ເມືອງປະທຸມພອນ ເປີດກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ IX: ສຸມໃສ່ແກ້ໄຂບັນຫາເສດຖະກິດ-ສັງຄົມ ແລະ ຢາເສບຕິດ ໃຫ້ປາກົດຜົນເປັນຈິງ

      ໃນຕອນເຊົ້າຂອງວັນທີ 7 ເມສາ 2026, ຄະນະບໍລິຫານງານພັກເມືອງປະທຸມພອນ ໄດ້ເປີດກອງປະຊຸມຄົບຄະນະ ຄັ້ງທີ 6 ສະໄໝທີ IX ຢ່າງເປັນທາງການ ເພື່ອຕີລາຄາການຊີ້ນຳ-ນຳພາຮອບດ້ານໃນ 3 ເດືອນຕົ້ນປີ ແລະ ວາງທິດທາງແຜນການຈຸດສຸມສຳລັບໄຕມາດ 2 ປີ 2026. ກອງປະຊຸມໃຫ້ກຽດເປັນປະທານຂອງສະຫາຍ ປະດິດ ວັນນະລັດສະໝີ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ ຜູ້ຊີ້ນຳວຽກງານຮອບດ້ານເມືອງປະທະມພອນ, ສະຫາຍ ສົມຈິດ ແພງສະຫວັດ ກຳມະການພັກແຂວງ, ເລຂາຄະນະບໍລິຫານງານພັກເມືອງປະທຸມພອນ ໂດຍມີຄະນະບໍລິຫານງານພັກເມືອງເຂົ້າຮ່ວມຢ່າງພ້ອມພຽງ.
​
​ໃນວາລະກອງປະຊຸມ, ຄະນະພັກເມືອງໄດ້ຮ່ວມກັນຄົ້ນຄວ້າ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມຄົບຄະນະຄັ້ງຜ່ານມາ ໂດຍໄດ້ຮັບຟັງການລາຍງານໃນຫຼາຍຂົງເຂດສຳຄັນ ຄື:
​#. ດ້ານເສດຖະກິດ: ການຄຸ້ມຄອງລານເກັບຊື້ມັນຕົ້ນ, ຢາງພາລາ, ໝາກມ່ວງຫິມະພານ ແລະ ການເກັບລາຍຮັບຈາກໂຄງການເຊົ່າ-ສຳປະທານ ໃຫ້ໄດ້ຕາມຄາດໝາຍ.
​#. ການຄຸ້ມຄອງຕະຫຼາດ: ມາດຕະການຄວບຄຸມລາຄາສິນຄ້າ ແລະ ການກວດກາຄຸນນະພາບ-ບໍລິມາດນໍ້າມັນເຊື້ອໄຟ ຕາມປ້ຳຕ່າງໆ ເພື່ອປ້ອງກັນການສວຍໂອກາດກັກຕຸນ.
ການກະກຽມນິຕິກຳຄຸ້ມຄອງການຊື້-ຂາຍໝາກຈອງບານ ແລະ ການປັບປຸງລະບົບເກັບຂີ້ເຫຍື່ອໃນເທດສະບານເມືອງໃຫ້ມີປະສິດທິພາບ.
​      ການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ປາກົດການຫຍໍ້ທໍ້ໃນສັງຄົມ.
​          ທິດທາງໄຕມາດ 2 (ເດືອນ 4-6): ສືບຕໍ່ບຸກທະລຸ 3 ດ້ານຫຼັກ
​         ກອງປະຊຸມໄດ້ເປັນເອກະພາບກຳນົດທິດທາງໃນ 3 ເດືອນຕໍ່ໜ້າ ໂດຍເນັ້ນໃສ່:
​ #. ຊຸກຍູ້ການຜະລິດ: ສຸມໃສ່ການຜະລິດລະດູແລ້ງຂອງພໍ່ແມ່ປະຊາຊົນໃຫ້ໄດ້ຮັບຜົນດີ.
#. ​ເລັ່ງລັດລາຍຮັບ: ເກັບລາຍຮັບເຂົ້າງົບປະມານໃຫ້ຄົບຖ້ວນ ແລະ ແກ້ໄຂໜີ້ສິນຄ້າງຊຳລະຂອງບໍລິສັດຕ່າງໆ.
#. ​ຮັກສາຄວາມສະຫງົບ: ກຽມຄວາມພ້ອມສະຫຼຸບວຽກງານເກັບເງິນສະສົມກຳລັງ ປກຊ-ປກສ ປະຈຳປີ 2025.

          ​ໃນຕອນທ້າຍ, ສະຫາຍ ປະດິດ ວັນນະລັດສະໝີ ໄດ້ມີຄຳເຫັນໂອ້ລົມ ໂດຍສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ ແລະ ເນັ້ນໜັກໃຫ້ຄະນະພັກເມືອງປະທຸມພອນ ຈົ່ງເພີ່ມທະວີຄວາມສາມັກຄີເປັນເອກະພາບ, ຍົກສູງຄວາມຮັບຜິດຊອບການເມືອງໃຫ້ສູງຂຶ້ນ ເພື່ອຊີ້ນຳ-ນຳພາປະຊາຊົນບັນລຸຄາດໝາຍການພັດທະນາເສດຖະກິດ-ສັງຄົມ ທີ່ວາງໄວ້ໃຫ້ປາກົດຜົນເປັນຈິງ.
​ ພາບ–ຂ່າວ: ສີສົມບູນ ວົງວຽງຄຳ

Bài viết ເມືອງປະທຸມພອນ ເປີດກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ IX đã xuất hiện đầu tiên vào ngày .

ໃນຕອນເຊົ້າວັນທີ 30 ມີນາ 2026 ນີ້, ທີ່ບ້ານສຳຫຼຽງ ເມືອງສຸຂຸມາ ແຂວງຈຳປາສັກ ໄດ້ຈັດພິທີປະກາດສ້າງຕັ້ງ “ຕາແສງສຳຫຼຽງ” ຢ່າງເປັນທາງການ ເພື່ອແນໃສ່ປັບປຸງກົງຈັກການຈັດຕັ້ງ ແລະ ຍົກລະດັບປະສິດທິພາບການຄຸ້ມຄອງບໍລິຫານລັດຢູ່ຮາກຖານໃຫ້ມີຄວາມເຂັ້ມແຂງໜັກແໜ້ນ.
​ໃຫ້ກຽດເຂົ້າຮ່ວມໃນພິທີໂດຍ ສະຫາຍ ປະດິດ ວັນນະລັດສະໝີ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ; ສະຫາຍ ປອ ຄຳໄຕ ແກ້ວປະເສີດ ກຳມະການພັກແຂວງ, ເລຂາຄະນະບໍລິຫານງານພັກເມືອງສຸຂຸມາ; ມີບັນດາສະຫາຍຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ພ້ອມດ້ວຍການນຳແຂວງ-ເມືອງ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.

​ໃນພິທີ, ສະຫາຍ ພອນພິລຸນ ນໍລະສິນ ຮອງເລຂາພັກເມືອງ, ປະທານຄະນະກຳມະການປົກຄອງເມືອງສຸຂຸມາ ໄດ້ລາຍງານໃຫ້ຮູ້ວ່າ: ການສ້າງຕັ້ງຕາແສງສຳຫຼຽງໃນຄັ້ງນີ້ ແມ່ນບາດກ້າວສຳຄັນໃນການຫຍັບການບໍລິຫານລັດໃຫ້ໃກ້ຊິດກັບປະຊາຊົນ ເພື່ອຮັບປະກັນການເຄື່ອນໄຫວວຽກງານໃຫ້ມີຄວາມຄ່ອງຕົວ. ຕາແສງສຳຫຼຽງ ປະກອບມີ 9 ບ້ານຂຶ້ນກັບ ຄື: ບ້ານສຳຫຼຽງ, ໂນນແດງໃຕ້, ໂນນເອື້ອງ, ໂນນໂພ, ໂນນຄຸ້ມ, ໃໝ່ແສນສຸກ, ບ້ານແຊ, ນາຈານ ແລະ ບ້ານຜັກຕົບ.
​ສຳລັບກົງຈັກການຈັດຕັ້ງຂອງຕາແສງສຳຫຼຽງ ໄດ້ຖືກກຳນົດຢ່າງລະອຽດ ເພື່ອຮອງຮັບການປະຕິບັດໜ້າທີ່ ດັ່ງນີ້:
#. ​ດ້ານການຈັດຕັ້ງພັກ: ສ້າງຕັ້ງຄະນະພັກຮາກຖານຕາແສງ ເຊິ່ງປະກອບມີ 10 ໜ່ວຍພັກຂຶ້ນກັບ, ມີຄະນະພັກທັງໝົດ 9 ສະຫາຍ (ຄະນະປະຈຳ 3 ສະຫາຍ).
#. ​ດ້ານກົງຈັກບໍລິຫານ: ປະກອບມີ 5 ໜ່ວຍງານວິຊາສະເພາະ ຄື: ໜ່ວຍງານບໍລິຫານ-ປົກຄອງ, ເສດຖະກິດ-ການເງິນ, ວັດທະນະທຳ-ສັງຄົມ, ປກຊ-ປກສ ແລະ ໜ່ວຍງານພັກ-ອົງການຈັດຕັ້ງມະຫາຊົນ, ໂດຍມີພະນັກງານປະຈຳການທັງໝົດ 13 ສະຫາຍ (ຍິງ 2 ສະຫາຍ).
​ພ້ອມນີ້, ໃນພິທີຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງບຸກຄະລາກອນຫຼັກແຫຼ່ງ ເພື່ອຊີ້ນຳ-ນຳພາຕາແສງ ດັ່ງນີ້:
​ສະຫາຍ ຄຳເພັດ ດວງສາ (ກຳມະການພັກເມືອງ) ເປັນປະທານຄະນະກຳມະການປົກຄອງຕາແສງສຳຫຼຽງ.
​ສະຫາຍ ບຸນໜາ ຄຳສອນ ເປັນຮອງປະທານ.
​ສະຫາຍ ພັນໂທ ຄຳຫວັນ ຈິດຈະດາ ເປັນຮອງປະທານ.
ນອກຈາກນີ້, ຍັງໄດ້ແຕ່ງຕັ້ງຫົວໜ້າໜ່ວຍງານ ແລະ ພະນັກງານຊ່ວຍວຽກ ເພື່ອປະຈຳການໃນແຕ່ລະຂົງເຂດວຽກງານຢ່າງຄົບຖ້ວນ.

​            ໃນຕອນທ້າຍ, ສະຫາຍ ປະດິດ ວັນນະລັດສະໝີ ໄດ້ໃຫ້ກຽດໂອ້ລົມຊີ້ທິດເຍືອງທາງ ໂດຍເນັ້ນໜັກໃຫ້ຄະນະບໍລິຫານງານຕາແສງຊຸດໃໝ່ ຈົ່ງຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ ແລະ ຕັ້ງໜ້າຜັນຂະຫຍາຍແນວທາງນະໂຍບາຍຂອງພັກ-ລັດ ໃຫ້ເຂົ້າເຖິງຮາກຖານປະຊາຊົນຢ່າງທົ່ວເຖິງ. ຈາກນັ້ນ, ຄະນະປະທານໄດ້ຮ່ວມກັນຕັດແຖບຜ້າເປີດປ້າຍຫ້ອງການ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃຫ້ແກ່ການເລີ່ມຕົ້ນປະຕິບັດວຽກງານຂອງຕາແສງສຳຫຼຽງຢ່າງເປັນທາງການ.

​(ຂ່າວ-ພາບ: ປັນຍາ ແກ້ວພິລົມ)

Bài viết ເມືອງສຸຂຸມາ ປະກາດສ້າງຕັ້ງ “ຕາແສງສຳຫຼຽງ” ຢ່າງເປັນທາງການ ເພື່ອຍົກລະດັບການຄຸ້ມຄອງລັດຢູ່ຮາກຖານໃຫ້ເຂັ້ມແຂງ đã xuất hiện đầu tiên vào ngày .

              ໃນວັນທີ 18 ມີນາ 2026 ນີ້, ເມືອງປະທຸມພອນ ແຂວງຈຳປາສັກ ໄດ້ຈັດພິທີປະກາດສ້າງຕັ້ງ “ຕາແສງບຸ່ນ” ຢ່າງເປັນທາງການ ເຊິ່ງເປັນຕາແສງທີ 3 ຂອງເມືອງ ເພື່ອແນໃສ່ປັບປຸງກົງຈັກການຈັດຕັ້ງ ແລະ ຍົກລະດັບປະສິດທິພາບການຄຸ້ມຄອງບໍລິຫານລັດຢູ່ຮາກຖານໃຫ້ມີຄວາມເຂັ້ມແຂງ.

          ໃຫ້ກຽດເຂົ້າຮ່ວມເປັນປະທານໂດຍ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ ຜູ້ຊີ້ນຳວຽກງານຮອບດ້ານເມືອງປະທຸມພອນ; ມີ ທ່ານ ສົມຈິດ ແພງສະຫວັດ ກຳມະການພັກແຂວງ, ເລຂາຄະນະບໍລິຫານງານພັກເມືອງປະທຸມພອນ; ທ່ານ ກິ່ງແກ້ວ ນະວະພົມ ຮອງເລຂາພັກເມືອງ, ປະທານຄະນະກຳມະການປົກຄອງເມືອງປະທຸມພອນ, ພ້ອມດ້ວຍການນຳແຂວງ-ເມືອງ, ອົງການປົກຄອງບ້ານ ແລະ ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.

            ໃນພິທີ, ທ່ານ ກິ່ງແກ້ວ ນະວະພົມ ໄດ້ລາຍງານໃຫ້ຮູ້ວ່າ: ການສ້າງຕັ້ງຕາແສງໃນຄັ້ງນີ້ ແມ່ນປະຕິບັດຕາມລັດຖະທຳມະນູນ ແລະ ກົດໝາຍວ່າດ້ວຍການປົກຄອງທ້ອງຖິ່ນ ສະບັບປັບປຸງ ປີ 2025 ທີ່ກຳນົດໃຫ້ມີການປົກຄອງ 3 ຂັ້ນ (ແຂວງ, ເມືອງ ແລະ ຕາແສງ). ສຳລັບ ຕາແສງບຸ່ນ ມີສຳນັກງານຕັ້ງຢູ່ບ້ານຫ້ວຍແມ່ສັງ (ນຳໃຊ້ຫ້ອງການກຸ່ມບ້ານບຸ່ນເດີມ), ມີເນື້ອທີ່ທັງໝົດ 32.287 ເຮັກຕາ, ປະກອບມີ 8 ບ້ານຂຶ້ນກັບ ຄື: ບ້ານໜອງບົວໃຫຍ່, ໜອງບົວນ້ອຍ, ຫ້ວຍແມ່ສັງ, ປຸ່ນໃໝ່, ພອງເພາະ, ທ່າກວາງ, ປາອາວ ແລະ ບ້ານຫ້ວຍຍາງ. ມີພົນລະເມືອງທັງໝົດ 9.822 ຄົນ, ຍິງ 4.780 ຄົນ.

​ກົງຈັກການຈັດຕັ້ງຂອງຕາແສງບຸ່ນ ໄດ້ຖືກກຳນົດຢ່າງລະອຽດ ດັ່ງນີ້:
# .​ດ້ານການຈັດຕັ້ງພັກ: ສ້າງຕັ້ງຄະນະພັກຮາກຖານຕາແສງ ມີ 16 ໜ່ວຍພັກຂຶ້ນກັບ, ປະກອບມີຄະນະພັກ 9 ສະຫາຍ (ຄະນະປະຈຳ 3 ສະຫາຍ).
#. ​ດ້ານກົງຈັກບໍລິຫານ: ມີ 5 ໜ່ວຍງານວິຊາສະເພາະ ຄື: ບໍລິຫານ-ປົກຄອງ, ເສດຖະກິດ-ການເງິນ, ວັດທະນະທຳ-ສັງຄົມ, ປກຊ-ປກສ ແລະ ພັກ-ອົງການຈັດຕັ້ງມະຫາຊົນ, ໂດຍມີພະນັກງານສັງກັດລັດປະຈຳການທັງໝົດ 14 ທ່ານ.
​ພ້ອມນີ້, ໃນພິທີຍັງໄດ້ຜ່ານຂໍ້ຕົກລົງແຕ່ງຕັ້ງບຸກຄະລາກອນຫຼັກແຫຼ່ງ ປະກອບມີ: ທ່ານ ສີທະນົນໄຊ ສີສະຫວ່າງວົງ (ກຳມະການພັກເມືອງ) ເປັນປະທານຄະນະກຳມະການປົກຄອງຕາແສງບຸ່ນ, ທ່ານ ເພັດອຸດອນ ບຸດຕະວົງ ແລະ ທ່ານ ພອນເງິນ ກິດຕິຍະລາດ ເປັນຮອງປະທານ.
​ໃນຕອນທ້າຍ, ທ່ານ ປະດິດ ວັນນະລັດສະໝີ ໄດ້ໃຫ້ກຽດໂອລົມໂດຍເນັ້ນໜັກໃຫ້ຄະນະບໍລິຫານງານຕາແສງຊຸດໃໝ່ ຈົ່ງຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ເພີ່ມທະວີຄວາມສາມັກຄີພາຍໃນ ແລະ ຜັນຂະຫຍາຍແນວທາງນະໂຍບາຍຂອງພັກ-ລັດ ໃຫ້ເຂົ້າເຖິງຮາກຖານຢ່າງທົ່ວເຖິງ. ຈາກນັ້ນ, ຄະນະປະທານໄດ້ຮ່ວມກັນຕັດແຖບຜ້າເປີດປ້າຍຫ້ອງການຢ່າງເປັນທາງການ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເລີ່ມຕົ້ນປະຕິບັດງານຂອງຕາແສງບຸ່ນຢ່າງເປັນທາງການ.

​(ພາບ-ຂ່າວ: ສີສົມບູນ ວົງວຽງຄຳ)

Bài viết ເມືອງປະທຸມພອນ ປະກາດສ້າງຕັ້ງ “ຕາແສງບຸ່ນ” ຢ່າງເປັນທາງການ ເພື່ອຍົກລະດັບການຄຸ້ມຄອງລັດ-ສັງຄົມ đã xuất hiện đầu tiên vào ngày .

          ໃນວັນທີ 20 ມິນາ 2026, ເມືອງປະທຸມພອນ ແຂວງຈຳປາສັກ ໄດ້ຈັດພິທີປະກາດສ້າງຕັ້ງ “ຕາແສງນ້ຳອ້ອມ” ຢ່າງເປັນທາງການ ເພື່ອແນໃສ່ປັບປຸງກົງຈັກການຈັດຕັ້ງ ແລະ ຍົກລະດັບປະສິດທິພາບການຄຸ້ມຄອງບໍລິຫານລັດໃຫ້ມີຄວາມເຂັ້ມແຂງ.
ພິທີດັ່ງກ່າວໄດ້ຈັດຂຶ້ນໂດຍການໃຫ້ກຽດເຂົ້າຮ່ວມເປັນປະທານ ຂອງ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງຈຳປາສັກ (ຜູ້ຊີ້ນຳວຽກງານຮອບດ້ານຂອງເມືອງປະທຸມພອນ), ທ່ານ ສົມຈິດ ແພງສະຫວັດ ກຳມະການພັກແຂວງ ເລຂາຄະນະບໍລິຫານງານພັກເມືອງ, ທ່ານ ກິ່ງແກ້ວ ນະວະພົມ ຮອງເລຂາຄະນະບໍລິຫານງານພັກເມືອງ ປະທານຄະນະກຳມະການປົກຄອງເມືອງ ພ້ອມດ້ວຍການນຳຂອງແຂວງ–ເມືອງ, ມີບັນດາອົງການປົກຄອງບ້ານ, ແຂກຖືກເຊີນ ແລະ ປະຊາຊົນ ເຂົ້າຮ່ວມ.

       ໃນໂອກາດນີ້ ທ່ານ ກິ່ງແກ້ວ ນະວະພົມ ຮອງເລຂາຄະນະບໍລິຫານງານພັກເມືອງ ປະທານຄະນະກຳມະການປົກຄອງເມືອງ ໄດ້ລາຍງານການກະກຽມຄວາມພ້ອມ ເຊີ່ງໃຫ້ຮູ້ວ່າ: ຕາແສງນໍ້າອ້ອມ, ເມືອງປະທຸມພອນ ມີທີ່ຕັ້ງສຳນັກງານຢູ່ບ້ານນໍ້າອ້ອມ ໂດຍນໍາໃຊ້ຫ້ອງການຈຸດສຸມ ນໍ້າອ້ອມ ເປັນບ່ອນປະຈຳການ ແລະ ເຮັດວຽກຂອງອົງການປົກຄອງຕາແສງ ການສ້າງຕັ້ງຕາແສງກໍ່ເພື່ອການຈັດລະບົບບໍລິຫານລັດ ແລະ ການປົກຄອງຂອງລັດໃຫ້ເປັນການບໍລິຫານລັດ ໂດຍແມ່ນພະນັກງານສັງກັດລັດ, ເປັນຜູ້ບໍລິຫານໂດຍກົງ, ການບໍລິຫານລັດ ແລະ ການປົກຄອງໂດຍລວມແລ້ວ ແມ່ນປະຕິບັດຕາມທິດຂອງພັກ ແລະ ລັດຖະບານ ທີ່ສະມາຊິກສະພາແຫ່ງ ຊາດໄດ້ຮັບຮອງເອົາ, ລັດຖະທຳມະນູນສະບັບປັບປຸງ ປີ 2025 ແລະ ກົດໝາຍການປົກຄອງທ້ອງຖິ່ນສະບັບປັບປຸງ ປີ 2025 ໂດຍກຳນົດເອົາການປົກຄອງທ້ອງຖິ່ນອອກເປັນ 3 ຂັ້ນ ຄື: ຂັ້ນແຂວງ ປະກອບມີນະຄອນຫຼວງ ແລະ ແຂວງ, ຂັ້ນເມືອງປະກອບມີເມືອງ ແລະ ນະຄອນ, ຂັ້ນຕາແສງປະກອບມີຕາແສງ ສ່ວນບ້ານແມ່ນເປັນຫົວໜ່ວຍ ຊຸມຊົນໜຶ່ງ ຂື້ນກັບຕາແສງ, ຕາແສງນໍ້າອ້ອມ ມີເນື້ອທີ່ທັງໝົດ 47,718 ເຮັກຕາ, ມີຈໍານວນບ້ານຂຶ້ນກັບທັງໝົດ 13 ບ້ານຈາກກຸ່ມສະໂນດ 7 ບ້ານ ແລະ ກຸ່ມນໍ້າອ້ອມ 6 ບ້ານຄື: ບ້ານ ຫ້ວຍໂກະ, ບ້ານ ກຽດໂງ້ງ, ບ້ານທົບສອບ, ບ້ານ ພົມມະລິ, ບ້ານ ສະໂນດ, ບ້ານ ນາທົ່ງ, ບ້ານ ທົ່ງພະ, ບ້ານນໍ້າອ້ອມ, ບ້ານເຫຼົ່າຫຍ້າ, ບ້ານ ສົມສຸກ, ບ້ານ ນາ ບອນ, ບ້ານ ໜອງເອກ, ບ້ານຫ້ວຍຕ້ອນ, ມີຈຳນວນພົນລະເມືອງ ທັງໝົດ 9,458 ຄົນ, ຍິງ 5,330 ຄົນ.

             ໃນພິທີ, ກໍ່ໄດ້ໄດ້ມີການຜ່ານຂໍ້ຕົກລົງວ່າດ້ວຍການແຕ່ງຕັ້ງບຸກຄະລາກອນຫຼັກແຫຼ່ງ ດັ່ງນີ້:
1). ທ່ານ ສົມຊາຍ ວໍລະລາດ (ກຳມະການພັກເມືອງ) ເປັນປະທານຄະນະກຳມະການປົກຄອງຕາແສງ.
2). ທ່ານ ວິເສດ ຟອງສະໝຸດ ເປັນຮອງປະທານ.
3). ທ່ານ ຮອ ອາທິດ ສາຍຈູມມະລີ ເປັນຮອງປະທານ.
#ນອກຈາກນີ້, ຍັງໄດ້ແຕ່ງຕັ້ງຫົວໜ້າໜ່ວຍງານ ແລະ ພະນັກງານຊ່ວຍວຽກ ເພື່ອປະຈຳການໃນແຕ່ລະຂົງເຂດວຽກງານຢ່າງຄົບຖ້ວນ.
#ໃນຕອນທ້າຍ, ທ່ານ ປະດິດ ວັນນະລັດສະໝີ ໄດ້ໃຫ້ກຽດໂອລົມ ແລະ ຊີ້ທິດເຍືອງທາງ ໂດຍເນັ້ນໜັກໃຫ້ຄະນະບໍລິຫານງານຕາແສງຊຸດໃໝ່ ຈົ່ງຍົກສູງຄວາມຮັບຜິດຊອບໃນການຮັບໃຊ້ປະຊາຊົນ, ສ້າງຄວາມສາມັກຄີພາຍໃນ ແລະ ຜັນຂະຫຍາຍແນວທາງນະໂຍບາຍຂອງພັກ-ລັດ ໃຫ້ເຂົ້າເຖິງຮາກຖານຢ່າງທົ່ວເຖິງ.
#ຈາກນັ້ນ, ກໍ່ໄດ້ເປີດປ້າຍຫ້ອງການຢ່າງເປັນທາງການ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເລີ່ມຕົ້ນສັງກາດໃໝ່ຂອງ “ຕາແສງນ້ຳອ້ອມ”.

ພາບ–ຂ່າວ: ສີສົມບູນ ວົງວຽງຄຳ

Bài viết “ຕາແສງນ້ຳອ້ອມ” ຖືກປະກາດສ້າງຕັ້ງແລ້ວເພື່ອຍົກລະດັບການຄຸ້ມຄອງລັດ-ສັງຄົມ đã xuất hiện đầu tiên vào ngày .

           ວັນທີ 13 ມີນາ 2026 – ເມືອງປະທຸມພອນ ໄດ້ຈັດພິທີປະກາດສ້າງຕັ້ງ “ຕາແສງມ່ວງ” ເປັນຕາແສງທີ 2 ຂອງເມືອງ ຂຶ້ນຢ່າງເປັນທາງການ.ພິທີດັ່ງກ່າວໄດ້ຮັບກຽດຈາກ ທ່ານ ປະດິດ ວັນນະລັດສະໝີ, ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ (ຜູ້ຊີ້ນຳວຽກງານຮອບດ້ານຂອງເມືອງປະທຸມພອນ) ເປັນປະທານ.ພ້ອມນັ້ນ, ຍັງມີ ທ່ານ ສົມຈິດ ແພງສະຫວັດ, ກຳມະການພັກແຂວງ, ເລຂາຄະນະບໍລິຫານງານພັກເມືອງປະທຸມພອນ, ພ້ອມດ້ວຍການນຳຂອງແຂວງ–ເມືອງ, ບັນດາອົງການປົກຄອງ, ແຂກຖືກເຊີນ ແລະ ປະຊາຊົນ ເຂົ້າຮ່ວມຢ່າງພ້ອມພຽງ.

                ໃນໂອກາດນີ້, ທ່ານ ກິ່ງແກ້ວ ນະວະພົມ, ຮອງເລຂາພັກເມືອງ, ປະທານຄະນະກຳມະການປົກຄອງເມືອງປະທຸມພອນ, ໄດ້ລາຍງານການກຽມຄວາມພ້ອມຮອບດ້ານ ໂດຍໃຫ້ຮູ້ວ່າ: ຕາແສງມ່ວງ, ເມືອງປະທຸມພອນ ມີທີ່ຕັ້ງສໍານັກງານຢູ່ບ້ານຫຼັກ 30 ໂດຍນໍາໃຊ້ຫ້ອງການກຸ່ມບ້ານມ່ວງ ເປັນບ່ອນປະຈໍາການ ແລະ ເຮັດວຽກຂອງອົງການປົກຄອງຕາແສງ. ການສ້າງຕັ້ງຕາແສງນີ້ແມ່ນເພື່ອຈັດລະບົບການປົກຄອງຂອງລັດໃຫ້ເປັນການບໍລິຫານລັດ ໂດຍແມ່ນພະນັກງານສັງກັດລັດ ເປັນຜູ້ບໍລິຫານໂດຍກົງ. ການບໍລິຫານລັດ ແລະ ການປົກຄອງໂດຍລວມແມ່ນປະຕິບັດຕາມທິດຂອງພັກ ແລະ ລັດຖະບານ ທີ່ສະມາຊິກສະພາແຫ່ງຊາດໄດ້ຮັບຮອງເອົາ, ລັດຖະທໍາມະນູນສະບັບປັບປຸງ ປີ 2025 ແລະ ກົດໝາຍການປົກຄອງທ້ອງຖິ່ນສະບັບປັບປຸງ ປີ 2025. ໂດຍກໍານົດເອົາການປົກຄອງທ້ອງຖິ່ນອອກເປັນ 3 ຂັ້ນ ຄື: ຂັ້ນແຂວງ (ປະກອບມີນະຄອນຫຼວງ ແລະ ແຂວງ), ຂັ້ນເມືອງ (ປະກອບມີເມືອງ ແລະ ນະຄອນ), ຂັ້ນຕາແສງ (ປະກອບມີຕາແສງ). ສ່ວນບ້ານແມ່ນເປັນຫົວໜ່ວຍຊຸມຊົນໜຶ່ງ ຂຶ້ນກັບຕາແສງ.ຕາແສງມ່ວງ ມີເນື້ອທີ່ທັງໝົດ 59,595 ເຮັກຕາ, ມາຈາກກຸ່ມຫຼັກ 19 ມີ 7 ບ້ານ ແລະ ກຸ່ມບ້ານມ່ວງ 8 ບ້ານ, ລວມມີຈໍານວນບ້ານຂຶ້ນກັບທັງໝົດ 15 ບ້ານຄື: ບ້ານນາສາຍຄໍາ, ບ້ານເວີນ, ບ້ານໜອງແວງ, ບ້ານຜັກແພວ, ບ້ານໝໍ້ພຸ, ບ້ານບັງລຽງ, ບ້ານນໍ້າພາກ, ບ້ານປາກຫ້ວຍບັງລຽງ, ບ້ານນໍ້າໃສທ່າ, ບ້ານໜອງປັກແຮດ, ບ້ານນໍ້າໃສເທີງ, ບ້ານຫຼັກ 30, ບ້ານມ່ວງ, ບ້ານອຸດົມພັນ, ບ້ານເຜົ່າສໍາພັນ. ມີຈໍານວນພົນລະເມືອງທັງໝົດ 18,677 ຄົນ, ເປັນຍິງ 9,111 ຄົນ. ເພື່ອໃຫ້ການບໍລິການພາກລັດມີຄວາມວ່ອງໄວ ແລະ ທົ່ວເຖິງ, ຕາແສງມ່ວງ ໄດ້ກໍານົດບຸກຄະລາກອນ 13 ຕໍາແໜ່ງງານ, ມີຄະນະພັກຮາກຖານ 9 ສະຫາຍ ແລະ ແບ່ງໜ່ວຍງານຊ່ວຍວຽກອອກເປັນ 5 ໜ່ວຍງານ ຄື:1.ໜ່ວຍງານບໍລິຫານ–ການປົກຄອງ2.ໜ່ວຍງານພັກ–ອົງການຈັດຕັ້ງມະຫາຊົນ3.ໜ່ວຍງານເສດຖະກິດ–ການເງິນ4.ໜ່ວຍງານວັດທະນະທໍາ–ສັງຄົມ5.ໜ່ວຍງານປ້ອງກັນຊາດ–ປ້ອງກັນຄວາມສະຫງົບ (ປກຊ–ປກສ)ພ້ອມນີ້, ໄດ້ປະກາດແຕ່ງຕັ້ງຄະນະບໍລິຫານຕາແສງຊຸດໃໝ່ ປະກອບມີ:1.ທ່ານ ໄພວອນ ສີໂຍທາ (ກຳມະການພັກເມືອງ) ເປັນ ປະທານຄະນະກຳມະການປົກຄອງຕາແສງ, 2.ທ່ານ ນາງ ຜິວພອນ ໄຊຍະວົງ ເປັນ ຮອງປະທານ, 3.ທ່ານ ຖາວອນ   ໄຊຍະສອນ ເປັນຮອງປະທານການຍົກລະດັບໃນຄັ້ງນີ້ ເປັນການຫັນເອົາພະນັກງານລັດລົງໄປບໍລິຫານໂດຍກົງຢູ່ຂັ້ນຮາກຖານ ເພື່ອໃຫ້ການບໍລິການປະຊາຊົນມີຄວາມວ່ອງໄວ, ຍຸຕິທໍາ ແລະ ສະດວກຍິ່ງຂຶ້ນ ຕາມທິດນໍາຂອງພັກ ແລະ ລັດຖະບານ.

            ໃນຕອນທ້າຍຂອງພິທີ, ທ່ານ ປະດິດ ວັນນະລັດສະໝີ ໄດ້ໃຫ້ກຽດໂອລົມໂດຍເນັ້ນໜັກໃຫ້ຄະນະບໍລິຫານງານຕາແສງຊຸດໃໝ່ ຈົ່ງຍົກສູງສະຕິປັນຍາ ແລະ ຄວາມຮັບຜິດຊອບໃນການຮັບໃຊ້ປະຊາຊົນ, ເສີມສ້າງຄວາມສາມັກຄີເປັນປຶກແຜ່ນ ແລະ ຫັນເອົາແນວທາງນະໂຍບາຍຂອງພັກ-ລັດ ລົງສູ່ຮາກຖານຢ່າງແທ້ຈິງ ເພື່ອພັດທະນາຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນເລື້ອຍໆ.ເພື່ອເປັນສິລິມຸງຄຸນ ແລະ ເປັນການເລີ່ມຕົ້ນສັງກາດໃໝ່, ຄະນະປະທານກໍ່ໄດ້ຮ່ວມກັນຕັດແຖບຜ້າເປີດປ້າຍຢ່າງເປັນທາງການ ພ້ອມທັງລັ່ນຄ້ອງ 9 ບາດ ເພື່ອປະກາດໄຊຊະນະ ແລະ ຄວາມເປັນສິລິມຸງຄຸນໃຫ້ແກ່ຕາແສງມ່ວງ.

Bài viết ເມືອງປະທຸມພອນ ປະກາດສ້າງຕັ້ງ “ຕາແສງມ່ວງ” ເປັນຕາແສງທີ 2 ຂອງເມືອງ, ເມືອງປະທຸມພອນ đã xuất hiện đầu tiên vào ngày .

          ໃນຕອນບ່າຍວັນທີ 25 ກຸມພາ 2026ນີ້ ຢູ່ທີ່ສະໂມສອນຂອງກອງບັນຊາການທະຫານເມືອງປະທຸມພອນ ໂດຍແມ່ນ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ຜູ້ຊີ້ນຳວຽກງານຮອບດ້ານເມືອງປະທຸມພອນ, ທ່ານ ສົມຈິດ ແພງສະຫວັດ ກຳມະການພັກແຂວງ ເລຂາຄະນະບໍລິຫານງານພັກເມືອງປະທຸມພອນ, ມີປະທານຄະນະເມືອງ, ຄະນະນຳພະແນກການອ້ອມຂ້າງແຂວງທີ່ກ່ຽວຂ້ອງພ້ອມດ້ວຍຄະນະພັກ – ຄະນະບັນຊາ ກອງບັນຊາການທະຫານເມືອງ, ກອງພັນ 709, ກອງພັນ 608 ກອງຮ້ອຍ 809, ກອງຮ້ອຍຊາຍແດນ 519 ຕະຫຼອດຮອດນາຍ ແລະ ພົນທະຫານໃນທົ່ວກົມກອງ ເຂົ້າຮ່ວມ.

         ໃນພິທີ ທ່ານ ພັນໂທ ສາຍຍັນ ຄູນຄໍາຕັນ ຄະນະປະຈຳພັກເມືອງ ເລຂາຄະນະພັກ ຮາກຖານ ຫົວໜ້າການເມືອງ ກອງບັນຊາການທະຫານເມືອງປະທຸມພອນ ໄດ້ລາຍງານການເຄື່ອນໄຫວ ໂດຍຫຍໍ້ ຂອງກອງບັນຊາການທະຫານເມືອງປະທຸມພອນ ຍົກໃຫ້ເຫັນຜົນງານ, ດ້ານດີ, ດ້ານທີ່ຄົງຄ້າງຕ່າງໆ ເພື່ອແນໃສ່ໃຫ້ການນຳແຂວງມີທິດຊີ້ນຳເຮັດໃຫ້ການຈັດຕັ້ງປະຕິບັດວຽກງານໃຫ້ມີຜົນສຳເລັດດີຂຶ້ນກວ່າເກົ່າ ພ້ອມນີ້ທ່ານຍັງໄດ້ກ່າວສະແດງຄວາມຮູ້ບຸນຄຸນ, ທີ່ຄະນະນຳຂອງແຂວງ ແລະ ເມືອງ ທີ່ເຫັນໄດ້ຄວາມສຳຄັນ ແລະຄວາມເປັນຫ່ວງເປັນໃຍຕໍ່ອ້າຍນ້ອງທະຫານ, ເຊິ່ງການມາອວຍພອນໃນຄັ້ງນີ້ ເປັນບາດກ້າວໜຶ່ງໃນການຊຸກຍູ້ ແລະ ເປັນຂວັນກຳລັງແຮງໃນການປະຕິບັດໜ້າທີ່ຂອງອ້າຍນ້ອງນາຍ ແລະ ພົນທະຫານ, ເພື່ອປະກອບສ່ວນເຫື່ອແຮງເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືປົກປັກຮັກສາ ເມືອງປະທຸມພອນໃຫ້ໝັ້ນຄົງຕະຫຼອດໄປ.

            ໂອກາດດັ່ງກ່າວນີ້ ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ຫົວໜ້າຄະນະໂຄສະຍາອົບຮົມແຂວງ ຜູ້ຊີ້ນຳວຽກງານຮອບດ້ານເມືອງປະທຸມພອນ ກໍໄດ້ມີຄຳເຫັນຕໍ່ພິທີມອບເຄື່ອງໃນຄັ້ງນີ້ ໂດຍທ່ານໄດ້ສະແດງຄວາມຢື້ຢາມຖາມຂ່າວຕໍ່ອ້າຍນ້ອງນາຍ ແລະ ພົນທະຫານ ຢູ່ທີ່ເມືອງປະທຸມພອນ ເຊິ່ງຍາມໃດບັນດາອ້າຍນ້ອງກຳລັງປ້ອງກັນຊາດພວກເຮົາແມ່ນໄດ້ເຮັດໜ້າທີ່ຂອງຕົນຢ່າງມີຜົນສຳເລັດ ເຊິ່ງສະແດງອອກໃນງານສຳຄັນຕ່າງໆແມ່ນມີຄວາມສະຫງົບມີຄວາມເປັນລະບຽບຮຽບຮ້ອຍ ມີຄວາມປອດໄພ 100% ໂດຍສະເພາະວຽກງານປ້ອງກັນກອງປະຊຸມໃຫ່ຍ 3 ຂັ້ນຂອງພັກ,ການປ້ອງກັນຂະບວນການ 3 ວັນປະຫັວດສາດ ແລະ ການເຮັດໜ້າທີ່ໃນການເຄື່ອນໄຫວວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ແລະ ວຽກງານ 3 ສ້າງ ຕິດພັນກັບຂະບວນການຮັກຊາດ ແລະ ພັດທະນາ ແລະ ທີ່ພິເສດສຸດກໍ່ຄືການເຮັດໜ້າທີ່ວຽກງານປ້ອງກັນບັ້ນເລືອກຕັ້ງ ສສຊ ຊຸດທີX ແລະ ສສຂ ຊຸດທີ V ນັ້ນເອງກໍ່ຄືເຮັດໃຫ້ແຂວງຈຳປາສັກກໍ່ຄືຂອບເຂດເມືອງປະທຸມພອນມີຄວາມສະຫງົບ ແລະ ປອດໄພ.

             ດ້ານເຄື່ອງທີ່ນຳມາມອບປະກອບມີ, ເຄື່ອງອຸປະໂພກ ແລະ ບໍລິໂພກ ເປັນຕົ້ນ: ຢາປົວພະຍາດ, ນໍ້າດື່ມ,ປາກະປ໋ອງ,ໝີ່ ແລະ ອື່ນໆລວມມູນຄ່າ 70 ກວ່າລ້ານກີບ ເຊິ່ງແມ່ນການປະກອບສ່ວນຂອງ ພະແນກເຕັກໂນໂລຊີ ແລະ ການສື່ສານແຂວງ, ຫ້ອງວ່າການແຂວງ, ພະແນກໂຍທາທີການ ແລະ ຂົນສົ່ງແຂວງ, ພະແນກສາທາລະນະສຸກແຂວງ, ໂຮງງານຜະລິດຢາ CBF, ກຸ່ມບໍລິສັດດາວເຮືອງ, ບໍລິສັດຮອນດາ ປາກເຊ, ທະນາຄານການຄ້າຕ່າງປະເທດ ມະຫາຊົນ ແລະ ອົງການປົກຄອງເມືອງປະທຸມພອນ.

ຂຽນ:ນ. ປະພິດ ສີສົມບູນ
ພາບ: ຈັນທະວີສັກ

Bài viết ການນຳແຂວງຈຳປາສັກ ພ້ອມດ້ວຍການນຳເມືອງປະທຸມພອນ ອວຍພອນນາຍ ແລະພົນທະຫານ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 77 ປີ. đã xuất hiện đầu tiên vào ngày .

         ໃນວັນທີ 12 ກຸ່ມພາ 2026 ຄະນະກໍາມະການເລືອກຕັ້ງລະດັບຊາດ ລົງຕິດຕາມຊຸກຍູ້ວຽກງານໂຄສະນາ ແລະ ປຸກລະດົມຂະບວນການ ຢູ່ເມືອງບາຈຽງຈະເລີນສຸກ ແລະ ເມືອງປາກຊ່ອງ ແຂວງຈໍາປາສັກ, ນໍາໂດຍທ່ານ ຄໍາຈັນ ໂສຕາປະເສີດ ປະທານກຳມາທິການບັນດາເຜົ່າ, ສະພາແຫ່ງຊາດ, ອະນຸກໍາມະການໂຄສະນາ ແລະ ປຸກລະດົມຂະບວນການ ຄະນະກຳມະການເລືອກຕັ້ງລະດັບຊາດ, ທ່ານ ວັນລາຕີ ຄໍາວານວົງສາ ຜູ້ອໍານວຍການໂທລະພາບແຫ່ງຊາດລາວ, ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ຫົວໜ້າອະນຸກຳມະການໂຄສະນາ ແລະ ປຸກລະດັບຂະບວນການຂັ້ນແຂວງ, ພ້ອມດ້ວຍຄະນະອະນຸກຳມະການຂັ້ນສູນກາງ ແລະ ຂັ້ນແຂວງຕິດຕາມ; ໂດຍມີອະນຸກຳມະການໂຄສະນາ ແລະ ປຸກລະດົມຂະບວນການ ຄະນະກໍາມະການເລືອກຕັ້ງເມືອງ  ບາຈຽງຈະເລີນສຸກ ແລະ ເມືອງປາກຊ່ອງເຂົ້າຮ່ວມຕ້ອນຮັບ.

        ໃນຕອນທ້າຍ, ຍັງໄດ້ມີຄໍາເຫັນຊີ້ນໍາບາງບັນຫາເພື່່ອເປັນທິດທາງໃນການຈັດຕັ້ງປະຕິບັດວຽກງານຂອງຄະນະກຳມະການຊັ້ນເມືອງຄື: ເອົາໃຈໃສ່ສ້າງຈະບວນການອະນາໄມລວມຢ່າງຕໍ່ເນື່ອງ ແລະ ເປັນປະຈໍາ ເພື່ອຮັກສາຄວາມສະອາດສວຍງາມ, ການຮັກສາຄວາມສະຫງົບປອດໄຟ, ເກັບກຳຄຸ້ມຄອງຈໍາຄົນຕ່າງປະເທດ, ຄົນພັກອາໃສຊົ່ວຄາວເພື່ອຄວາມເປັນລະບຽບຮຽບຮ້ອຍ, ຕິດຕາມການອອກຂ່າວທາງສື່ສັງຄົມອອນລາຍ ເພື່ອຫຼີກລ້ຽງ, ສະກັດກັ້ນການສະໜອງຂໍ້ມູນແກ່ກຸ່ມຄົນບໍ່ດີ ແລະ ມີການສະກຸບລາຍງານຜົນການຈັດຕັ້ງປະຕິບັດວຽກງານໃຫ້ແກ່ຂັ້ນເທິງຢ່າງວ່ອງໄວທັນການ ແລະ ຖືກຕ້ອງ. ຈາກນັ້ນ, ກໍໄດ້ລົງຢ້ຽມຢາມ ແລະ ກວດກາ ສະຖານທີ່ກຳນົດເປັນໜ່ວຍປ່ອນບັດເລືອກຕັ້ງ ຂອງພະນັງານການນໍາຂອງເມືອງອີກດ້ວຍ.

Bài viết ຄະນະກໍາມະການເລືອກຕັ້ງລະດັບຊາດ ລົງຕິດຕາມຊຸກຍູ້ວຽກງານໂຄສະນາ ແລະ ປຸກລະດົມຂະບວນການ ຢູ່ເມືອງບາຈຽງຈະເລີນສຸກ ແລະ ເມືອງປາກຊ່ອງ ແຂວງຈໍາປາສັກ đã xuất hiện đầu tiên vào ngày .

         ໃນວັນທີ 09 ກຸມພາ 2026, ທ່ານ ປະດິດ ວັນນະລັດສະໝີ, ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ, ຫົວໜ້າອະນຸກໍາມະການໂຄສະນາປຸກລະດົມຂະບວນການ, ຄະນະກຳມະການເລືອກຕັ້ງຂັ້ນແຂວງ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມການກະກຽມຄວາມພ້ອມໃນການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ V ຢູ່ທີ່ນະຄອນປາກເຊ ແລະ ເມືອງປະທຸມພອນ ແຂວງຈໍາປາສັກ.

           ການລົງເຄື່ອນໄຫວຄັ້ງນີ້, ທ່ານພ້ອມຄະນະໄດ້ໄປຢ້ຽມຢາມໜ່ວຍເລືອກຕັ້ງກຸ່ມທີ 1 ບ້ານພັດທະນາກົກເດື່ອ ນະຄອນປາກເຊ ແລະ ບັນດາກຸ່ມບ້ານ (ກຸ່ມມ່ວງ, ກຸ່ມປະທຸມພອນ, ກຸ່ມບຸ່ນ) ລວມເຖິງກອງບັນຊາການ ປກສ ເມືອງປະທຸມພອນ ໂດຍການຕ້ອນຮັບຂອງປະທານຄະນະກໍາມະການປົກຄອງນະຄອນ-ເມືອງ, ຄະນະກຳມະການເລືອກຕັ້ງຂັ້ນຮາກຖານ ແລະ ພາກສ່ວນທີ່ກ່ຽວຂ້ອງ.
​           ໃນກອງປະຊຸມ, ບັນດາຄະນະກຳມະການເລືອກຕັ້ງຂັ້ນນະຄອນ ແລະ ເມືອງ ໄດ້ລາຍງານສະພາບການກະກຽມຮອບດ້ານ ເຊິ່ງໄດ້ຈັດຕັ້ງປະຕິບັດຕາມມະຕິຂອງກົມການເມືອງສູນກາງພັກ ແລະ ຄຳສັ່ງແນະນຳຂອງຂັ້ນເທິງຢ່າງເຂັ້ມງວດ ໂດຍມີຜົນງານພົ້ນເດັ່ນໃນດ້ານຕ່າງໆ ດັ່ງນີ້:
#. ດ້ານການຈັດຕັ້ງ: ໄດ້ແຕ່ງຕັ້ງຄະນະຮັບຜິດຊອບ, ຄະນະຜູ້ປະຈຳການ ແລະ ອະນຸກຳມະການຊ່ວຍວຽກ ໃນແຕ່ລະໜ່ວຍປ່ອນບັດທົ່ວເມືອງຢ່າງຄົບຖ້ວນ.
#. ​ດ້ານການໂຄສະນາ ແລະ ສ້າງຂະບວນການ: ໄດ້ຈັດຕັ້ງການປະດັບປະດາທຸງພັກ, ທຸງຊາດ, ຕິດປ້າຍຄຳຂວັນ 9 ຫົວຂໍ້ ຢູ່ຕາມສຳນັກງານອົງການ, ໂຮງໝໍ, ຕະຫຼາດ ແລະ ຫ້ອງການບ້ານ ພ້ອມທັງປຸກລະດົມຂະບວນການອອກແຮງງານອະນາໄມຕາມເສັ້ນທາງຕ່າງໆ ຢ່າງຟົດຟື້ນ.
#. ດ້ານການຝຶກອົບຮົມ: ໄດ້ສຳເລັດການຝຶກອົບຮົມໃຫ້ແກ່ອະນຸກຳມະການຊ່ວຍວຽກ ແລະ ຄະນະຮັບຜິດຊອບໜ່ວຍປ່ອນບັດ ເພື່ອລົງເຜີຍແຜ່ເອກະສານສຳຄັນໃຫ້ແກ່ພໍ່ແມ່ປະຊາຊົນໃຫ້ມີຄວາມເຂົ້າໃຈຢ່າງທົ່ວເຖິງ.
#.  ​ດ້ານການປ້ອງກັນຊາດ-ປ້ອງກັນຄວາມສະຫງົບ: ໄດ້ເພີ່ມທະວີການຕິດຕາມກວດກາຊາຍແດນ, ເວນຍາມຕາມປ້ອມ ແລະ ຂົວ-ທາງສຳຄັນ ພ້ອມທັງແຕ່ງຕັ້ງກຳລັງ ປກຊ-ປກສ ປະຈຳແຕ່ລະໜ່ວຍປ່ອນບັດ ເພື່ອຮັບປະກັນຄວາມສະຫງົບ 100%.

           ໃນຕອນທ້າຍ, ທ່ານ ປະດິດ ວັນນະລັດສະໝີ ໄດ້ກ່າວເນັ້ນໜັກໃຫ້ຄະນະຮັບຜິດຊອບທຸກຂັ້ນ ສືບຕໍ່ເອົາໃຈໃສ່ບາງວຽກງານຈຸດສຸມ ເປັນຕົ້ນແມ່ນ: ການປະດັບປະດາໄຟເຍືອງທາງໃຫ້ຮຸ່ງເຮືອງສວຍງາມ, ການຮັກສາຄວາມສະອາດ, ການປຸກລະດົມຜູ້ມີສິດເລືອກຕັ້ງໃຫ້ອອກມາໃຊ້ສິດຢ່າງພ້ອມພຽງ, ການຈັດວາງຮູບພາບຜູ້ສະໝັກໃຫ້ຈະແຈ້ງ ແລະ ທີ່ສຳຄັນແມ່ນຕ້ອງຮັກສາຄວາມສະຫງົບປອດໄພຮອບດ້ານ ເພື່ອເຮັດໃຫ້ວັນເລືອກຕັ້ງກາຍເປັນປາງບຸນໃຫຍ່ຂອງທົ່ວປວງຊົນ ແລະ ເຮັດໃຫ້ການເລືອກຕັ້ງຄັ້ງນີ້ສຳເລັດຕາມຄາດໝາຍທີ່ວາງໄວ້.

Bài viết ຄະນະກຳມະການເລືອກຕັ້ງຂັ້ນແຂວງ ລົງຕິດຕາມຄວາມພ້ອມການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຢູ່ນະຄອນປາກເຊ ແລະ ເມືອງປະທຸມພອນ đã xuất hiện đầu tiên vào ngày .

           ​ໃນວັນທີ 30 ມັງກອນ 2026, ອະນຸກຳມະການເລືອກຕັ້ງຂັ້ນແຂວງຈໍາປາສັກ ໄດ້ລົງຕິດຕາມ ແລະ ຊຸກຍູ້ການກະກຽມຄວາມພ້ອມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ X ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ V ຢູ່ທີ່ເມືອງມຸນລະປາໂມກ. ໂດຍການເປັນປະທານຂອງ ທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ, ຫົວໜ້າຄະນະໂຄສະນາ-ອົບຮົມແຂວງ, ຄະນະກຳມະການເລືອກຕັ້ງຂັ້ນແຂວງ,ທັງເປັນຫົວໜ້າອະນຸກຳມະການໂຄສະນາປຸກລະດົມ ແລະ ຍ້ອງຍໍຂັ້ນແຂວງ; ມີບັນດາຄະນະກຳມະການເລືອກຕັ້ງຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
​ໃນພິທີ, ທ່ານ ວັນລະເດດ ແກ້ວຈັນທາ ປະທານຄະນະກຳມະການເລືອກຕັ້ງຂັ້ນເມືອງ ໄດ້ລາຍງານຄວາມຄືບໜ້າການຈັດຕັ້ງປະຕິບັດຕາມ 4 ບາດກ້າວ ໃນການກະກຽມຄວາມພ້ອມຮອບດ້ານ ເພື່ອຮັບປະກັນໃຫ້ແກ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ຈະມາເຖິງນີ້ໃຫ້ດຳເນີນໄປຢ່າງຖືກຕ້ອງຕາມລະບຽບການ.

         ໂອກາດດຽວກັນ, ທ່ານ ປອ ສົມໄຊ ສີຫາຈັກ ສສຊ ປະຈຳເຂດເລືອກຕັ້ງທີ 15, ທັງເປັນປະທານຄະນະກຳມະການປ້ອງກັນຊາດ-ປ້ອງກັນຄວາມສະຫງົບ ສສຂ ຈຳປາສັກ ໄດ້ເຜີຍແຜ່ນິຕິກຳທີ່ສຳຄັນຂອງສູນກາງ ແລະ ຂັ້ນແຂວງ ເປັນຕົ້ນແມ່ນ:
​ມະຕິຂອງກົມການເມືອງສູນກາງພັກ ເລກທີ 26/ກມສພ ວ່າດ້ວຍການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V. ​ແຈ້ງການຂອງຄະນະເລຂາທິການສູນກາງພັກ ສະບັບເລກທີ 01/ຄລສພ, ລົງວັນທີ 26 ມັງກອນ 2026 ເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນເອກະພາບກັນ.
​ໃນຕອນທ້າຍ, ທ່ານປະດິດ ວັນນະລັດສະໝີ ປະທານກອງປະຊຸມ ໄດ້ມີຄຳເຫັນຊີ້ນຳ ແລະ ເນັ້ນໜັກໃຫ້ຄະນະກຳມະການເລືອກຕັ້ງຂັ້ນເມືອງ ເອົາໃຈໃສ່ບາງວຽກງານຈຸດສຸມເປັນຕົ້ນ: ຊຸກຍູ້ການອະນາໄມສຳນັກງານ, ອົງການ, ບ້ານເຮືອນ ແລະ ຖະໜົນຫົນທາງໃຫ້ສະອາດສວຍງາມ.ຕິດຕັ້ງທຸງຊາດ, ທຸງພັກ ແລະ ຄຳຂວັນຕ່າງໆ ຢູ່ຕາມຈຸດສຳຄັນ ແລະ ໜ່ວຍເລືອກຕັ້ງໃຫ້ມີບັນຍາກາດຟົດຟື້ນ.ເພີ່ມທະວີການຮັກສາຄວາມສະຫງົບຮຽບຮ້ອຍ, ສະກັດກັ້ນທຸກປາກົດການຫຍໍ້ທໍ້ ເພື່ອຮັບປະກັນໃຫ້ວັນເລືອກຕັ້ງດຳເນີນໄປດ້ວຍຄວາມປອດໄພ 100%.

Bài viết ອະນຸກຳມະການເລືອກຕັ້ງຂັ້ນແຂວງຈໍາປາສັກ ລົງຊຸກຍູ້ການກະກຽມຄວາມພ້ອມການເລືອກຕັ້ງ ຢູ່ເມືອງມຸນລະປາໂມກ đã xuất hiện đầu tiên vào ngày .

         ວັນທີ 30 ມັງກອນ 2026 ນີ້ ຄະນະກຳມະການເລືອກຕັ້ງຂັ້ນແຂວງ ນຳໂດຍ ທ່ານ ປອປະດິດ ວັນລັດສະໝີ ຄະນະປະຈໍາພັກແຂວງ, ຫົວໜ້າໂຄສະນາອົບຮົມແຂວງຈຳປາສັກ ຄະນະກໍາມະການເລືອກຕັ້ງຂັ້ນແຂວງ ພ້ອມຄະນະ ປະກອບມີ ທ່ານ ປອ ສົມໃຊ ສີຫາຈັກ ຄະນະປະຈຳສະພາປະຊາຊົນແຂວງ ກໍາມະການເລືອກຕັ້ງ ສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນແຂວງ ຊຸດທີ V ບັນດາທ່ານກອງເລຂາຊ່ວຍວຽກ ລົງເຄື່ອນໄຫວ ຕິດຕາມ ແລະ ຊຸກຍູ້ວຽກງານການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ຢູ່ເຂດເລືອກຕັ້ງເມືອງໂຂງ ໂດຍມີ ທ່ານ ບຸນເນື່ອງ ສີລາຄົມ ຮອງເລຂາຄະນະບໍລິຫານງານພັກເມືອງ ຫົວໜ້າຄະນະຈັດຕັ້ງເມືອງ ຮອງປະທານຄະນະກໍາມະການເລືອກຕັ້ງຂັ້ນເມຶອງ ມີບັນດາທ່ານຄະນະກໍາມະການ, ອະນຸກໍາມະການ ຂອງຄະນະກໍາມະການເລືອກຕັ້ງຂັ້ນເມືອງ ແລະ ກອງເລຂາຊ່ວຍວຽກ ເຂົ້າຮ່ວມ.

         ການເຄື່ອນໄຫວ, ໄດ້ເປີດກອງປະຊຸມຮັບຟັງການລາຍງານຂອງຄະນະກໍາມະການເລືອກຕັ້ງຂັ້ນເມືອງ ຢູ່ຫ້ອງປະຊຸມຫ້ອງວ່າການປົກຄອງເມືອງ ເຊິ່ງ ທ່ານ ບຸນເນື່ອງ ສີລາຄົມ ຮອງເລຂາຄະນະບໍລິຫານງານພັກເມືອງ, ຮອງປະທານຄະນະກໍາມະການເລືອກຕັ້ງຂັ້ນເມືອງ ໄດ້ລາຍງານກ່ຽວກັບການກຽມວຽກງານຮອບດ້ານ ໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາຂັ້ນແຂວງ ຊຸດທີ V, ເຊິ່ງ ທ່ານໄດ້ຍົກໃຫ້ເຫັນສະພາບພົ້ນເດັ່ນ ແລະ ການຈັດຕັ້ງປະຕິບັດວຽກງານຄະນະກໍາມະການເລືອກຕັ້ງຂັ້ນເມືອງ ໄດ້ຖືເອົາການຜັນຂະຫຍາຍນິຕິກຳຈາກຂັ້ນເທິງເປັນໜ້າທີ່ຫຼັກຜັນຂະຫຍາຍເປັນແຜນດຳເນີນງານ 4 ບາດກ້າວ ສາມາດຈັດຕັ້ງປະຕິບັດມີຜົນສໍາເລັດຫຼາຍດ້ານ. ຈາກນັ້ນ, ບັນດາທ່ານຜູ້ແທນກອງປະຊຸມໄດ້ແລກປ່ຽນຄຳຄິດ-ຄຳເຫັນຢ່າງສ້າງສັນ ແລະ ຢ່າງມີຈຸດສຸມ ແນໃສ່ເພື່ອເຮັດໃຫ້ການກະກຽມການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ມີຄວາມພ້ອມຮອບດ້ານ ແລະ ຮັບປະກັນການຈັດຕັ້ງປະຕິບັດໃຫ້ບັນລຸຄາດໝາຍ.

        ພ້ອມນີ້ທີ່ປະຊຸມໄດ້ຮັບຟັງການມີຄຳເຫັນຊີ້ນຳຈາກ ທ່ານ ປອ ປະດິດ ວັນນະລັດສະໝີ ປະທານກອງປະຊຸມກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ການຈັດຕັ້ງປະຕິບັດວຽກງານ ຂອງຄະນະກຳມະການເລືອກຕັ້ງຂັ້ນເມືອງ ໃນການກະກຽມວຽກງານການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ທີ່ເປັນວຽກງານ ເປັນເຫດການທີ່ສໍາຄັນທາງດ້ານການເມືອງຂອງປະເທດ ໃນການເລືອກຕັ້ງເອົາຕົວແທນແຫ່ງສິດ ແລະ ຜົນປະໂຫຍດຂອງປະຊົນລາວບັນດາເຜົ່າ. ສະນັ້ນ, ຄະນະກໍາມະການເລືອກຕັ້ງຂັ້ນເມືອງ ຕະຫຼອດຮອດທຸກພາກສ່ວນທີ່ກ່ຽວຂ້ອງ ຈະຕ້ອງໄດ້ເພີ່ມທະວີຄວາມຮັບຜີດຊອບຈັດຕັ້ງປະຕິບັດໜ້າທີ່ຕາມແຜນດໍາເນີນງານຂອງຕົນ ກໍຄືການຈັດຕັ້ງຜັນຂະຫຍາຍບັນດາແຈ້ງການ, ຂໍ້ຕົກລົງ, ຄໍາແນະນໍາ ຂອງຄະນະກໍາມະການເລືອກຕັ້ງລະດັບຊາດ, ຄະນະກໍາມະການເລືອກຕັ້ງຂັ້ນແຂວງ ແລະ ວຽກງານໂຄສະນາປຸກລະດົມຂະບວນການໃຫ້ປະຊາຊົນຜູ້ມີສິດເລືອກຕັ້ງໄປໃຊ້ສິດຂອງຕົ້ນ, ສ້າງຂະບວນການ ປະດັບປະດາຕິດຄໍາຂັວນ, ຕິດທຸງທິວ ໃນເທດສະບານຂອງເມືອງ ລົງສູ່ທ້ອງຖິ່ນໃຫ້ມີບັນຍາກາດຟົດຟື້ນ ຮັບປະກັນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ສາມາດບັນລຸ ຜົນສໍາເລັດຕາມ 4 ຄາດໝາຍທີ່ວາງໄວ້ ຄື:
* ນໍາພາຜູ້ມີສິດເລືອກຕັ້ງໄປປ່ອນບັດເລືອກຕັ້ງໃຫ້ຄົບຖ້ວນ 100%
* ນໍາພາຜູ້ມີສິດເລືອກຕັ້ງໃຫ້ຮູ້ໃຊ້ສິດໃນການປ່ອນບັດເລືອກຕັ້ງ ຖືກຕ້ອງຕາມລະບຽບການເລືອກຕັ້ງ 100%
* ນຳພາວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ມີຄວາມສະຫງົບ ແລະ ມີຄວາມປອດໄພ 100%
* ນໍາພາວຽກງານປ່ອນບັດເລືອກຕັ້ງໃຫ້ຮັບປະກັນຄວາມໂປ່ງໃສ ແລະ ສໍາເລັດທັນຕາມກຳນົດເວລາ 100%.

Bài viết ຄະນະກຳມະການເລືອກຕັ້ງຂັ້ນແຂວງ ເຄື່ອນໄຫວ ຕິດຕາມ ແລະ ຊຸກຍູ້ວຽກງານການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V ຢູ່ເຂດເລືອກຕັ້ງເມືອງໂຂງ đã xuất hiện đầu tiên vào ngày .