ພິທີປະກາດແຕ່ງຕັ້ງ ຫົວໜ້າຄະນະໂຄສະນາອົບຮົມເມືອງໂຂງ ແຂວງຈຳປາສັກ

ລາຍລະອຽດ

ສ້າງຂື້ນເມື່ອ ວັນພຸດ, 30 ສິງຫາ 2023 02:45

ຂຽນໂດຍ ptcps

      ໃນຕອນເຊົ້າ ຂອງວັນທີ 23 ສິງຫາ 2023 ຢູ່ທີ່ຫ້ອງປະຊຸມຫ້ອງວ່າການເມືອງໂຂງ ແຂວງຈຳປາສັກ ໄດ້ຈັດພິທີປະກາດແຕ່ງຕັ້ງຫົວໜ້າຄະນະໂຄສະນາອົບຮົມເມືອງຂຶ້ນ, ພາຍໃຕ້ການເປັນປະທານ ຂອງທ່ານ ພູວັນ ສີສຸພົນ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດ,  ວຽກພັກ-ພະນັກງານເມືອງໂຂງ. 

      ໂດຍມີ ທ່ານ ປອ ວັນນະລາ ສຸດທິຈັກ ປະທານກວດກາ ຮອງຫົວໜ້າຄະນະໂຄສະນາອົບຮົມແຂວງ, ມີ ຄະນະພັກເມືອງ, ຫົວໜ້າຫ້ອງການໃນຂົງເຂດການເມືອງ, ພະນັກງານຫັນລົງກໍ່ສ້າງຮາກຖານການເມືອງຂອງແຂວງ, ພະນັກງານຄະນະໂຄສະນາອົບຮົມແຂວງ, ໂຄສະນາອົບຮົມເມືອງ ເຂົ້າຮ່ວມຢ່າງພ້ອມພຽງ.

        ໃນພິທີດັ່ງກ່າວ ຄະນະຈັດຕັ້ງເມືອງ ໄດ້ຜ່ານຂໍ້ຕົກລົງເຈົ້າເມືອງໆໂຂງ ສະບັບເລກທີ 422/ຈມ.ຂ, ລົງວັນທີ 16.8.2023 ວ່າດ້ວຍການແຕ່ງຕັ້ງ ທ່ານນາງ ຈັນເພັງ ບຸນສາລີ ກຳມະການພັກເມືອງ, ອາດີດປະທານສະຫະພັນກຳມະບານເມືອງ ເປັນຫົວໜ້າຄະນະໂຄສະນາອົບຮົມເມືອງໂຂງ.

        ຈາກນັ້ນທ່ານ ພູວັນ ສີສຸພົນ ຮອງເລຂາພັກເມືອງ, ຜູ້ຊີ້ນຳວຽກງານການເມືອງແນວຄິດ, ວຽກພັກ-ພະນັກງານເມືອງ ໄດ້ມີຄຳເຫັນຊີ້ນຳຕໍ່ກອງປະຊຸມ.

1. ເອົາໃຈໃສ່ວຽກງານໂຄສະນາອົບຮົມ, ໂດຍກຳແໜ້ນພາລະບົດບາດຂອງຕົນ ໃນການສຶກສາອົບຮົມແນວຄິດ ຂອງພະນັກງານ-ປະຊາຊົນບັນດາເຜົ່າ, ຕອບໂຕ້ການບິດເບຶອນແນວທາງຂອງພັກ.
2. ເອົາໃຈໃສ່ປັບປຸງອົງການຈັດຕັ້ງຂອງໂຄສະນາໃຫ້ມີຄວາມເຂັ້ມແຂງຮອບດ້ານ, ສ້າງພະນັກງານໃຫ້ມີຄວາມຮູ້ຄວາມສາມາດທີ່ທັນສະໄໝຮອງຮັບການເຕີບໂຕຂະຫຍາຍຕົວຂອງວຽກງານ.
3. ປັບປຸງລະບອບແບບແຜນໃນການເຮັດວຽກ, ມີການຕິດຕາມ, ກວດກາການປະຕິບັດວຽກງານເພື່ອປັບປຸງແກ້ໄຂຈຸດອ່ອນ-ພັດທະນາຈຸດດີໃຫ້ດີຍິ່ງຂື້ນ
4. ສ້າງຄວາມສາມັກຄີກົມກ່ຽວ ລະຫ່ວາງ ພະນັກງານ-ພະນັກງານ, ພະນັກງານ-ຫົວໜ້າຜູ້ໃໝ່.
5. ເອົາໃຈໃສ່ຜັນຂະຫຍາຍມະຕິຂອງພັກ, ຂອງແຂວງ, ຂອງເມືອງ, ຕິດພັນກັບການຂະຫຍາຍສະມາຊິກພັກໃນຂັ້ນຮາກຖານ, ຊຸກຍູ້ການອົບຮົມທິດສະດີ-ແນວທາງຂອງພັກໃຫ້ແກ່ອົງການຈັດຕັ້ງຄະນະພັກຮາກຖານ.

• < ຕໍ່ໄປ
• ຕໍ່ໄປ >