ຄະນະໂຄສະນາອົບຮົມແຂວງຈຳປາສັກໄດ້ຈັດພິທີປິດຊຸດອົບຮົມມະຫາຊົນກ້າວໜ້າທີ່ຈະຂະຫຍາຍເຂົ້າພັກ

ຄະນະໂຄສະນາອົບຮົມແຂວງຈຳປາສັກໄດ້ຈັດພິທີປິດຊຸດອົບຮົມມະຫາຊົນກ້າວໜ້າທີ່ຈະຂະຫຍາຍເຂົ້າພັກຊຸດທີ V ປະຈຳປີ 2020
ໃນຕອນບ່າຍຂອງວັນທີ 13 ພະຈິກ 2020 ຄະນະໂຄສະນາອົບຮົມແຂວງຈຳປາສັກໄດ້ຈັດພິທີປິດຊຸດອົບຮົມມະຫາຊົນກ້າວໜ້າທີ່ຈະຂະຫຍາຍເຂົ້າພັກຊຸດທີ V ປະຈຳປີ 2020 ເຊິ່ງໄດ້ຈັດຂື້ນທີ່ຫ້ອງປະຊຸມ 406 ສຳນັກງານແຂວງຈຳປາສັກ ໂດຍການເປັນປະທານຂອງສະຫາຍ ສົມສີ ມະນີນິນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງຈຳປາສັກ. ເຂົ້າຮ່ວມພິທີມີຄະນະພັກຮາກຖານ ແລະ ໜ່ວຍພັກຮາກຖານ, ຄະນະຮັບຜິດຊອບຊຸດອົບຮົມ ແລະ ນັກສຳມະນາກອນທັງໝົດ 45 ສະຫາຍ, ຍິງ 23 ສະຫາຍ.
ໃນພິທີໄດ້ຮັບຟັງການສະຫຼຸບລາຍງານໂດຍສັງເຂບຂອງສະຫາຍ ນາງ ພອນທິບ ແກ້ວປະເສີດ ຫົວໜ້າຫ້ອງການບໍລິຫານ, ຄະນະຮັບຜິດຊອບຊຸດຝຶກອົບຮົມໃນຄັ້ງນີ້ ແລະ ໄດ້ພ້ອມກັນຕີລາຄາຄວາມຮັບຮູ້ເຂົ້າໃຈຂອງນັກສຳມະນາກອນ ຫຼັງຈາກທີ່ໄດ້ຄົ້ນຄວ້າຮ່ຳຮຽນໃນ 11 ຄຳຖາມ-ຄຳຕອບ.
ໃນພິທີສະຫາຍສົມສີ ມະນີນິນ ກຳມະການພັກແຂວງ, ຫົວໜ້າຄະນະໂຄສະນາອົບຮົມແຂວງ, ປະທານກອງປະຊຸມປິດຊຸດຮຽນກໍ່ໄດ້ໃຫ້ກຽດມອບໃບຢັ້ງຢືນພ້ອມທັງໂອລົມຕໍ່ນັກສຳມະນາກອນທັງໝົດໃຫ້ມີສະຕິ, ຢຶດໝັ້ນຕໍ່ອຸດົມການ ແລະ ຕໍ່ທິດສະດີ-ແນວທາງຂອງພັກເພື່ອຝຶກຝົນຫຼໍ່ຫຼອມຕົນເອງເຂົ້າໃນການຈັດຕັ້ງປະຕິບັດວຽກງານ, ປະກອບສ່ວນທຸກກຳລັງແຮງຂອງຕົນຕາມໜ້າທີ່ຄວາມຮັບຜິດຊອບເພື່ອເຮັດໃຫ້ກົມກອງທີ່ຕົນສັງກັດຢູ່ມີຜົນສຳເລັດສູງຂື້ນກວ່າເກົ່າ.