ພະແນກສາທາລະນະສຸກຈັດພິທີປາຖະກະຖາ 3 ວັນປະຫວັດສາດ

ພະແນກສາທາລະນະສຸກແຂວງຈຳປາສັກຈັດພິທີປາຖະກະຖາເລົ່າຄືນມູນເຊື້ອວັນສຳຄັນທາງປະຫວັດສາດ

ຕອນເຊົ້າ, ວັນທີ 15 ທັນວາ 2020 ທີ່ຫ້ອງປະຊຸມໃຫຍ່ (ຈຳປາຫອມ) ຂອງພະແນກສາທາລະນະສຸກແຂວງຈຳປາສັກ. ໄດ້ຈັດພິທີປາຖະກະຖາຂື້ນໂດຍການເປັນປະທານ ແລະ ປາຖະກະຖາຂອງທ່ານ ສົມສີ ມະນີນິນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ. ເຊິ່ງມີທ່ານ ດຣ ວຽງສີ ສຸພັກດີ ກຳມະການພັກແຂວງ, ຫົວໜ້າພະແນກສາທາລະນະສຸກໃຫ້ການຕ້ອນຮັບ ແລະ ຮ່ວມຮັບຟັງ ພ້ອມດ້ວຍຄະນະພັກ, ຄະນະພະແນກ, ສະມາຊິກພັກ, ພະນັກງານລັດຖະກອນອ້ອມຂ້າງພະແນກສາທາລະນະສຸກແຂວງເຂົ້າຮ່ວມ ຈຳນວນ 65 ທ່ານ, ຍິງ 36 ທ່ານ. ໃນນັ້ນມີ ສະມາຊິກພັກ 21 ສະຫາຍ, ຍິງ 15 ສະຫາຍ.

ເອກະສານທີ່ນຳມາປາຖະກະຖາປະກອບມີ: ວັນສະຖາປະນາ ສປປ ລາວຄົບຮອບ 45 ປີ (2 ທັນວາ 1975-2 ທັນວາ 2020), ວັນເກີດປະທານ ໄກສອນພົມວິຫານຄົບຮອບ 100 ປີ (13 ທັນວາ 1920-13 ທັນວາ 2020) ແລະ ວັນມະຫາປະຕິວັດເດືອນຕຸລາລັດເຊຍຄົບຮອບ 103 ປີ (7 ພະຈິກ 1917-7 ພະຈິກ 2020).