ແຂວງຈຳປາສັກ ເຜີຍແຜ່ຜົນສຳເລັດຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI

ລາຍລະອຽດ

ສ້າງຂື້ນເມື່ອ ວັນສຸກ, 20 ຕຸລາ 2023 04:44

ຂຽນໂດຍ ptcps

     ໃນຕອນເຊົ້າ ຂອງວັນທີ 19 ຕຸລາ 2023 ແຂວງຈຳປາສັກ ເຜີຍແຜ່ຜົນສຳເລັດຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI 

     ພິທີໄດ້ຈັດຂຶ້ນທີ່ສະໂມສອນຂອງແຂວງ; ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ສະນັ່ນ ສີພາພົມມະຈັນ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານແນວຄິດ, ວຽກງານພັກ-ພະນັກງານ, ມີທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ປະທານກວດກາພັກແຂວງ, ປອ ສຸປານີ ສີລິປຸນໂຍ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍການນຳ, ສະມາຊິກພັກ, ພະນັກງານພະແນກກົມກອງອ້ອມຂ້າງແຂວງເຂົ້າຮ່ວມທັງໝົດ 350 ທ່ານ, ຍິງ 73 ທ່ານ.

       ໃນພິທີ ທ່ານ ສະນັ່ນ ສີພາພົມມະຈັນ ຮອງເລຂາຄະນະບໍລິຫານງານພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານແນວຄິດ, ວຽກງານພັກ-ພະນັກງານ ໃຫ້ກຽດເຜີຍແຜ່ຜັນຂະຫຍາຍຜົນສຳເລັດຂອງກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ XI ເຊິ່ງເຕັມໄປດ້ວຍບັນຍາກາດແຫ່ງຄວາມສາມັກຄີ, ຄວາມເປັນເອກະພາບ ແລະ ຄວາມຮັບຜິດຊອບການເມືອງສູງ, ຄຽງຄູ່ກັບຄວາມສົນໃຈ ແລະ ການຕິດຕາມຢ່າງໃກ້ຊິດ ຂອງທົ່ວສັງຄົມ ກໍ່ຄືແຂວງຈຳປາສັກ. 

    ໃນກອງປະຊຸມຄົບຄະນະກາງສະໄໝ ທີ XI ຂອງ ຄະນະບໍລິຫານງານສູນກາງພັກ ໄດ້ພ້ອມກັນຄົ້ນຄ້ວາຕົກລົງບັນຫາສຳຄັນຂອງພັກ ແລະ ຂອງຊາດ ດ້ວຍຄວາມເປັນເອກະພາບສູງ ແລະ ໄດ້ສິ້ນສຸດພ້ອມໆກັບຜົນສຳເລັດອັນສຳຄັນດັ່ງກ່າວ ຢ່າງເປັນເອກະພາບ, ພາວະວິໄສດ້ານຂໍ້ຄົງຄ້າງ, ຂໍ້ຂາດຕົກບົກຜ່ອງ, ຈຸດດີ ແລະ ຈຸດອ່ອນ ໃນການນຳພາ-ຊີ້ນຳ ຂອງພັກ ກໍ່ຄືການຈັດຕັ້ງປະຕິບັດໜ້າທີ່, ວຽກງານຈຸດສຸມໃນບາງດ້ານ ທີ່ບໍ່ສາມາດບັນລຸຜົນຕາມຄາດໝາຍທີ່ວາງອອກ, ພ້ອມທັງຊີ້ໃຫ້ເຫັນສາເຫດຕົ້ນຕໍເພື່ອກຳນົດທິດທາງມາດຕະການແກ້ໄຂທີ່ສອດຄ່ອງ ແລະ ແທດເໝາະ ເພື່ອຮັບປະກັນໃຫ້ແກ່ການຫັນປ່ຽນໃໝ່ຢ່າງຈິງຈັງໃນການຈັດຕັ້ງປະຕິບັດແນວທາງຂອງພັກ ໃນຕໍ່ໜ້າ ແລະ ທ້າຍສະໄໝ( 2023-2025). 

      ໃນຕອນທ້າຍ ຂອງກອງປະຊຸມຄົບຄະນະກາງສະໄໝ ທີ XI ຂອງ ຄະນະບໍລິຫານງານສູນກາງພັກ ຍັງໄດ້ປະເມີນກວມລວມ ບັນດາຜົນສຳເລັດ ແລະ ບາງດ້ານ ທີ່ຕ້ອງໄດ້ສືບຕໍ່ໜ້າ ອົາໃຈໃສ່ ແກ້ໄຂ ແລະ ຍົກລະດັບກ່ຽວກັບການສ້າງບັນດາປະຖົມປັດໃຈ ໃຫ້ແກ່ການກ້າວເດີນສູ່ສັງຄົມນິຍົມ ຕາມແນວທາງປ່ຽນແປງໃໝ່ຢ່າງຮອບດ້ານ ແລະ ມີຫຼັກການຂອງພັກເຮົາ ເຊິ່ງຊີ້ບອກເຖິງສະພາວະຄວາມເປັນຈິງ ທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ ແລະ ສືບຕໍ່ບູລະນະ ລະບອບປະຊາທິປະໄຕ ປະຊາຊົນ ໃຫ້ສົມບູນຂຶ້ນໃນຕໍ່ໜ້າ ແລະ ຢ່າງຮອບດ້ານໃນທົ່ວແຂວງຈຳປາສັກ.

• < ຕໍ່ໄປ
• ຕໍ່ໄປ >