອບເຂດທົ່ວແຂວງ; ມີ 3 ໜ່ວຍພັກຂຶ້ນກັບ​ ຄື: ໜ່ວຍພັກຂະແໜງຫ້ອງການ ແລະ ສັງລວມ, ໜ່ວຍພັກຂະແໜງອົບຮົມ, ໜ່ວຍພັກຂະແໜງ​ສື່ມວນຊົນ,​ ປັດຈຸບັນ​ ມີສະມາຊິກພັກທັງໝົດ​ 83 ສະຫາຍ.​ ພ້ອມນີ້,​ ຍັງໄດ້ວາງຄາດໝາຍສູ້ຊົນ, ກຳນົດບັນດາທິດທາງ, ໜ້າທີ່ລວມໄລຍະ 5 ປີ (2026 -​ 2030) ພາຍໃຕ້ຄຳຂວັນ ” ເພີ່ມທະວີບົດບາດການນໍາພາຂອງຄະນະພັກ, ຍົກສູງຈິດໃຈເອກະລາດເປັນເຈົ້າຕົນເອງ, ຕັ້ງໜ້າສ້າງການຫັນປ່ຽນໃນວຽກງານໂຄສະນາອົບຮົມ ໄປສູ່ຄຸນນະພາບໃໝ່ຢ່າງແຂງແຮງ ”.​

               ພ້ອມນີ້,​ ສະຫາຍ​ ສົມສີ​ ມະນີ​ນິນ​ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ​ ຕາງໜ້າຄະນະປັບປຸງກົງຈັກການຈັດຕັ້ງພັກ -​ ລັດ​ ຂັ້ນແຂວງ​ ກໍໄດ້ຜ່ານມາດຕະຖານ, ເງື່ອນໄຂຂອງຜູ້ທີ່ຈະລົງສະໝັກຮັບເລືອກຕັ້ງເຂົ້າໃນຄະນະພັກຮາກຖານຊຸດໃໝ່,​ ມາດຕະຖານເງື່ອນໄຂຂອງພະນັກງານນຳພາ​ – ຄຸ້ມຄອງ​ ໂດຍປະຕິບັດຕາມ ມະຕິຂອງກົມການເມືອງສູນກາງພັກ ເລກທີ 030/ກມສພ, ລົງວັນທີ 3 ມັງກອນ​ 2018 ວ່າດ້ວຍມາດຕະຖານຂອງພະນັກງານນໍາພາ​ – ຄຸ້ມຄອງ ເພື່ອເປັນບ່ອນອີງໃຫ້ແກ່ການປ່ອນບັດເລືອກຕັ້ງເອົາຄະນະພັກຮາກຖານ​ ຄະນະໂຄສະນາອົບຮົມແຂວ​ງ ຊຸດໃໝ່​ ໂດຍຍົກໃຫ້ເຫັນມາດຕະຖານລວມ​ ເປັນຕົ້ນແມ່ນດ້ານຄຸນທາດການເມືອງ,​ ດ້ານຄຸນສົມບັດສິນທຳປະຕິວັດ ແລະ ແບບແຜນດໍາລົງຊີວິດ, ດ້ານຄວາມຮູ້​ – ຄວາມສາມາດ, ດ້ານແບບແຜນການນໍາພາ ແລະ​ ວິທີເຮັດວຽກ,​ ດ້ານສຸຂະພາບ.​ ນອກນີ້,​ ຍັງຍົກໃຫ້ເຫັນມາດຖານສະເພາະ ຕາມມະຕິຂອງກົມການເມືອງສູນກາງພັກ ເລກທີ 030/ກມສພ​ ຕື່ມອີກ.

             ກອງປະຊຸມຄັ້ງນີ້, ຜູ້ແທນ​ກອງປະຊຸມ​ ຍັງໄດ້ໃຊ້ສິດປະຊາທິປະໄຕ ຂອງຕົນ​ ປ່ອນບັດເລືອກຕັ້ງເອົາຄະນະພັກຮາກຖານຊຸດໃໝ່ ຄັ້ງທີ I ​ບົນພື້ນຖານຄວາມຖືກຕ້ອງ ສອດຄ່ອງກັບມາດຖານເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກເລືອກຕັ້ງ 9 ສະຫາຍ,​ ຍິງ​ 2​ ສະຫາຍ,​ ໃນນັ້ນ​ ເລືອກເອົາ 7 ສະຫາຍ.​ ຜ່ານການປ່ອນບັດຕົວຈິງ ສາມາດເລືອກໄດ້ຄະນະພັກຮາກຖານຄະນະໂຄສະນາອົບຮົມແຂວງ​ ສະໄໝທີ​ I​ ຈໍານວນ 7 ສະຫາຍ,​ ຍິງ 1 ສະຫາຍ​ ຄື: ສະຫາຍ​ ປະດິດ​ ວັນນະ​ລັດສະໝີ, ສະຫາຍ ປອ.​ວັນນະ​ລາ​ ສຸດທິຈັກ,​ ສະຫາຍ ນາງ​ ສຸກສົມພອນ​ ພົນອາສາ,​ ສະຫາຍ ນະ​ ຂັນທະວົງ, ສະຫາຍ ຄໍາ​ປະສົງ​ ພົມມະວົງ,​ ສະຫາຍ​ ສົມພອນ​ ວິໄລສົມ ແລະ​ ​ສະຫາຍ ມົນທຽນ​ ໄຊຍະສິດ. ກອງປະຊຸມຄັ້ງປະຖົມມະລຶກ ເປັນເອກະສັນຢ່າງສົມບູນ ເລືອກເອົາເລຂາ, ຮອງເລຂາ, ປະທານ ແລະ ຮອງປະທານກວດກາຄະນະພັກຮາກຖານ ໂດຍເລືອກເອົາ ສະຫາຍ ປະດິດ​ ວັນນະລັດສະໝີ ເປັນເລຂາຄະນະພັກຮາກຖານ​ຄະນະໂຄສະນາອົບຮົມແຂວງ​ ສະໄໝທີ​ I, ສະຫາຍ ປອ.ວັນນະລາ ສຸດທິຈັກ ເປັນຮອງເລຂາຄະນະພັກຮາກຖານ, ສະຫາຍ ນາງ​ ສຸກສົມ​ພອນ​ ພົນອາສາ ເປັນປະທານກວດກາຄະນະພັກຮາກຖານ,​ ສະຫາຍ ນາງ.ພອນທິບ​ ແກ້ວປະເສີດ ແລະ​ ສະຫາຍ ເມທີ ທິບພະໄກສອນ ເປັນ​ຮອງປະທານກວດກາຄະນະພັກຮາກຖານ.​ ຈາກນັ້ນ,​ ກໍ​ໄດ້ມອບ​ຊໍ່ດອກໄມ້​ ໃຫ້ແກ່ຄະນະພັກຮາກຖານຄະນະໂຄສະນາອົບຮົມແຂວງ​ ຊຸດທີ I​, ໃຫ້ກຽດ​ມອບໂດຍ​ ສະຫາຍ​ ສຸພາບ​ ທໍາມະ​ຮັກສາ​ ຮອງເລຂາ​ຄະນະ​ບໍລິຫານງານ​ພັກແຂວງ​. ຕອນທ້າຍ​ກອງປະຊຸມ​ ສະຫາຍ​ ສຸພາບ​ ທໍາມະ​ຮັກສາ​ ກໍມີຄໍາເຫັນໂອ້ລົມຊີ້ທິດເຍືອງທາງ ແກ່ຄະນະພັກຮາກ​ຄະນະໂຄສະນາອົບຮົມແຂວງ ຊຸດທີ​ I​ ເພື່ອເປັນບ່ອນອີງ ໃນການນໍາພາ -​ ຊີ້ນໍາ ວຽກງານໃນຕໍ່ໜ້າ​ ໃຫ້ມີ​ຜົນສໍາເລັດ​ໃໝ່​ໃຫຍ່ຫຼວງ​ກວ່າເກົ່າ​.

* ຂ່າວ-ພາບ​: ທູນທອງໃຈ​ *

Bài viết ຄະນະພັກຮາກຖານ​ ຄະນະ​ໂຄສະນາ​ອົບຮົມ​ແຂວງຈໍາປາສັກ​ ສໍາເລັດກອງປະຊຸມໃຫຍ່​ ຄະນະພັກຮາກຖານ​ ຄັ້ງທີ​ I​ đã xuất hiện đầu tiên vào ngày .

                ໃນຄັ້ງວັນທີ 01 ກໍລະກົດ 2026 ນີ້ຢູ່ທີ່ຫ້ອງປະຊຸມຂອງຄະນະໂຄສະນາອົບຮົມແຂວງຈໍາປາສັກ ໄດ້ຈັດກອງປະຊຸມເຜີຍແຜ່ມະຕິ ຂອງລັດຖະບານສະໄໝສາມັນປະຈໍາເດືອນ ພຶດສະພາ ປີ 2026 ໃຫ້ກຽດເປັນທານ ແລະ ບັນລະຍາຍເອກະສານໂດຍທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ເຂົ້າຮ່ວມຮັບຟັງໃນຄັ້ງນີ້ມີບັນດາ ຮອງຫົວໜ້າຄະນະໂຄສະນາອົບຮົມແຂວງ, ຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານລັດຖະກອນທັງໝົດເຂົ້າຮ່ວມຢ່າງພ້ອມພຽງ.

               ໃນພິທີທ່ານປະທານກອງປະຊຸມ ກໍ່ໄດ້ເຜີຍແຜ່ມະຕິຂອງລັດຖະບານສະໄໝສາມັນປະຈໍາເດືອນ ພຶດສະພາ 2026 ຜ່ານການປຶກສຶກສາຫາລືຂອງກອງປະຊຸມແມ່ນໄດ້ເຫັນດີເປັນເອກະພາບດັ່ງນີ້ :
1, ລາຍງານການປະຕິບັດວຽກງານຈຸດສຸມພົ້ນເດັ່ນ ປະຈໍາເດືອນພຶດສະພາ ແລະ ທິດທາງແຜນການ ປະຈໍາເດືອນ ມີຖຸນາ 2026 ຂອງລັດຖະບານ.
2, ລາຍງານສະພາບພົ້ນເດັ່ນພາກພຶ້ນ ແລະ ສາກົນ, ວຽກງານປ້ອງກັນຊາດປ້ອງກັນຄວາມສະຫົຽບ.
3, ລາຍງານແຜນການປັບປຸງລະບົບການສຶກສາສາມັນຈາກ 5+4+3 ເປັນ 6+6+3.
4, ລາຍງານການກະກຽມຄວາມພ້ອມເປັນເຈົ້າພາບຈັດກອງປະຊຸມລັດຖະມົນຕີວິທະຍາສາດ, ເຕັດໂນໂລຊີ ແລະ ນະວັດຕະກໍາອາຊຽນຄັ້ງທີ 22, ກອງປະຊຸມເຈົ້າໜ້າທີ່ອາວຸໂສຄັ້ງທີ 89 ແລະ ກອງປະຊຸມອື່ນໆທີ່ກ້ຽວຂ້ອງໃນເດືອນມີຖຸນາ 2026.
5. ລາຍງານເຫດການປາຕາຍຢູ່ນໍ້າເຊໂດນ, ເມືອງຊະນະສົມບູນ, ແຂວງຈໍາປາສັກ.
6, ລາຍງານສະພາບລວມການບັນຈຸລັດຖະກອນ ປະຈໍາປີ 2025 ແລະ ແຜນຄວາມຕ້ອງການຈໍານວນຕົວເລກໃໝ່ ( ໂກ້ຕາ ) ປີ 2026.
7, ຮ່າງກົດໝາຍວ່າດ້ວຍຄັງເງິນແຫ່ງລັດ ແລະ ຮ່າງກົດໝາຍວ່າດ້ວຍງົບປະມານແຫ່ງລັດ.
8, ຮ່າງດໍາລັດ ວ່າດ້ວຍການເຊົ່າ ແລະ ສໍາປະທານທີ່ດິນລັດ.

                ຈາກນັ້ນ ເພື່ອສຶບຕໍ່ຈັດຕັ້ງປະຕິບັດບັນດາຄາດໝາຍຕ່າງໆໃນວຽກງານຈຸດສຸມເດືອນມີຖຸນາ 2026 ແມ່ນ ໃຫ້ເອົາໃຈໃສ່ສຶບຕໍ່ຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫົຽບທົ່ວປວງຊົນຮອບດ້ານ. ສຸ່ມໃສ່ບັນດາເນື້ອໃນຈະນໍາເຂົ້າລາຍງານຕໍ່ກອງປະຊຸມລັດຖະບານເປີດກ້ວາງຄັ້ງທີ 1 ປີ 2026. ໃຫ້ຄະນະຄຸມຄ້ອງໄພພິບັດສຶບຕໍ່ຕິດຕາມ ແລະ ຊີ້ນໍາແຂວງໄຊສົມບູນ ແລະ ພາກສ່ວນທີ່ກ່ຽວຂ້ອງໃຫ້ການຊ່ວຍເຫຼືອປະຊາຊົນທີ່ຕິດຢູ່ໃນຮູຫີນຜາ, ເມືອງລ່ອງແຈ້ງ, ແຂວງໄຊສົມບູນ ແລະ ສຸມໃສ່ຈັດຕັ້ງຜັນຂະຫຍາຍຜົນກອງປະຊຸມຕ່າງໆຜົນການເຄຶ່ອນໄຫວວຽກງານຕ່າງປະເທດຂອງການນໍາພັກ-ລັດ. ໃຫ້ບັນດາກະຊວງ, ອົງການປົກຄອງທ້ອງຖິ່ນເປັນເຈົ້າການກະກຽມປູກຕົ້ນໄມ້ໃນໂອກາດວັນປູກຕົ້ນໄມ້ແຫ່ງຊາດ ວັນເດັກນ້ອຍສາກົນ. ສຸມໃສ່ການເກັບລາຍຮັບງົບປະມານຈາກແຫຼ່ງລາຍຮັບທີ່ມີແລ້ວໃຫ້ຄົບຖ້ວນດ້ວຍການສຸມໃສ່ການຫັນເປັນທັນສະໄໝໃຫ້ແຂງແຮງ.

               ໃນຕອນທ້າຍພິທີ ທ່ານປະທານ ກໍ່ໃຫ້ກຽດໂອ້ລົມຕໍ່ພະນັກງານລັດຖະກອນທັງໝົດ ໄດ້ຮັບຮູ້ເຂົ້າໃຈກ່ຽວກັບບັນດາເນື້ອໃນເອກະສານໃນການເຜີຍແຜ່ມະຕິຂອງລັດຖະບານສະໄໝສາມັນ ປະຈໍາເດືອນ ພຶດສະພາ 2026 ໃນຄັ້ງນີ້. ໃນໂອກາດດຽວກັນ ທ່ານປະທານ ຍັງໃຫ້ບັນດາທ່ານ ໄດ້ປະກອບຄໍາຄິດເຫັນໃນການຈັດກິດຈະກໍາ ເພື່ອສ້າງຂະບວນການ ເພື່ອກະກຽມຈັດກອງປະຊຸມໃຫ່ຍຄັ້ງທີ I ຂອງຄະນະພັກຮາກຖານຄະນະໂຄສະນາອົບຮົມແຂວງ ໃຫ້ເປັນຂະບວນຟົດຟື້ນ ແລະ ມີຜົນສໍາເລັດຕາມລະດັບຄາດໝາຍ.

Bài viết ຄະນະໂຄສະນາອົບຮົມແຂວງ ຈັດກອງປະຊຸມ ເຜີຍແຜ່ມະຕິຂອງລັດຖະບານສະໄໝສາມັນ ປະຈໍາເດືອນພຶດສະພາ 2026 đã xuất hiện đầu tiên vào ngày .

           ວັນທີ 29 ມິຖຸນາ 2026, ຄະນະພັກຮາກຖານຄະນະໂຄສະນາອົບຮົມແຂວງຈໍາປາສັກ​ ໄດ້ຈັດກອງປະຊຸມທາບທາມບຸກຄະລາກອນເຂົ້າໃສ່ໂຄງປະກອບຄະນະພັກຮາກຖານ​ ຮອບທີ 1​ ແລະ​ ຮອບທີ​ 2.​ ກອງປະຊຸມ​ຈັດຂຶ້ນ​ຢູ່ຫ້ອງ​ປະຊຸມ​ຫ້ອງ​ວ່າການແຂວງ​ ໂດຍ​ການເຂົ້າຮ່ວມ​ຂອງ​ສະຫາຍ​ ສຸພາບ​ ທໍາມະ​ຮັກສາ​ ຮອງເລຂາ​ຄະນະ​ບໍລິຫານງານ​ພັກແຂວງ​ ຜູ້ຊີ້ນໍາ​ວຽກງານ​ການເມືອງ​ -​ ແນວຄິດ, ວຽກງານ​ພັກ​ -​ ພະນັກງານ​ ແລະ​ ວຽກງານ​ອົງການ​ຈັດຕັ້ງ​ມະຫາຊົນ,​ ສະຫາຍ​ ສົມສີ​ ມະນີ​ນິນ​ ຄະນະປະຈໍາ​ພັກແຂວງ​ ຫົວ​ໜ້າຄະນະຈັດຕັ້ງແຂວງ,​ ສະຫາຍ​ ປະດິດ​ ວັນນະ​ລັດສະໝີ​ ຄະນະປະຈໍາ​ພັກແຂວງ​ ຫົວໜ້າ​ຄະນະໂຄສະນາອົບຮົບແຂວງ.​ ມີຄະນະ ປັບປຸງກົງຈັກການຈັດຕັ້ງພັ​ກ -​ ລັດຂັ້ນແຂວງ, ຄະນະ​ພັກ​ -​ ຄະນະນໍາ​ຄະນະ​ໂຄສະນາ​ອົບຮົມ​ແຂວງ​, ເລຂາ​ -​ ຮອງເລຂາ​ໜ່ວຍພັກ​, ຫົວໜ້າ​ -​ ຮອງຫົວໜ້າ​ຈຸພັກ,​ ສະມາຊິກພັກພາຍໃນຄະນະໂຄສະນາອົບຮົມ​ ເຂົ້າຮ່ວມ.​

          ໃນກອງປະຊຸມ, ສະຫາຍ ປະດິດ ວັນນະລັດສະໝີ ໄດ້ຜ່ານບົດລາຍງານໂດຍສັງເຂບໃນການຈັດຕັ້ງປະຕິບັດວຽກງານຮອບດ້ານໃນໄລຍະຜ່ານມາ ເຊິ່ງໄດ້ຍົກໃຫ້ເຫັນຜົນງານອັນພົ້ນເດັ່ນໃນວຽກງານສຶກສາອົບຮົມການເມືອງ​ – ແນວຄິດ, ວຽກງານໂຄສະນາ​ – ປາຖະກະຖາ, ວຽກງານຂໍ້ມູນຂ່າວສານ ແລະ ສື່ມວນຊົນ ທີ່ສາມາດເຄື່ອນໄຫວຮັບໃຊ້ໜ້າທີ່ການເມືອງຢ່າງມີປະສິດທິຜົນ, ປະກອບສ່ວນເຂົ້າໃນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງຕໍ່ເນື່ອງ.

             ໃນກອງປະຊຸມ, ສະຫາຍ ປະດິດ ວັນນະລັດສະໝີ ໄດ້ຜ່ານບົດລາຍງານໂດຍສັງເຂບໃນການຈັດຕັ້ງປະຕິບັດວຽກງານຮອບດ້ານໃນໄລຍະຜ່ານມາ ເຊິ່ງໄດ້ຍົກໃຫ້ເຫັນຜົນງານອັນພົ້ນເດັ່ນໃນວຽກງານສຶກສາອົບຮົມການເມືອງ​ – ແນວຄິດ, ວຽກງານໂຄສະນາ​ – ປາຖະກະຖາ, ວຽກງານຂໍ້ມູນຂ່າວສານ ແລະ ສື່ມວນຊົນ ທີ່ສາມາດເຄື່ອນໄຫວຮັບໃຊ້ໜ້າທີ່ການເມືອງຢ່າງມີປະສິດທິຜົນ, ປະກອບສ່ວນເຂົ້າໃນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງຕໍ່ເນື່ອງ.
​             ຕໍ່ມາ,​ ​ຄະນະປັບປຸງກົງຈັກການຈັດຕັ້ງພັກ -​ ລັດ​ ຂັ້ນແຂວງ​ ກໍ ໄດ້ຜ່ານມາດຕະຖານ, ເງື່ອນໄຂຂອງຜູ້ທີ່ຈະລົງສະໝັກຮັບເລືອກຕັ້ງເຂົ້າໃນຄະນະພັກຮາກຖານຊຸດໃໝ່ ມາດຕະຖານເງື່ອນໄຂຂອງພະນັກງານນຳພາ​ – ຄຸ້ມຄອງ,​ ໂດຍປະຕິບັດຕາມ ມະຕິຂອງກົມການເມືອງສູນກາງພັກ ເລກທີ 030/ກມສພ, ລົງວັນທີ 3 ມັງກອນ​ 2018 ວ່າດ້ວຍມາດຕະຖານຂອງພະນັກງານນໍາພາ​ – ຄຸ້ມຄອງ ເພື່ອເປັນບ່ອນອີງໃຫ້ແກ່ການທາບທາມເອົາຄະນະພັກຮາກຖານຄະນະໂຄສະນາອົບຮົມແຂວງ ໂດຍຍົກໃຫ້ເຫັນມາດຕະຖານລວມ​ ເປັນຕົ້ນແມ່ນດ້ານຄຸນທາດການເມືອງ,​ ດ້ານຄຸນສົມບັດສິນທຳປະຕິວັດ ແລະ ແບບແຜນດໍາລົງຊີວິດ, ດ້ານຄວາມຮູ້-ຄວາມສາມາດ, ດ້ານແບບແຜນການນໍາພາ ແລະ ວິທີເຮັດວຽກ,​ ດ້ານສຸຂະພາບ.​ ນອກນີ້,​ ຍັງຍົກໃຫ້ເຫັນມາດຖານສະເພາະ ຕາມມະຕິຂອງກົມການເມືອງສູນກາງພັກ ເລກທີ 030/ກມສພ​ ເປັນຕົ້ນ​ແມ່ນ​ ມີທັດສະນະຫຼັກໝັ້ນການເມືອງໜັກແໜ້ນ, ມີຄວາມບໍລິສຸດສັດຊື້ຕໍ່ພັກ, ຕໍ່ການຈັດຕັ້ງ, ຕໍ່ປະຊາຊົນ, ມີຫຼັກໝັ້ນມິດ​ – ສັດຕູຈະແຈ້ງ,​ ເປັນເອກະພາບສູງກັບແນວທາງປ່ຽນແປງໃໝ່ຂອງພັກ ແລະ ຮູ້ຈັດຕັ້ງຜັນຂະຫຍາຍແນວທາງ, ມະຕິ, ຄໍາສັ່ງຂອງພັກ, ລະບຽບ, ກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມເຂົ້າໃນໜ້າທີ່ ການເມືອງຂອງຕົນທີ່ຖືກມອບໝາຍ,​ ມີປະສົບການ ແລະ ສໍາເລັດໜ້າທີ່ຕຳແໜ່ງນໍາພາ​ – ຄຸ້ມຄອງໃດ​ໜຶ່ງ​ມາກ່ອນ​.

               ໂອກາດນີ້,​ ສະຫາຍ​ ສຸພາບ​ ທໍາມະ​ຮັກສາ​ ຮອງເລຂາ​ຄະນະ​ບໍລິຫານງານ​ພັກແຂວງ​ ຜູ້ຊີ້ນໍາ​ວຽກງານ​ການເມືອງ​ -​ ແນວຄິດ, ວຽກງານ​ພັກ​ -​ ພະນັກງານ​ ແລະ​ ວຽກງານ​ອົງການ​ຈັດຕັ້ງ​ມະຫາຊົນ, ກໍມີຄໍາເຫັນຊີ້ນໍາວ່າ: ການທາບທາມບຸກຄະລາກອນ ເຂົ້າໃສ່ໂຄງປະກອບຄະນະ​ພັກຮາກຖານ​ຄະນະ​ໂຄສະນາ​ອົບຮົມ​ແຂວງ​ ຄັ້ງນີ້ ສຸດທີ່ມີຄວາມສໍາຄັນ, ຍ້ອນແນວນັ້ນ,​ ຜູ້ເຂົ້າຮ່ວມ​ຕ້ອງກໍາແໜ້ນມາດຕະຖານລວມ​ ແລະ​ ມາດຕະຖານ​ສະເພາະຂອງບຸກຄະລາກອນຜູ້ທີ່ຈະຄັດເລືອກເຂົ້າໃສ່ໂຄງປະກອບຄະນະພັກ​ຮາກຖານ​ ພ້ອມທັງຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໃນຖານະເປັນສະມາຊິກພັກ ຕ້ອງແຍກແຍະ​ ເລື່ອງສ່ວນລວມ ແລະ​ ເລື່ອງສ່ວນຕົວ​ ເພື່ອ​ເລືອກເອົາບຸກຄົນທີ່ມີມາດຕະຖານ,​ ເງື່ອນໄຂ​ໂດດເດັ່ນ​ກວ່າໝູ່​ ເຂົ້າໃນໂຄງປະກອບ​ຄະນະ​ພັກຮາກຖານ​ ເພື່ອເຮັດໜ້າທີ່ໃນການນໍາພາ​ -​ ຊີ້ນໍາ​ ໃຫ້ມີຄວາມສອດຄ່ອງ​ ບົນພື້ນຖານ​ກົດລະບຽບ​ພັກ, ເຄົາລົບ​ເຊິ່ງກັນ​ ແລະ​ ກັນ.​

                 ຈາກນັ້ນ, ຄະນະປັບປຸງກົງຈັກການຈັດຕັ້ງ ພັກ​ – ລັດ ຂັ້ນແຂວງ​ກໍດໍາເນີນການທາບທາມ​ ໂດຍແຈກຢາຍບັດ​ ແລະ​ ແນະນໍາວິທີການຂີດບັດທາບທາມບຸກຄະລາກອນ​ເຂົ້າໃສ່ໂຄງປະກອບຄະນະພັກຮາກຖານ​ຄະນະ​ໂຄສະນາ​ອົບຮົມ​ແຂວງ​ ເພື່ອຄັດເລືອກເອົາຜູ້ທີ່ມີມາດຖານ, ເງື່ອນໄຂຄົບຖ້ວນ, ມີຄວາມຮູ້ຄວາມສາມາດ ແລະ ຄຸນສົມບັດສິນທຳປະຕິວັດ ເຂົ້າເປັນຄະນະພັກຮາກຖານຊຸດໃໝ່.​ ຮອບທີ​ 1 ແມ່ນທາບທາມແບບເປີດກວ້າງ,​ ຮອບທີ​ 2,​ ມີຜູ້ອອກທາບທາມ 11 ສະຫາຍ,​ ຂີດ​ອອກ​ 2​ ສະຫາຍ​,​ ຮັກສາ​ໄວ້​ 9 ສະຫາຍ.

                ຈາກນັ້ນ, ຜູ້ເຂົ້າຮ່ວມກອງປະຊຸມ​ ກໍໄດ້ພ້ອມກັນໃຊ້ສິດປະຊາທິປະໄຕ ແລະ ຄວາມຮັບຜິດຊອບການເມືອງຂອງຕົນ ເຂົ້າໃນການປ່ອນບັດທາບທາມບຸກຄະລາກອນຮອບທີ 1 ແລະ ຮອບທີ 2.​ ໃນກອງປະຊຸມ​ ຍັງໄດ້ຜ່ານ ແລະ ປະກອບຄຳເຫັນໃສ່ (ຮ່າງ) ບົດລາຍງານການເມືອງ ແລະ ບົດສຳຫຼວດການນຳພາລວມ ຂອງຄະນະພັກຮາກຖານ ເພື່ອປັບປຸງເນື້ອໃນໃຫ້ມີຄວາມສົມບູນ, ຄົບຖ້ວນ ແລະ ເລິກເຊິ່ງ ໂດຍສະເພາະແມ່ນການກຳນົດທິດທາງແຜນການ 5 ປີຕໍ່ໜ້າ ໃຫ້ສອດຄ່ອງກັບຈຸດພິເສດ ແລະ ຄວາມຮຽກຮ້ອງຕ້ອງການຂອງວຽກງານການເມືອງໃນໄລຍະໃໝ່.
* ຂ່າວ​-ພາບ​: ທູນທອງໃຈ​ *

Bài viết ຄະນະພັກຮາກຖານຄະນະໂຄສະນາອົບຮົມແຂວງຈໍາປາສັກ​ ສໍາເລັດການທາບທາມບຸກຄະລາກອນເຂົ້າໃສ່ໂຄງປະກອບຄະນະພັກຮາກຖານ đã xuất hiện đầu tiên vào ngày .

              ວັນທີ 26 ມິຖຸນາ 2026,ທີ່ສະໂມສອນຫຼັກ 4 ແຂວງຈຳປາສັກ,ຄະນະໂຄສະນາອົບຮົມແຂວງຈຳປາສັກ ໄດ້ຈັດພິທີ ເຊື່ອມຊຶມເອກະສານ 4 ບົດ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ ໃຫ້ແກ່ 6 ຄະນະພັກຮາກຖານ.ໃນນັ້ນຕອນເຊົ້າ 4 ຄະນະພັກຮາກຖານ ຄື: ຄະນະພັກຮາກຖານຄະນະຈັດຕັ້ງແຂວງ, ຄະນະໂຄສະນາອົບຮົມແຂວງ, ພະແນກການເງິນແຂວງ,ດ່ານສາກົນວັງເຕົ່າ.ສ່ວນຕອນບ່າຍ ມີ 2 ຄະນະພັກຮາກຖານຄື ຄະນະພັກຮາກຖານ ພະແນກອຸດສະກຳ – ການຄ້າ ແລະ ພະແນກກະສິກຳ – ສິ່ງແວດລ້ອມແຂວງ. ພິທີໂດຍໃຫ້ກຽດເປັນປະທານ ຂອງ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ,ຫົວໜ້າຄະນະໂຄສະນາອົບຮົມແຂວງ,ມີເລຂາ,ຮອງເລຂາຄະນະພັກຮາກຖານ,ເລຂາ,ຮອງເລຂາຄະນະໜ່ວຍພັກ ແລະ ສະມາຊິກພັກ 6 ຮາກຖານເຂົ້າຮ່ວມ.

              ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ,ຫົວໜ້າຄະນະໂຄສະນາອົບຮົມແຂວງ ໄດ້ເຜີຍແຜ່ເຊື່ອມຊຶມເອກະສານ 4 ບົດ ເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ ຄື:
1.ຄວາມເຂົ້າໃຈກ່ຽວກັບການດໍາເນີນກອງບະຊຸມໃຫຍ່ 3 ຂັ້ນຂອງພັກ.
2: ຍົກສູງຄວາມສາມາດນໍາພາ ແລະ ຄວາມເປັນ ແບບຢ່າງນໍາໜ້າຂອງພັກ.
3: ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ຄຸນສົມບັດສິນທຳປະຕິວັດຂອງພະນັກງານ, ສະມາຊິກພັກ..
4: ເດັດດ່ຽວແກ້ໄຂປະກົດການຫຍໍ້ທໍ້ ໃນຖັນແຖວພະນັກງານສະມາຊິກພັກ.

                ຈຸດປະສົງເພື່ອແນໃສ່ໃຫ້ຄະນະພັກ,ພະນັກງານສະມາຊິກພັກຮັບຮູ້ເຂົ້າໃຈ ແລະກໍາແໜ້ນນື້ອໃນຈິດໃຈຢ່າງໜັກແໜ້ນ ແລະ ເລິກເຊິ່ງ.ເຂົ້າໃຈກ່ຽວກັບ ການດໍາເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ເປັນເຈົ້າການນໍາເອົາມະຕິກອງປະຊຸມ ໄປຈັດຕັ້ງຜັນຂະຫຍາຍ ໃຫ້ເກີດຜົນເປັນຈິງ. ເພື່ອເປັນການປັບປຸງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຮັບປະກັນການກໍ່ສ້າງພັກຕາມ 5 ຫຼັກການ ແລະ 3 ທິດນໍາຂອງພັກ, ຖືກຕ້ອງຕາມ ກົດລະບຽບພັກ; ເພື່ອຄັດເລືອກບຸກຄະລາກອນ ທີ່ມີມາດຕະຖານ, ເງື່ອນໄຂຕາມທີ່ກຳນົດໄວ້ ປະກອບເຂົ້າໃນ ການຈັດຕັ້ງແຕ່ລະຂັ້ນ ໃນລະບົບການເມືອງ, ເພື່ອບຸກທະລຸການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານຂອງຂະແໜງການ, ທ້ອງຖິ່ນ, ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າ ທີ່ການເມືອງໃນໄລຍະໃໝ່ ແລະ ເພື່ອສ້າງຄວາມເຊື່ອໝັ້ນ, ສັດທາຂອງມະຫາຊົນ ຕໍ່ການນໍາພາຂອງຄະນະພັກ ແຕ່ລະຂັ້ນ.

ຂ່າວ,ພາບ: ເກດສະໜາ

Bài viết ແຂວງຈຳປາສັກເຊື່ອມຊຶມເອກະສານກະກຽມໃຫ້ແກ່ການດຳເນີນກອງປະຊຸມໃຫຍ່ຂອງຄະນະພັກຮາກຖານ. đã xuất hiện đầu tiên vào ngày .

              ວັນທີ​ 20​ ມິຖຸນາ​ 2026,​ບໍລິສັດ ຊຽວໜີວ ເທັກໂນໂລຢີ ຈຳກັດ ເປີດໂຕ ລົດຖີບໄຟຟ້າຮັບໃຊ້ສັງຄົມ (Laos E bike) ຢູ່ນະຄອນປາກເຊ ແຂວງຈໍາປາສັກ ເພື່ອຮ່ວມກັນສ້າງ ນະຄອນປາກເຊ ໃຫ້ເປັນຕົວເມືອງສີຂຽວ, ຫຼຸດຜ່ອນການນໍາໃຊ້ນໍ້າມັນເຊື້ອໄຟ ແລະ ສົ່ງເສີມການທ່ຽງທ່ຽວແບບອະນຸລັກ ສິ່ງແວດລ້ອມ.​ ພິທີ​ຈັດຂຶ້ນ​ຢູ່ໂຮງແຮມ ເອລາວັນ ຣີເວີຊາຍ ໂດຍການ​ໃຫ້ກຽດ​ເຂົ້າຮ່ວມ​ຂອງທ່ານ​ ສະນັ່ນ​ ສີດາວົງ ກໍາມະການພັກແຂວງ​ ຫົວໜ້າ​ພະແນກການ​ເງິນແຂວງ, ທ່ານ​ ບາສີ ພອນ​ແກ້ວ​ ຮອງຫົວໜ້າ​ພະແນກ​ໂຍທາທິການ​ ແລະ​ ຂົນສົ່ງ​ແຂວງ,​ ທ່ານ ດວງປັນຍາ ວໍລະວົງ ຮອງຜູ້ອໍານວຍການບໍລິສັດ ຊຽວໝິວ ເທັກໂນໂລຢີ ຈໍາກັດ.​ ມີນໍາການນໍາພະແນກການກົມກອງທີ່ກ່ຽວຂ້ອງຂອງແຂວງ, ການນໍານະຄອນປາກເຊ, ແຂກເຊື້ອເຊີນ ຈາກພາກລັດ,​ ເອກະຊົນ,​ ພະນັກງານ ແລະ ສະມາຊິກຄອບຄົວ ລົດຖີບໄຟຟ້າ ຮັບໃຊ້ສັງຄົມ​ ເຂົ້າ​ຮ່ວມ.​

                ໃນພິທີ,​ ທ່ານ ດວງປັນຍາ ວໍລະວົງ ໃນນາມຜູ້ຮ່ວມກໍ່ຕັ້ງ ແລະ ຕາງໜ້າບໍລິສັດ ຊຽວໝິວ ເທັກໂນໂລຢີ ຈໍາກັດ​ ໄດ້ໃຫ້ກຽດກ່າວຈຸດປະສົງ ແລະ ລາຍງານຄວາມເປັນມາຂອງໂຄງການ​ ວ່າ: ໂລກຂອງພວກເຮົາພວມຜ່ານຜ່າການປ່ຽນແປງຄັ້ງໃຫຍ່ ໂດຍສະເພາະສິ່ງທ້າທາຍດ້ານສິ່ງແວດລ້ອມ ແລະ ການຫັນປ່ຽນດ້ານພະລັງງານ ເຊິ່ງບໍ່ແມ່ນເລື່ອງໄກຕົວ, ແຕ່ເປັນໜ້າທີ່ຂອງທຸກຄົນທີ່ຈະຕ້ອງໄດ້ຮ່ວມ ມືກັນແກ້ໄຂ.​ ດ້ວຍແຮງບັນດານໃຈດັ່ງກ່າວ, ບໍລິສັດ ຊຽວໜີວ ເທັກໂນໂລຢີ ຈຳກັດ ຈຶ່ງໄດ້ສ້າງຕັ້ງ ແລະ ໄດ້ຮັບການຂຶ້ນທະບຽນວິສາຫະກິດຢ່າງເປັນທາງການ ໃນວັນທີ 24 ທັນວາ 2024​ ເປັນການຮ່ວມທຶນ​ ລະຫວ່າງ​ ນັກລົງທຶນລາວ ແລະ ນັກລົງທຶນຈາກ ສປ ຈີນ​ ໂດຍມີທຶນຈົດທະບຽນ 10 ຕື້ກີບ ເຊິ່ງເປັນການຢັ້ງຢືນເຖິງຄວາມມຸ່ງໝັ້ນອັນແຮງກ້າ ທີ່ຈະນຳເອົາການບໍລິການດ້ານເທັກໂນໂລຢີທີ່ທັນສະໄໝ ແລະ ບໍລິການລົດໃຫ້ເຊົ່າທີ່ໄດ້ມາດຕະຖານສາກົນ ມາຮັບໃຊ້ສັງຄົມລາວ.​

            ທ່ານ ດວງປັນຍາ ວໍລະວົງ ກ່າວຕື່ມວ່າ: ລົດຖີບໄຟຟ້າຈະເປັນທາງເລືອກທີ່ຊ່ວຍປະຢັດຄ່າໃຊ້ຈ່າຍດ້ານພະລັງງານໃນການເດີນທາງປະຈຳວັນຢ່າງແທ້ຈິງ​ ທັງເປັນການຕອບແທນຄືນສູ່ຊຸມຊົນ,​ ບໍລິສັດ​ ໄດ້ຕັ້ງເປົ້າໝາຍແບ່ງປັນຜົນກຳໄລເຂົ້າໃນກິດຈະກໍາສາທາລະນະປະໂຫຍດ ເຊັ່ນ: ການສະໜັບສະໜູນການສຶກສາ, ການຊ່ວຍເຫຼືອສັງຄົມ ແລະ ການປູກຕົ້ນໄມ້ເພີ່ມພື້ນທີ່ສີຂຽວ.​ ພວກເຮົາເຊື່ອໝັ້ນ​ວ່າ​ ລົດຖີບໄຟຟ້າ ຮັບ ໃຊ້ສັງຄົມ ຈະເປັນສ່ວນໜຶ່ງໃນການຍົກລະດັບຊີວິດການເປັນຢູ່ຂອງຊາວນະຄອນປາກເຊ, ອຳນວຍຄວາມສະດວກ ໃຫ້ນັກທ່ອງທ່ຽວທີ່ມາຢ້ຽມຢາມ ແລະ ສ້າງພາບລັກການເປັນເມືອງທັນສະໄໝພະລັງງານສະອາດ​ ໃຫ້ແກ່ແຂວງ ຈຳປາສັກ.​ ພ້ອມນີ້​ ກໍໄດ້ນໍາສະເໜີຂໍ້ມູນດ້ານເຕັກນິກ, ວິທີການນໍາໃຊ້ ແລະ ລະບົບແອັບພລິເຄຊັນ.​

          ໂອກາດນີ້,​ ທ່ານ​ ສະນັ່ນ​ ສີດາວົງ ກໍາມະການພັກແຂວງ​ ຫົວໜ້າ​ພະແນກການ​ເງິນແຂວງ​ ກໍມີກ່າວຄຳເຫັນວ່າ: ການເປີດໂຕລົດຖີບໄຟຟ້າຮັບໃຊ້ສັງຄົມຄັ້ງນີ້ ຖືເປັນບາດກ້າວອັນສໍາຄັນ ແລະ ເປັນຂີດໝາຍໃໝ່ ໃນການຫັນປ່ຽນວິຖີຊີວິດການສັນຈອນຂອງພໍ່ແມ່ປະຊາຊົນ, ນັກຮຽນ​ – ນັກສຶກສາ ລວມເຖິງນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ກ້າວໄປສູ່ການນໍາໃຊ້ພະລັງງານສະອາດ ເພື່ອບັນລຸເປົ້າໝາຍຫຼຸດຜ່ອນມົນລະພິດ,​ ຊ່ວຍຫຼຸດຜ່ອນການປ່ອຍກາສເຮືອນແກ້ວ ແລະ ຄວັນພິດຈາກຍານພາຫະນະຕາມທ້ອງຖະໜົນ, ຮັກສາອາກາດທີ່ບໍລິສຸດໃຫ້ກັບຕົວເມືອງ; ເປັນທາງເລືອກໃໝ່ໃນການເດີນທາງທີ່ມີລາຄາປະຢັດ, ເໝາະສົມກັບທຸກເພດທຸກໄວ, ຊ່ວຍຫຼຸດຜ່ອນຄ່າໃຊ້ຈ່າຍໃນຊີວິດປະຈຳວັນຂອງປະຊາຊົນ.​ ນອກນີ້​ ກໍເພື່ອຍົກລະດັບພາບພົດການທ່ອງທ່ຽວ,​ ສ້າງຄວາມປະທັບໃຈໃຫ້ແກ່ນັກທ່ອງທ່ຽວ ຜ່ານການບໍລິການທີ່ ທັນສະໄໝ, ສະດວກສະບາຍ ແລະ ເປັນມິດຕໍ່ສິ່ງແວດລ້ອມ.​ ການຫັນມານໍາໃຊ້ລົດຖີບໄຟຟ້າ ຍັງເປັນການສະແດງເຖິງຄວາມສີວິໄລ ແລະ ຄວາມຮ່ວມມືຂອງທຸກພາກສ່ວນ ໃນການສ້າງສັງຄົມ.​ ເພື່ອເຮັດໃຫ້ໂຄງການນີ້ ດໍາເນີນໄປດ້ວຍຄວາມຮຽບຮ້ອຍ, ມີຄວາມຍືນຍົງ ແລະ ເກີດປະໂຫຍດສູງສຸດຕໍ່ສັງຄົມ, ຂໍຮຽກຮ້ອງມາຍັງພາກສ່ວນຮັບຜິດຊອບ ແລະ ບໍລິສັດຜູ້ບໍລິການ​ ຈົ່ງເອົາໃຈໃສ່ໃນການຄຸ້ມຄອງ, ບຳລຸງຮັກສາລະບົບ ແລະ ຕົວລົດຖີບໄຟຟ້າໃຫ້ມີຄວາມພ້ອມ, ມີຄວາມປອດໄພ 100% ໃນການບໍລິການຢູ່ສະເໝີ,​ ພໍ່ແມ່ປະຊາຊົນ ແລະ ຜູ້ຊົມໃຊ້ທຸກທ່ານ: ຈົ່ງຮ່ວມກັນເປັນເຈົ້າການໃນການນໍາໃຊ້ຢ່າງມີສະຕິ, ຮັກສາ ຊັບສິນສ່ວນລວມ, ເຄົາລົບກົດລະບຽບການຈະລາຈອນຢ່າງເຂັ້ມງວດ ເພື່ອຄວາມປອດໄພຂອງຕົນເອງ ແລະ ຜູ້ຮ່ວມທາງ.
#ຕໍ່ມາ, ກໍໄດ້ຕັດແຖບຜ້າເປີດໂຕ ລົດຖີບໄຟຟ້າຢ່າງເປັນທາງການ.​ ຈາກນັ້ນ, ຄະນະປະທານ, ການນໍາຂັ້ນສູງ ແລະ ແຂກທີ່​ເຂົ້າຮ່ວມ​ພີລິທີ ກໍໄດ້ຢ້ຽມຊົມຜະລິດຕະພັນ ແລະ ທົດລອງຂັບຂີ່ລົດຖີບໄຟຟ້າຕົວຈິງ​​ ຕື່ມອີກ.

ຂ່າວ​-ພາບ​: ທູນທອງໃຈ​​

Bài viết ເປີດໂຕ ” ລົດຖີບໄຟຟ້າຮັບໃຊ້ສັງຄົມ “​ ຢູ່ນະຄອນປາກເຊ​ ແຂວງຈໍາປາສັກ​ đã xuất hiện đầu tiên vào ngày .

            ຄະນະໂຄສະນາອົບຮົມສູນກາງພັກ (ຄອສພ) ໄດ້ຈັດກອງປະຊຸມສຳມະນາວິທະຍາສາດກະກຽມວຽກງານສື່ມວນຊົນທົ່ວປະເທດ ຄັ້ງທີ 1 ຂຶ້ນໃນວັນທີ 16 ມິຖຸນານີ້ ທີ່ຫ້ອງປະຊຸມ ຄອສພ, ໂດຍການເປັນປະທານຂອງ ສະຫາຍ ຄໍາພັນ ເຜີຍຍະວົງ ກຳມະການກົມການເມືອງສູນກາງພັກ ຫົວໜ້າ ຄອສພ, ມີບັນດາຕາງໜ້າກົມກອງ, ກະຊວງ, ອົງການ ອ້ອມຂ້າງຂັ້ນສູນກາງ ທີ່ກ່ຽວຂ້ອງກັບການເຄື່ອນໄຫວວຽກງານສື່ມວນຊົນທົ່ວປະເທດເຂົ້າຮ່ວມ.

           ໃນໂອກາດດັ່ງກ່າວ, ສະຫາຍ ຄຳພັນ ເຜີຍຍະວົງ ໄດ້ກ່າວວ່າ: ກອງປະຊຸມໃນຄັ້ງນີ້ ແມ່ນຈະໄດ້ພ້ອມກັນຄົ້ນຄວ້າເນື້ອໃນ ຮ່າງບົດສະຫຼຸບການຕີລາຄາການເຄື່ອນໄຫວ ວຽກງານສື່ມວນຊົນໃນໄລຍະຜ່ານມາ ແລະ ການກໍານົດທິດທາງລວມຕໍ່ໜ້າ ຮອດປີ 2030; ພ້ອມນີ້ຍັງຈະໄດ້ຄົ້ນຄວ້າລົງເລິກເນື້ອໃນຮ່າງມະຕິຂອງກົມການເມືອງສູນກາງພັກ ທີ່ຈະປ່ຽນແທນມະຕິ 36 ຂອງກົມການເມືອງສູນກາງພັກ ກ່ຽວກັບການເພີ່ມທະວີການນໍາພາຂອງພັກ ແລະ ການຄຸ້ມຄອງຂອງລັດ ຕໍ່ສື່ມວນຊົນ ໃນໄລຍະໃໝ່, ລົງວັນທີ 19 ມິຖຸນາ ປີ 1993 ຊຶ່ງເຫັນວ່າເອກະສານດັ່ງກ່າວນີ້ ນໍາໃຊ້ມາເປັນເວລາຍາວນານສົມຄວນແລ້ວ. ສະນັ້ນ, ເພື່ອໃຫ້ສອດຄ່ອງກັບວຽກງານການພັດທະນາເສດຖະກິດ-ສັງຄົມໃນໄລຍະໃໝ່ ຕ້ອງໄດ້ຄົ້ນຄວ້າປັບປຸງຄືນ; ກອງປະຊຸມຈະໄດ້ລົງເລິກສອງເອກະສານສໍາຄັນ ເພື່ອກະກຽມໃຫ້ແກ່ກອງປະຊຸມວຽກງານສື່ມວນຊົນ ທົ່ວປະເທດ ຄັ້ງທີ 1 ແລະ ຖືວ່າເປັນກອງປະຊຸມຄັ້ງປະຫວັດສາດ, ຄັ້ງທໍາອິດຂອງວຽກງານສື່ມວນຊົນທົ່ວປະເທດ, ທີ່ຈະພ້ອມກັນສຸມໃສ່ສະຫຼຸບຕີລາຄາຄືນການເຄື່ອນໄຫວວຽກງານຂອງສື່ມວນຊົນໄລຍະຜ່ານມາ ແລະ ກໍານົດທິດທາງລວມຮອດປີ 2030 ເພື່ອໃຫ້ມີການຫັນປ່ຽນໄປສູ່ຄຸນນະພາບໃໝ່ ຢ່າງແຂງແຮງ.

           ພ້ອມນີ້, ສະຫາຍ ຄຳພັນ ເຜີຍຍະວົງ ຍັງໄດ້ຮຽກຮ້ອງມາຍັງບັນດາສະຫາຍທັງໝົດທີ່ເຂົ້າຮ່ວມກອງປະຊຸມ ຈົ່ງເຊີດຊູຄວາມຮັບຜິດຊອບສູງ, ເອົາໃຈໃສ່ຄົ້ນຄວ້າ, ສຸມສະຕິປັນຍາເຂົ້າໃນການປະກອບຄຳຄິດຄຳເຫັນໃສ່ຮ່າງເອກະສານສຳຄັນ ຮ່າງບົດສະຫຼຸບຕີລາຄາ, ຮ່າງມະຕິ ທີ່ກອງເລຂາຄະນະຮັບຜິດຊອບຈະໄດ້ນໍາສະເໜີຜ່ານກອງປະຊຸມສໍາມະນາ ແລະ ບັນດາເອກະສານທີ່ກອງເລຂາແຈກຢາຍໄປກ່ອນແລ້ວນັ້ນ ເພື່ອໃຫ້ມີເນື້ອໃນຄົບຖ້ວນ, ເລິກເຊິ່ງ ແລະ ສອດຄ່ອງກັບສະພາບຕົວຈິງໃນປັດຈຸບັນ.

(ຂ່າວ ສົມຫວັງ; ພາບ ຂັນໄຊ)

Bài viết ຄະນະໂຄສະນາອົບຮົມສູນກາງພັກ ສຳມະນາວິທະຍາສາດກະກຽມກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ 1 đã xuất hiện đầu tiên vào ngày .

ກອງປະຊຸມໃຫຍ່ຜູ້ແທນທົ່ວປະເທດ ຂອງພັກປະຊາຊົນ ປະຕິວັດລາວ ແມ່ນເຫດການການເມືອງ ທີ່ມີຄວາມໝາຍສຳຄັນສູງສຸດ ເຊິ່ງເປັນການຮ່ວມຊຸມນຸມເພື່ອສະຫຼຸບຕີລາຄາການນຳພາ, ວາງແຜນທາງຍຸດທະສາດໃນການພັດທະນາປະເທດຊາດ ແລະ ເລືອກຕັ້ງຄະນະບໍລິຫານງານຊຸດໃໝ່. ນີ້ແມ່ນຂໍ້ມູນສະຫຼຸບໂດຍຫຍໍ້ກ່ຽວກັບປະຫວັດການຈັດກອງປະຊຸມໃຫຍ່ ແຕ່ຄັ້ງທີ I ຈົນເຖິງປັດຈຸບັນ:< ​ປະຫວັດຄວາມເປັນມາໂດຍຫຍໍ້ >

ຄໍາຂັວນກອງປະຊຸມໃຫ່ຍຜູ້ແທນທົ່ວປະເທດ ນັບແຕ່ຄັ້ງທີ I-XII ຂອງພັກປະຊາຊົນປະຕິວັດລາວ

ກອງປະຊຸມໃຫຍ່ ຄັ້ງທີ I (ປີ 1955)  ເປັນກອງປະຊຸມສ້າງຕັ້ງ “ພັກປະຊາຊົນລາວ” (ຊື່ໃນເວລານັ້ນ) ໂດຍມີ ທ່ານ ໄກສອນ ພົມວິຫານ ເປັນເລຂາທິການໃຫຍ່ຄົນທຳອິດ.

ສະຖານທີ່: ແຂວງຫົວພັນ ພາຍໃຕ້ຄຳຂັວນ: 

*. ເນື້ອໃນຈິດໃຈ: “ເຕົ້າໂຮມທຸກກຳລັງຮັກຊາດ, ຕີຊະນະຈັກກະພັດລ່າເມືອງຂຶ້ນຝຣັ່ງ ແລະ ແທດເສີຍ (ລູກມື), ຕ້ານການແຊກແຊງຂອງຈັກກະພັດອາເມລິກາ, ສ້າງຕັ້ງປະເທດລາວ ທີ່ສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.”

ກອງປະຊຸມໃຫຍ່ ຄັ້ງທີ II (ປີ 1972) ໄດ້ປ່ຽນຊື່ພັກມາເປັນ “ພັກປະຊາຊົນ ປະຕິວັດລາວ” ຈົນເຖິງປັດຈຸບັນ ແລະ ວາງທິດທາງປົດປ່ອຍຊາດ.

ສະຖານທີ່: ແຂວງຫົວພັນ ພາຍໃຕ້ຄຳຂັວນ: 

*. ເນື້ອໃນຈິດໃຈ: “ເພີ່ມທະວີຄວາມສາມັກຄີທົ່ວປວງຊົນ, ເສີມຂະຫຍາຍກຳລັງແຮງແຫ່ງຄວາມເປັນເຈົ້າການ, ເດັດດ່ຽວຕີຊະນະສົງຄາມຮຸກຮານຂອງຈັກກະພັດອາເມລິກາ ແລະ ລູກມື, ປົດປ່ອຍປະເທດຊາດ, ເຮັດໃຫ້ການປະຕິວັດຊາດ ປະຊາທິປະໄຕ ສຳເລັດຜົນໃນທົ່ວປະເທດ.”

ກອງປະຊຸມໃຫຍ່ ຄັ້ງທີ III (ປີ 1982) ເປັນກອງປະຊຸມໃຫຍ່ຄັ້ງທຳອິດຫຼັງຈາກສະຖາປະນາ ສປປ ລາວ (ປີ 1975) ເພື່ອວາງແນວທາງປົກປັກຮັກສາ ແລະ ສ້າງສາລະບົບໃໝ່.

ສະຖານທີ່: ນະຄອນຫຼວງວຽງຈັນ (ເປັນຄັ້ງທຳອິດຫຼັງສະຖາປະນາ ສປປ ລາວ) ພາຍໃຕ້ຄຳຂັວນ: 

*. ເນື້ອໃນຈິດໃຈ: “ປົກປັກຮັກສາເອກະລາດ, ອະທິປະໄຕ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ, ເສີມຂະຫຍາຍລະບອບຜະເດັດການປະຕິວັດ, ຫັນປ່ຽນໄປສູ່ການຜະລິດໃຫຍ່ສັງຄົມນິຍົມ ເທື່ອລະກ້າວ.”

ກອງປະຊຸມໃຫຍ່ ຄັ້ງທີ IV (ປີ 1986) ເປັນຂີດໝາຍປະຫວັດສາດທີ່ສຳຄັນ ເພາະແມ່ນຈຸດເລີ່ມຕົ້ນຂອງ “ແນວທາງປ່ຽນແປງໃໝ່ຈິນຕະນາການ” ຮອບດ້ານທີ່ມີຫຼັກການ ໂດຍສະເພາະແມ່ນການຫັນປ່ຽນດ້ານເສດຖະກິດ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ເນື້ອໃນຈິດໃຈ: “ປ່ຽນແປງໃໝ່ຢ່າງມີຫຼັກການ ແລະ ຮອບດ້ານ” (ນີ້ແມ່ນຈຸດເລີ່ມຕົ້ນຂອງແນວທາງຈິນຕະນາການໃໝ່, ຫັນປ່ຽນຈາກເສດຖະກິດເກື້ອກູນ ໄປສູ່ເສດຖະກິດຕະຫຼາດ ທີ່ມີການຄຸ້ມຄອງຂອງລັດ).

ກອງປະຊຸມໃຫຍ່ ຄັ້ງທີ  V – X (ປີ 1991 – 2016): ແມ່ນໄລຍະການສືບຕໍ່ບູລະນະແນວທາງປ່ຽນແປງໃໝ່, ຊຸກຍູ້ການພັດທະນາເສດຖະກິດ-ສັງຄົມ, ເປີດກວ້າງການທູດ ແລະ ດຶງດູດການລົງທຶນຈາກຕ່າງປະເທດ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ກອງປະຊຸມໃຫຍ່ ຄັ້ງທີ  V ເນື້ອໃນຈິດໃຈ: “ສືບຕໍ່ບູລະນະລະບອບປະຊາທິປະໄຕປະຊາຊົນ, ເພີ່ມທະວີຄວາມສາມັກຄີທົ່ວປວງຊົນ, ຊຸກຍູ້ການປ່ຽນແປງໃໝ່ຢ່າງຮອບດ້ານ, ສ້າງປະເທດລາວ ໃຫ້ມີສັນຕິພາບ, ເອກະລາດ, ປະຊາທິປະໄຕ, ເອກະພາບ ແລະ ວັດທະນາຖາວອນ.”

*. ກອງປະຊຸມໃຫຍ່ ຄັ້ງທີ  VI ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ຍົກສູງບົດບາດນຳພາຂອງພັກ, ຊຸກຍູ້ຂະບວນການປ່ຽນແປງໃໝ່ໃຫ້ແຂງແຮງ, ສ້າງປະຖົມປັດໄຈໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ.”

*. ກອງປະຊຸມໃຫຍ່ ຄັ້ງທີ  VII ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ຍົກສູງຄວາມສາມາດນຳພາ ແລະ ສູ້ຮົບຂອງພັກ, ສືບຕໍ່ພາລະກິດປ່ຽນແປງໃໝ່ຢ່າງຮອບດ້ານ, ສ້າງປະຖົມປັດໄຈເພື່ອການຫັນເປັນອຸດສາຫະກຳ ແລະ ທັນສະໄໝ, ນຳພາປະເທດຊາດຫຼຸດພົ້ນອອກຈາກສະຖານະພາບຄວາມທຸກຍາກ ແລະ ດ້ອຍພັດທະນາ.”

*. ກອງປະຊຸມໃຫຍ່ ຄັ້ງທີ  VIII ເນື້ອໃນຈິດໃຈ: ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນ, ຢຶດໝັ້ນຈຸດໝາຍປ່ຽນແປງໃໝ່ຢ່າງຮອບດ້ານ, ພັດທະນາເສດຖະກິດ-ສັງຄົມ ໃຫ້ກ້າວຂຶ້ນຢ່າງໄວວາ ແລະ ຍືນຍົງ, ຍູ້ແຮງການຫຼຸດພົ້ນອອກຈາກຄວາມດ້ອຍພັດທະນາ.

*. ກອງປະຊຸມໃຫຍ່ ຄັ້ງທີ  IX ເນື້ອໃນຈິດໃຈ: ເພີ່ມທະວີຄວາມສາມັກຄີທົ່ວປວງຊົນ, ເຊີດຊູຄວາມເປັນຜູ້ນຳພາຂອງພັກ, ບຸກທະລຸທັງ 4 ດ້ານ (ຈິນຕະນາການ, ຊັບພະຍາກອນມະນຸດ, ກົນໄກການບໍລິຫານ, ຄວາມທຸກຍາກ), ສ້າງພື້ນຖານໃຫ້ແກ່ການຫັນເປັນອຸດສາຫະກຳ ແລະ ທັນສະໄໝ, ນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020.”

*. ກອງປະຊຸມໃຫຍ່ ຄັ້ງທີ X ເນື້ອໃນຈິດໃຈ: “ເພີ່ມທະວີຄວາມສາມັກຄີທົ່ວປວງຊົນ, ຍຶດໝັ້ນແນວທາງປ່ຽນແປງໃໝ່ຢ່າງມີຫຼັກການ, ຍົກສູງຄວາມສາມາດນຳພາຂອງພັກ, ສ້າງລັດແຫ່ງກົດໝາຍທີ່ສັກສິດ, ຍູ້ແຮງການພັດທະນາແບບຍືນຍົງ, ນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວໄປສູ່ຈຸດໝາຍສັງຄົມນິຍົມ.”

*. ກອງປະຊຸມໃຫຍ່ ຄັ້ງທີ XI  (ປີ 2021) ຈັດຂຶ້ນພາຍໃຕ້ສະພາບການທ້າທາຍຂອງໂລກ (ໂດຍສະເພາະແມ່ນການລະບາດຂອງໂຄວິດ-19) ເພື່ອວາງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ:

*. ເນື້ອໃນຈິດໃຈ (ຄຳຂວັນລວມ): “ເພີ່ມທະວີຄວາມສາມັກຄີປອງດອງຂອງປະຊາຊົນລາວບັນດາເຜົ່າ, ຍຶດໝັ້ນແນວທາງປ່ຽນແປງໃໝ່ຢ່າງມີຫຼັກການ, ເຊີດຊູນ້ຳໃຈຮັກຊາດ, ເສີມຂະຫຍາຍພະລັງແຮງຂອງລະບອບປະຊາທິປະໄຕປະຊາຊົນ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອຮັບປະກັນໃຫ້ປະເທດຊາດມີສະຖຽນລະພາບຢ່າງໜັກແໜ້ນ, ເສດຖະກິດ-ສັງຄົມຂະຫຍາຍຕົວຢ່າງຕໍ່ເນື່ອງ, ຄຸນນະພາບຊີວິດຂອງປະຊາຊົນໄດ້ຮັບການຍົກສູງຂຶ້ນ, ສ້າງບາດກ້າວບຸກທະລຸໃນການນຳພາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ກ້າວຂຶ້ນສູ່ຈຸດໝາຍສັງຄົມນິຍົມຢ່າງມີສະຖຽນລະພາບ.”

ກອງປະຊຸມໃຫຍ່ ຄັ້ງທີ XII (ປີ 2026) ເປັນກອງປະຊຸມໃຫຍ່ຄັ້ງຫຼ້າສຸດທີ່ຫາກໍຈັດຂຶ້ນ ເພື່ອປະເມີນຜົນການຈັດຕັ້ງປະຕິບັດໄລຍະຜ່ານມາ ແລະ ວາງທິດທາງຍຸດທະສາດໃໝ່ໃນການນຳພາປະເທດຊາດກ້າວຂຶ້ນຢ່າງໜັກແໜ້ນ.

ສະຖານທີ່: ນະຄອນຫຼວງວຽງຈັນ ພາຍໃຕ້ຄຳຂັວນ ( ບົດລາຍງານການເມືອງ) :

ກອງປະຊຸມໃຫຍ່ດໍາເນີນ “ຍົກສູງບົດບາດການນໍາພາທີ່ເຂັ້ມແຂງຂອງພັກ. ຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງສຶບຕໍ່ບູລະນະລະບອບປະຊາທິປະໄຕປະຊາຊົນ. ໃຫ້ໜັກແໜ້ນກ້າວຂື້ນສູ່ສັງຄົມນິຍົມ.
*. ແຜນພັດທະນາເສດຖະກິດສັງຄົມ ( 5 ປີ ) 2026-2030 ພາຍໃຕ້ຄໍາຂວັນ: ຕັ້ງໜ້າສ້າງເສດຖະກິດເອກະລາດເປັນເຈົ້າຕົນເອງນໍາໃຊ້ທຸກທ່າແຮງຢ່າງປະສິດທິຜົນ. ພັດທະນາເສດຖະກິດ-ສັງຄົມ ຕາມທິດວ່ອງໄວ ສີຂຽວ ແລະ ຍືນຍົງຕາມກຳນົດ 6 ເປົ້າໝາຍໃຫ່ຍ.

Bài viết ຄໍາຂັວນກອງປະຊຸມໃຫ່ຍຜູ້ແທນທົ່ວປະເທດ ນັບແຕ່ຄັ້ງທີ I-XII ຂອງພັກປະຊາຊົນປະຕິວັດລາວ đã xuất hiện đầu tiên vào ngày .